Атлетикэ онтэгъумкIэ Урысыем изэнэкъокъу къалэу Иркутскэ щыкIуагъэм Шэуджэн районым икIэлэцIыкIу-ныбжьыкIэ спорт еджапIэ икъутамэу къуаджэу Хьатыгъу­жъыкъуае дэтым испорт­смен ныбжьыкIэу Ордэкъо Астемир апэрэ чIыпIэр къыщыдихыгъ.

Ар атлетикэ онтэгъумкIэ Урысыем плIэгъогогъо ичемпион, дунэе ыкIи шъолъыр зэнэкъокъухэм текIоныгъэхэр къащыдихыгъ, Урысыем спортымкIэ имастер. Ордэкъо Астемир килограмм 61-м нэс къэзыщэчыхэрэм якуп зыщиу­шэтыгъ ыкIи «рывок» зыфиIорэ лъэныкъомкIэ килограмми 106-рэ къыIэтыгъ. Зигугъу къэтшIыгъэ спорт еджапIэм икъутамэ илъэс къэс гъэхъэгъэшIухэр ешIых. Атлетикэ онтэ­гъумкIэ спортым имастер хъунымкIэ кандидатэу, тренер шъхьаIэу Хьа­гъур Хьалимрэ спортымкIэ дунэе класс зиIэ мастерэу Хьагъур Рэджэбрэ кIэлэ ныбжьыкIэм итренерых.

— Иркутскэ щыкIогъэ зэнэкъо­къум Астемир дэгъу дэдэу зыкъыщигъэлъэгъуагъ. Хэгъэгум испортсмен анахь лъэшхэр ащ щызэIукIагъэх. Спортышхом игъогу псынкIэп, лIыгъэрэ щэIэныгъэшхорэ ищыкIагъ. Астемир мыпшъыжьэу Iоф зыди­шIэжьызэ атлетикэ онтэгъум илъэгапIэхэм афэкIо, — къыIуагъ Хьагъур Рэджэб.

— ТекIоныгъэм тапэкIэ гъэхъэ­гъэшIухэр сшIынхэм сыкIигъэгушIугъ. Илъэс зэкIэлъыкIохэм семызэщэу Iоф зэрэзыдэсшIэжьыгъэм ишIогъэшхо къысэкIыгъ ыкIи мыщ фэдэ къэгъэлъэгъон къыкIэкIуагъ, — къы­хигъэщыгъ Астемир.