БэмышIэу хагъэу­нэ­фы­кIынэу рагъэ­жьэгъэ мэ­фэкIым къыдыхэлъытагъэу, къэралыгъо фон­дэу «Хэгъэгум иухъумакIохэр» зыфиIорэм ишъо­лъыр къутамэ хэ­ушъхьа­фыкIыгъэ дзэ операцием иветеранхэм ыкIи ахэм яунагъо­хэм апае Iофтхьабзэ зэхи­щагъ.
— Тым и Мафэ епхыгъэу зыми фэмыдэ шIыкIэм тетэу тилIыхъужъхэр ыкIи ахэм яунагъохэр псыхъоу Шъхьэгуащэ иIушъо щытыугъоигъэх. Фондэу «Хэгъэгум иухъумакIохэр» зыфиIорэм проектэу «Наша семья — наша Победа» ыкIи Iофтхьабзэу «Мой отец — это я!» зыфиIохэрэр зэрэкъэралыгъоу щыпхырещых. Тэ, Адыгэ Респуб­ликэмкIэ, шъолъыр проектэу «В кругу СВОих» зыфиIорэм къыдыхэлъытагъэу, лIыхъужъ-тыхэр ыкIи ахэм яунагъохэм арысхэр жьы къабзэм щытыугъоигъэх, — къыIуагъ шъолъыр фондым ипащэ игуадзэу Джарымэ Еленэ.
ЗэIукIэгъум ипшъэрылъыр — ветеранхэм, хэкIодагъэхэм яуна­гъохэм арысхэр зэпхыгъэнхэр, тыхэм лIыгъэу зэрахьагъэм ишIэжь къызэтегъэнэгъэныр, къэзэрэугъоищт лIыхъужъхэм якъэбархэр къаIотэнхэр ыкIи ежь ящысэхэмкIэ обществэм ыгу къаIэтыныр. ТилIыхъужъхэм ягукIуачIэ ыкIи шIулъэгъоу Хэгъэгум фыряIэр лIэужхэм зэIэпахызэ къырэкIо, кIэлэцIыкIухэр ятэхэм арэгушхох.
А зэпстэури къыушыхьатыгъ гуфэбагъэ хэлъэу Iофтхьабзэр зэрэрекIокIыгъэм. ХьакIэу къэзэрэугъоигъэхэр ягукъэкIыжьхэмкIэ зэдэгощагъэх, зэдэIэпы­Iэжьхэзэ шхыныгъо IэшIухэр зэдаупщэрыхьыгъэх.

МэфэкIым анахь чIыпIэ шъхьа­Iэ щызыубытыгъэр пщэры­хьэкIо Iазэу, хэушъхьафыкIыгъэ дзэ операцием хэлэжьагъэу Юрий Смирновым пхъэ машIомкIэ плов IэшIу зэрэщиупщэрыхьыгъэр ары. Хъулъфыгъэхэр зэдеIэжьхэзэ ар къагъэхьазырыфэ, бзылъфыгъэ­хэм Iанэр къашIыгъ, кIэлэцIыкIухэм чэфыгъо макъэр къахэ­IукIэу зэдэджэгугъэх.
— Сэ сисэнэхьаткIэ сыпщэ­рыхьакIу. Зэзэгъыныгъэм сыкIатхи хэушъхьафыкIыгъэ дзэ операцием сызыщэIэми, кIалэхэми сафэпщэрыхьэщтыгъ. Сигуа­пэу непи а пшъэрылъыр сэгъэ­цакIэ. Сэ сшъхьэкIэ — сыт, илъэс 17 ыныбжьэу кIалэ сиI. Унагъом ным имэхьанэ зэрэщылъагэм къыщымыкIэу тыри ащ гот. Сыда пIомэ тым ежь зэрифэшъуашэу, пхъэшагъэ хэлъэу кIалэхэр ыпIунхэ елъэкIы, шэнхэбзэшIухэу — унагъор, Хэгъэгур къэухъумэгъэнхэр —ахелъхьэ, — къыIуагъ Юрий Смирновым.
Унагъом ыкIуачIэр — ащ исхэм языкIыныгъ, язэкъотныгъ ыкIи яшIулъэгъуныгъ. Ар къыушыхьатыгъ шъолъыр фондэу «Хэгъэгум иухъумакIохэм» мэфэкI зэIукIэгъоу зэхищагъэм. АнаIэ къазэрэтетыр, къазэрэфэразэхэр ветеранхэм зэхашIагъ, хъулъфыгъэ шъыпкъэр зыфэдэн фаер кIэлэцIыкIухэм алъэгъугъ. Ветеран пэпчъ игушIуагъуи, игумэкIыгъуи дэзыгощын, иунагъо къотэгъу IэпыIэгъу фэхъун зэриIэр фондым зэпымыоу агурегъаIо.
Iэшъынэ Сусан.