Абхъазым и Президентэу Бадра Гунба форумэу «Наследие во имя будущего братских народов России и Абхазии: Ислам, единство и преемственность в контексте исторических и современных испытаний» зыфиIорэм къекIолIагъэхэм аIукIагъ.

Iофтхьабзэм хэлэжьагъэх АР-м ыкIи Пшызэ шъолъыр ащыпсэурэ быслъымэн­хэм я ДиндэлэжьапIэ имуфтиеу Къэрдэн Аскэрбый, Абхъаз Республикэм имуфтиеу Тимур Дзыба, дин организациехэм зэпхыныгъэ адыряIэнымкIэ УФ-м и Президент дэжь щызэхащэгъэ ГъэIорышIапIэм идепартамент ипащэу Евгений Ереминыр, ислъам культурэм, шIэны­гъэм ыкIи гъэсэныгъэм IэпыIэгъу афэхъугъэнымкIэ Фондым идиректорэу Михаил Грязновыр ыкIи Дунэе ислъам миссием ипащэу Шафиг Пшихачевыр.
Абхъазым и Президент къыкIигъэ­тхъыгъ зэкъош лъэпкъхэм гушъхьэлэжь баиныгъэ ахэлъынымкIэ форумым ишIогъэшхо къызэрэкIорэр.
— ЛIэшIэгъу пчъагъэм тэ щэIагъэу тхэлъымкIэ ыкIи тикультурэ ибаиныгъэкIэ такъыхэщы. Мы форумым изэхэщэн къегъэлъагъо хьакIэхэр зэрэтикIасэхэр ыкIи культурнэ, дин зэфыщытыкIэхэр гъэпытэгъэным тызэрэфэIорышIэрэр, — къыIуагъ Бадра Гунба.
Евгений Ереминым дин организациехэм зэпхыныгъэ адыряIэнымкIэ Советым хэтхэм шIуфэс гущыIэхэмкIэ закъы­фигъэзагъ.
«Кавказым ыкIи Абхъазым ябыслъы­мэн организациехэм азыфагу илъ зэпхыныгъэр гъэпытэгъэнымкIэ ыкIи хэхъоныгъэ ягъэшIыгъэнымкIэ тэ къыттефэрэр зэкIэ тшIэщт», — къыIуагъ ащ.
Чъэпыогъум и 8-м къыщегъэжьагъэу и 11-м нэс ислъам культурэм, шIэныгъэм ыкIи гъэсэныгъэм IэпыIэгъу ягъэгъотыгъэнымкIэ Фондым ишIуагъэкIэ къалэу Сыхъум форумыр щыкIуагъ.
Ащ пшъэрылъэу иIагъэр АР-м ыкIи Пшызэ шъолъыр ащыпсэурэ быслъымэн­хэмрэ Абхъаз Республикэм быслъымэн­хэм ядин ЗыкI гъэIорышIапIэрэ азыфагу илъ зэпхыныгъэр гъэпытэгъэныр, тарихъ ыкIи дин кIэным ямэхьанэ къэ­ухъумэгъэныр, нэмыкIхэри.

КIАРЭ Фатим.