Теннис цIыкIумкIэ Адыгэ ­Республикэм ипервенствэ апэрэу Красногвардейскэ районым щырагъэкIокIыгъ.

Административнэ гупчэм испорткомплексэу «Кавказым» къыщызэрэугъоигъэх 2013-рэ илъэсым къэхъугъэхэр ыкIи ахэм анахьыкIэхэр. Мыекъуапэ, Адыгэкъалэ, Красногвардейскэ, Тэхъутэмыкъое ыкIи Теуцожь районхэм ялIыкIохэр ары зызыушэтыгъэхэр.
Первенствэм икъызэIухын фэгъэхьыгъэ мэфэкI зэхахьэм хэлэжьагъэх Красногвардейскэ районым иадминистрацие ипащэу Гъубжьэкъо Темур, народнэ депутатхэм я Совет итхьаматэу Анна Выставкинар, Адыге­им теннис цIыкIумкIэ ифедерацие ипащэу Юрий Гороховыр, районым ицIыф гъэшIуагъэу Владимир Стародубцевыр ыкIи районым икIэлэцIыкIу-ныбжьыкIэ спорт еджапIэ ипащэу Шъэожъ Мурадин.
Нэужым зэнэкъокъухэр рагъэжьагъэх. Зыныбжь илъэс 12-м емыхъугъэхэм якупхэм кIэли 10-рэ пшъэшъэ 11-рэ ахэтыгъэх. Крас­ногвардейскэ районым илIыкIоу Роман Мироновымрэ Мыекъуапэ щыщ Бзаго Даринэрэ текIоныгъэр къыдахыгъ. Джащ фэдэу хагъэунэфыкIырэ чIыпIэхэр къахьыгъэх пшъашъэхэмкIэ — Козинэ Самирэрэ (Адыгэ­къал) Къайтмэс Джамилэрэ (Хьатикъуай), кIалэхэмкIэ — Дамир Бабабековымрэ Александр Гороховымрэ (Мыекъуапэ).
Зыныбжь илъэс 14-м нэмысыгъэхэм якуп пшъэшъи 6 щызэнэкъокъугъ. Бзаго Даринэ джыри зэ текIоныгъэр къыдихыгъ, Алина Трофимовар (псэупIэу Красногвардейскэр) ятIонэр, Мыекъуапэ къэзыгъэлъэгъогъэ Пэфыф Суандэ ящэнэрэ хъугъэ. КIалэхэм язэнэкъокъу ифинал щызэIукIагъэх Кирилл Панькинымрэ Бзаго Дамиррэ. Кирилл 3:2-у текIуагъ ыкIи апэрэ чIыпIэр къыдихыгъ. Роман Пономаревыр ящэнэрэ хъугъэ.
Зэфэхьысыжьхэм къызэрагъэлъэгъуагъэм­кIэ, Мыекъуапэ икомандэ хагъэунэфыкIырэ чIыпIи 8 къыдихыгъ, Красногвардейскэ районым — 3, Адыгэкъалэ — зы.
Зыныбжь илъэс 16-м емыхъугъэхэм язэнэкъокъу шэкIогъум и 2-м Адыгэкъалэ щыкIощт.