Урысыем и ЛIыхъужъэу Вадим Лемеш ишIэжь фэгъэхьыгъэу боксымкIэ турнир Мыекъуапэ щыкIуагъ.

Республикэм икъэлэ шъхьаIэ игурыт еджа­пIэу N 7-м боксымкIэ испортзал ар щы­рагъэкIокIыгъ.
МэфитIурэ кIогъэ зэнэкъокъум зыныбжь илъэс 16-м емыхъугъэ кIалэхэр хэлэжьагъэх.
Турнирым икъызэIухын фэгъэхьыгъэ зэхахьэм къеблэгъагъэх Мыекъуапэ физическэ культурэмкIэ ыкIи спортымкIэ и Комитет итхьаматэу Дмитрий Щербаневыр, АР-м боксымкIэ ифедерацие ипащэу Сихъу Аскэрбый, спортым иветеранхэр, Вадим Лемеш игупсэхэр ыкIи иныбджэгъухэр. КъыткIэхъу­хьэрэ лIэужхэм яхэгъэгу шIу алъэгъоу пIугъэнхэмкIэ мыщ фэдэ Iофтхьабзэхэм язэхэщэн мэхьанэшхо зэриIэр къэгущыIагъэхэм къыхагъэщыгъ. Адыгеим илIыхъужъхэр щыгъупшэхэрэп, ахэр егъэлъапIэх — джары зэнэкъокъум мэхьанэ шъхьаIэу иIагъэр.

ТекIоныгъэр къыдэзыхыгъэхэм ыкIи финалистхэм медальхэр, дипломхэр ыкIи шIэжь шIухьафтынхэр афагъэшъошагъэх.