Адыгэ Республикэм заомкIэ, ­IофшIэнымкIэ, УIэшыгъэ КIуа­чIэхэмкIэ ыкIи хэбзэухъумэкIо къулыкъухэмкIэ иветеранхэм я Совет я 8-рэ зэфэхьысыжь-хэ­дзын конференцие чъэпыогъум и 20-м иIагъ.

Ащ хэлэжьагъэх АР-м и ЛIышъхьэрэ министрэхэм я Кабинетрэ я Админист­ра­цие ипащэу Владимир Свеженец, Къэралыгъо Совет — Хасэм и Тхьаматэу Владимир Нарожнэр, ащ игуадзэу, Урысыем и ЛIыхъужъэу Цэй Эдуард, на­хьыжъхэм я Совет итхьаматэу ГъукIэлI Нурбый.
2020 — 2025-рэ илъэсхэм Советым анахьэу ынаIэ зытыригъэтыгъэ лъэныкъохэм зэфэхьысыжь-хэдзын ­конференциер афэгъэхьыгъагъ. Ащ ­игъэкIотыгъэу къытегущыIагъ ащ итхьаматэу Къоджэ Аслъан. Тызыхэт илъэсыр Хэгъэгу зэошхор заухыгъэр илъэс 80 зэрэхъугъэм епхыгъэу яIофшIэн зэрэзэхэщэгъагъэр, зэошхом ихьазаб цIыфхэм джыри зэращымыгъупшэрэр ащ ипэублэ псалъэ къыщыхигъэщыгъ.
Хабзэм ишъолъыр къулыкъухэмрэ Адыгэ Республикэм иветеранхэм я Советрэ илъэс 38-рэ хъугъэу зэготхэу зэрэзэдэлажьэхэрэр тхьаматэм хигъэу­нэфыкIыгъ.
— Ветеран мини 128-рэ зыхэхьэрэ советым анахьэу ынаIэ зытетыр ахэм ягумэкIыгъохэр зэшIохыгъэнхэр, ясо­циальнэ-экономикэ шIоигъоныгъэхэр къэу­хъумэгъэнхэр, ящыIэкIэ-псэукIэ на­хьышIу шIыгъэныр ыкIи общественнэ IофшIэным чанэу къыхэлэжьэнхэр ары. Гушъхьэбаиныгъэр гъэпытэгъэныр, къыт­кIэхъухьэхэрэ лIэужхэм яхэгъэгу шIу алъэгъоу пIугъэнхэр пшъэрылъ шъхьаIэх, — къыIуагъ Къоджэ Аслъан.
Зэфэхьысыжь пIалъэу зигугъу къэтшIы­гъэм къыкIоцI дзэкъулыкъушIэхэр зыща­гъэтIылъыгъэхэ псэолъи 7-мэ гъэцэ­кIэ­жьын IофшIэнхэр ащызэрахьагъэх, мы­жъобгъу 15 кIэу къызэIуахыгъ. Джащ фэдэу 2022-рэ илъэсым къыщегъэжьагъэу ЛIыхъужъныгъэм иурок 215-рэ фэдиз ныбжьыкIэхэм афызэхащагъ. 2025-рэ илъэсым республикэ зэнэкъо­къоу «Нить памяти сплетает времена» зыфиIорэм ветеран организациер хэ­ла­жьи, грант къыщырихыгъ. А мылъкумкIэ джы къэбарлъыгъэIэс стенд 11 къы­щэ­фы­нышъ, Шэуджэн районым игу­рыт еджапIэхэм афарагъэщэнхэу загъэ­хьа­зыры.

НэмыкI Iофтхьабзэхэу зэхащагъэхэм Къоджэ Аслъан игъэкIотыгъэу къатегущыIагъ. Адыгеим и ЛIышъхьэу КъумпIыл Мурат сыд фэдэрэ лъэныкъокIи IэпыIэгъу къызэрафэхъурэмкIэ зэрэфэразэ­хэрэр хигъэунэфыкIыгъ.
Нэужым Владимир Нарожнэр, Владимир Свеженец къэгущыIагъэх, Адыге­им и ЛIышъхьэ ыцIэкIэ къэзэрэугъоигъэ­хэм шIуфэс къарахыгъ. Советым Iофэу ышIэрэм мэхьанэшхо зэриIэр, ныбжьыкIэхэм дзэ-патриотическэ пIуныгъэ тэрэз ягъэгъотыгъэнымкIэ амалышIоу зэрэщытыр ахэм къаIуагъ.
Адыгэ Республикэм иветеранхэм я Совет илъэситфым Iофэу ышIагъэм изэфэхьысыжьхэм уагъэрэзэнэу зэрэщытыр къэгущыIагъэхэм хагъэунэфы­кIыгъ. Зигугъу къэтшIыгъэ организа-­
цием итхьаматэу Къоджэ Аслъан, ащ иапэрэ гуадзэу Виктор Коноваловыр икIэрыкIэу хадзыжьыгъэх, тапэкIэ пшъэ­рылъхэр агъэнэфагъэх.

Iэшъынэ Сусан.