Урысые Федерацием ирэзэныгъэ тхылъ къыфагъэшъошагъэу Адыгеир зызэхащагъэр илъэс 35-рэ зэрэхъурэм фэгъэхьыгъэ Iофтхьабзэм къызщаратыжьыгъэхэм ащыщ гъогушIым и Мафэ ипэгъокIэу зигугъу къэтшIыщтыр.

АР-м изаслуженнэ псэолъэшIэу Атлъэскэр Заурбый мы хъызмэтым къыгъэшIагъэм инахьыбэр ритыгъ, тиреспуб­ликэ цIыкIу игъогухэр зэрэдахэхэм, шапхъэхэм адиштэу зэрэшIыгъэхэм иIахь мымакIэу хэзылъхьагъэхэм ащыщ. ГущыIэгъу тызыфэхъум тынэу къызэрэхагъэщыгъэм ежьыркIэ мэхьанэшхо зэриIэр, зэрэрыгушхорэр къыхигъэщыгъ.
— УиIофшIэн уасэ къызыфашIыкIэ сыдигъокIи гуапэ мэхъу, кIуа­чIэ къыуеты, гъэхъэгъакIэхэм уафещэ, джыри нахьыбэжьэу пшIэ пшIоигъо охъу. ЗэкIэ къызготхэм, къыскъотэу сиIофшIэн сыфэзгъэчэфыхэрэм, сипащэхэми, сиIофшIэгъухэми, синыб­джэгъухэми, сиунагъуи сафэраз. Мы тыныр сэ сизакъоу къэзлэжьыгъэп. Iофэу тшIэрэр зэпыгъэщагъ, зы нэ закъо зыхэпчы мыхъущт пшъэхъоу щыт. Арышъ, къэралыгъом ипащэ ирэзэныгъэ зэкIэ зэрэколлективэу къызэдэтылэжьыгъ, — еIо ащ.
Илъэс 28-м ехъугъэу гъогушIын хъыз­мэтым ар хэт. ЕтIани, а зы хъызмэтшIапIэм, Мыекъуапэ игъогушI организациеу «ДСУ-3-м» ащ фэдизым щэлажьэ. ИIофшIэн гуетыныгъэу фыриIэм къыкIэ­лъыкIоу мызэу, мытIоу нэмыкI тынхэмкIи къыхагъэщыгъ. Заурбый УФ-м транспортымкIэ и Министерствэ, АР-м и Къэралыгъо Совет — Хасэм, псэолъэ­шIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ республикэ Министерствэм, нэмыкIхэм ящытхъу ыкIи ярэзэныгъэ тхылъхэр иIэх. А зэпстэумэ анэмыкIэу, Урысые зэнэ­къо­къоу «ИсэнэхьаткIэ анахь дэгъу» зыфиIорэм мызэу, мытIоу хэлэжьагъ, ащ ишъолъыр едзыгъохэм сыдигъокIи апэрэ чIыпIэхэр къащырихыгъэх.
Атлъэскэр Заурбый къалэу Санкт-Петербург къыщыхъугъ, ау ежь джыри цIыкIузэ янэ-ятэхэм Кощхьэблэ районым ит къуаджэу Фэдз къащэжьыгъагъ. Ащ щапIугъ, щеджагъ, джы Мыекъуапэ щэпсэу.
1997-рэ илъэсым IофшIэпIэ чIыпIэ лъыхъузэ, а уахътэм ащ икъэгъотын псынкIагъэп, мы хъызмэтшIапIэм зыдахьэм цIыф ящыкIагъэу къычIэкIи, къыдэнэгъагъ. ИлъэсипшI пчъагъэрэ Iутыным егупшысэгъагъэп ащыгъум, нэмыкI ыгъотымэ IукIыжьынэуи ыгукIэ зыдиIыгъыгъ, ау ежь зэримыIоу хъугъэ.
ГъогушI къызэрыкIоу ригъэжьэгъагъ. Мы IофшIэным къинэу хэлъыр апэрэ мэфэ дэдэм зэхишIагъ, ау щыIэныгъэм шапхъэу къыгъэуцухэрэм адемыгъаш­тэмэ, упсэуныр зэрэкъиныр ыгукIэ зэрэзыдиIыгъым кIуачIэ къыритыгъагъ, охътабэ темышIэуи есэжьыгъагъ.
