Дин зэфыщытыкIэхэм атегущыIагъэх
АР-м ыкIи Пшызэ шъолъыр ащыпсэурэ быслъымэнхэм я ДиндэлэжьапIэ шъущегъэгъуазэ
Лъэпкъ ыкIи дин зэфыщытыкIэхэм яIофыгъохэмкIэ упчIэжьэгъу Советэу Тэхъутэмыкъое районым ипащэ дэжь щызэхащагъэм игъэкIотыгъэ зэхэсыгъо иIагъ. Ащ пэщэныгъэ дызэрихьагъ район администрацием итхьаматэу Шъэо Аскэр.
Къэзэрэугъоигъэхэр Iофыгъо зэфэшъхьафхэм атегущыIагъэх. Ахэр зыфэгъэхьыгъагъэхэр лъэпкъ ыкIи дин зэфыщытыкIэхэм алъэныкъокIэ экстремизмэр къэмыгъэхъугъэныр ыкIи ащ пэшIуекIогъэныр, районым кощынымкIэ иIофхэм язытет, дин ыкIи лъэпкъ зыкIыныгъэр гъэпытэгъэныр, лъэпкъ зэфыщытыкIэхэм ыкIи гушъхьэлэжь пIуныгъэм яIофыгъохэм къэбарлъыгъэIэс амалхэм анаIэ тырягъэдзэгъэныр ары.
Iофтхьабзэм хэлэжьагъэх хэбзэухъумэкIо къулыкъухэм, динлэжь организациехэм ялIыкIохэр ыкIи журналистхэр.
АР-м ыкIи Пшызэ шъолъыр ащыпсэурэ быслъымэнхэм я ДиндэлэжьапIэ ыцIэкIэ зэхэсыгъом хэлэжьагъ муфтиим игуадзэу Мысс Асфар. Районым мамырныгъэрэ зэгурыIоныгъэрэ илъынымкIэ дин конфессиехэм ыкIи общественнэ институтхэм зэпхыныгъэ яIэу Iоф зэрэзэдашIэрэм мэхьанэшхо зэриIэр ащ хигъэунэфыкIыгъ.
КIАРЭ Фатим.