Бэрэ Iоф ымышIагъэу грейдерым тырагъэтIысхьагъ. Ащ пае Ростов хэкум икъалэу Каменск-Шахтинскэ гъогушI сэнэхьатхэм зыщафагъэсэхэрэ комбинатэу дэтым агъакIуи къыщеджагъ. ГъогушIхэм яIофшIэн къызэ­рыкIоп. Пчэдыжьым жьэу ра­гъажьэшъ, мэзахэ охъуфэкIэ гъогум тетых. Гъэмэфэ уахътэм фэбэшхо зыхъукIэ тэ унэ чъы­Iэ­тагъэхэм защытэухъумэ, ежьхэр ащ хэтых.
— Арэущтэу щытми, сыкIэгъо­жьэу зыпарэкIи къыхэкIы­гъэп, — еIо Заурбый. — Илъэс 26-м ехъугъэу гъогум сытетышъ, сыд фэдэу къиными, сисэнэхьат зэблэсхъунэу, нэмыкI IофшIапIэ сыкIонэу сшъхьэ къихьагъэу къэсшIэжьырэп. Сэщ нахь къин зылъэгъухэрэри бэу щыIэх, си­IофшIэгъуми ахэтых. Арышъ, сэ згъэцакIэрэр анахь къин сIон слъэкIыщтэп.

Гъогоу Iоф зыщишIагъэм, ыгъэцэкIэ­жьыгъэм е кIэу ышIыгъэм ежь иавтомашинэкIэ рыкIоу бэрэ къыхэкIы. Асфальтыр зэшъозэщэу зытелъ щынэгъончъэ гъогу дахэм ишIын ежь иIахь зэрэхэлъым зэрэрыгу­шхорэм къыкIегъэ­тхъы. Иунагъо игъусэ зыхъукIэ, икIалэхэм «мары мы гъогу Iахьыр тэ тшIыгъэ» ариIоу мэхъу.
ИIофшIэн шIу зэрилъэгъурэр, иIэшIагъэ ащ фэдэу зэрэрыгу­шхорэр икIалэу Самир щысэтехыпIэ фэхъугъ. ЕджапIэм зычIэсым ятэ зыдэщыIэм кIозэ Iофэу ышIэрэр зэригъэ­лъэгъущтыгъ. Пчэды­жьым жьэу къыдэтэджэу мэфэ псаум грейдерым дытесэуи бэрэ къыхэкIыгъ. Къинэу Iофым хэлъыр инэрылъэгъу хъугъэми, ащ къымыгъащтэу гурыт еджа­пIэр къызеу­хым гъогушI сэнэхьатым фе­джэнэу колледжым чIэхьагъ.
— Сызыхэт лъэныкъом зыфи­гъэзэнэу зыпарэкIи есIуагъэп ыкIи згъэдэIуагъэп, ежь ишIоигъоныгъэкIэ кIуагъэ, — еIо Заурбый. — Ау сыгукIэ сыфэягъ си­гъогу техьажьынэу, шIу слъэ­гъоу, спсэ зыхэтIэгъэ сиIофшIэн лъигъэкIотэнэу. Сэгугъэ сэнэхьатыр зэригъэгъотымэ кIэмы­гъожьэу гъогушIыным ищыIэныгъэ рипхынэу. Мары мы гъэмафэу кIуагъэм ар тиорганизацие къыIухьи, мэзитIурэ ны­къорэм геодезистым иIэпыIэ­гъоу Iоф щишIагъ.
Заурбый зыхэт бригадэм мы уахътэм Кощхьэблэ районым игъогухэм ащыщ иIахь егъэцэкIэжьы. Пчэдыжь къэс джы­ри мэзахэу Мыекъуапэ дэкIы, километрэ 50-м ехъу екIу, пчыхьэ мэзахэу къэ­кIожьы. Ащ фэдэу бэ ищыIэныгъэ къы­хэфагъэр. Автомобиль гъогу зэщиз, дахэу, тамыгъэу гъогурыкIоным ищыкIагъэхэр зытетхэм, зыщыгъэтхъыгъэхэм е лъэс­рыкIо гъогу цIыкIоу шапхъэхэм адиштэу гъэпсыгъэм тарыкIо зыхъукIэ, ар зышIыгъэхэм джащ фэдиз къин алъэ­гъуми тегупшысэу бэрэ къыхэкIырэп. Арэу щытми, ащ гъогушIхэм акIочIабэ зэрэ­хэлъыр нафэ. Арышъ, ахэм ясэнэхьат мэфэкIкIэ тыгу къыддеIэу тафэгушIо, псауныгъэ пытэрэ щыIэкIэшIурэ яIэнэу, яунагъохэм мамыр арылъынэу тафэлъаIо.
ХЪУТ Нэфсэт.