Тэхъутэмыкъое районым ит промышленнэ паркэу «Инэм» зыфиIорэм компаниеу Оzоn илогистическэ гупчэ щызэхэщэгъэнымкIэ инвестиционнэ проектышхом ипхырыщын изичэзыу ыкIэм фэкIуагъ.

Шъугу къэтэгъэкIыжы: промышленнэ шъолъырыр гъэпсыгъэным пае къэлэ гъэпсыкIэ зиIэ псэупIэу Инэм пэмы­чыжьэу гектар 200 хъурэ чIыпIэр къафыхагъэкIыгъагъ. Ар зыдэщыIэ лъэны­къор Iэрыфэгъоу щытыгъ. Пшъэрылъыбэ зэшIозыхырэ паркыр, индустриальнэ паркэу «Инэм» зыфиIорэр ащ щыIэх. Нафэу зэрэщытымкIэ, къыдэгъэкIыным фэгъэзэгъэ компаниехэмрэ предприятиехэмрэ ащыгъэпсыгъэнхэмкIэ а промышленнэ чIыпIэшхом амалышIухэр ыкIи гугъапIэхэр къетых.
Апэрэ резидентэу хъугъэр компаниеу Оzоn-р ары. Промышленнэ паркым гупчакIэ къызэрэщызэIуихыгъэмкIэ макъэ ащ къыгъэIугъ. Псэуалъэм техникэмкIэ амалхэр егъэгъотыгъэнхэм пае компанием иинвестициехэр сомэ миллиарди 2,8-м шIокIых. Заказэу къатыхэрэм яп­хыгъэ Iофтхьабзэхэр складым ыгъэцэкIэщтых: товархэр къаIихыщтых ыкIи посыл­кэу ыгъэхьазырхэрэр чIыпIэ гъэнэфагъэ­хэм анэзгъэсыщтхэм аIэкIигъэхьащтых.
Апэрэ чэзыум псэуалъэм ыубытыгъа­гъэр квадрат метрэ мин 40-м нэсы­щтыгъ. Товар зэфэшъхьафэу миллиони 10-м ехъу ащ чIэфэн ылъэкIыщт, чэщ-зымафэм заказ мини 180-м ехъумэ япхыгъэ Iоф­тхьабзэхэр зэшIуихыщтых. ЫкIуачIэ изэу IофшIэныр ыгъэцакIэ зыхъукIэ, чIыпIэу гъэтIылъыпIэм ыубытырэр фэди 2-кIэ нахьыбэ хъущт — квадрат метрэ мин 80-м нэсыщт. Товарэу чIэфэщтри миллион 20-м нэсыщт. Мафэ къэс заказ мин 550-м ехъумэ япхыгъэ фэIо-фашIэхэр зэшIуихынхэ ылъэкIыщт.
НепэкIэ Оzоn-м сортировкэ зыща­шIыщт гупчэ иIэ хъугъэ. Ащ нэмыкIэу Адыгэ­къалэ квадрат метрэ мин 60-м ехъу зыубытырэ фулфилмент-гупчэм Iоф щешIэ. Складым нэбгырэ мин 1,5-м ехъумэ Iоф щашIэ, чэщ-зымафэм заказ мин 475-м ехъумэ япхыгъэ фэIо-фашIэхэр зэшIуахых. Товар миллион 20 фэдиз мыщ чIэфэщт.
«Къыблэм тифэIо-фашIэхэр къызфэзгъэфедэрэ ыкIи щэным фэгъэзэгъэ нэб­гырэ пчъагъэу исым хэхъо зэпыт. Я 2-рэ кварталым Адыгэ Республикэм заказхэр процент 60-кIэ нахьыбэ щыхъугъэх, Крас­нодар краим — процент 40-м ехъукIэ. ЧIыпIэ предпринимательхэми товарэу зэIэкIагъахьэрэр нахьыбэ мэхъу зэпыт. Заказхэр нахь псынкIэу аIэкIэгъэхьэгъэн­хэм пае логистикэмкIэ инфраструктурэм нахь хэхъоныгъэ зэредгъэшIыщтым тынаIэ тетэгъэты», — къыIуагъ Оzоn-м логисти­кэмкIэ ипащэу Алла Кулижниковам.
Адыгеим и ЛIышъхьэу КъумпIыл Мурат республикэм инвестициехэр нахьыбэу къихьанхэмкIэ ыкIи а лъэныкъомкIэ Iоф­тхьабзэхэу зэрахьэхэрэм афэгъэхьыгъэу агу къыгъэкIыжьыгъ.
«Мы аужырэ илъэсхэм логистическэ гупчэхэм язэхэщэн тынаIэ нахь тедгъэты хъугъэ. Тиреспубликэ зыдэгъэзэгъэ чIыпIэми ащкIэ ишIуагъэ къэкIо, цыхьэшIэгъу инвесторхэм, гущыIэм пае, компаниеу Оzоn фэдэхэми яшIогъэшхо къэ­кIо. Бизнесым зыригъэушъомбгъузэ, а компанием бэшIагъэ Адыгеим Iоф зыщишIэрэр. Тиреспубликэ инвестициякIэхэр къыхэзылъхьэрэ, IофшIэпIэ чIыпIакIэхэм ахэзгъэхъорэ ащ фэдэ гъусэгъухэм адытиIэ зэпхыныгъэхэм зягъэ­ушъом­бгъугъэным тифедэ хэлъ. Тэри республикэмкIэ ащ фэдэ бизнесым тишIуагъэ етэгъэкIы, инвестпроектхэр пхырыщыгъэнхэмкIэ амалышIухэр, яфедэ зыхэлъхэр ятэгъэгъотых. ГущыIэм пае, IофшIэпIэ чIыпIэ шъэ пчъагъэ зиIэщт комплексы­шхоу Оzоn-р къызэрэзэIутхыгъэр. ПсэупIэу Инэм щагъэпсыгъэ промышленнэ паркри анахь проект инхэм ащыщ, бизнесым ылъэныкъокIэ амалышIухэри ащ къетых. Компаниеу Оzоn-р промышленнэ паркым иапэрэ резидентэу хъугъэ», — къыIуагъ КъумпIыл Мурат.
Адыгеим и ЛIышъхьэ къызэрэхигъэщыгъэмкIэ, индустриальнэ паркым гугъэ­пIэ инхэр къетых, инвесторхэри нахьыбэу проектым хэлажьэхэ ашIоигъу. Компание заулэмэ къаIуагъ промышленнэ шъолъы­рым ирезидент хъухэмэ зэрашIоигъор ыкIи ащ зэрэфэхьазырхэр. КIэкIэу къэпIон хъумэ, республикэм иэкономикэ нахь хэхъонымкIэ Тэхъутэмыкъое районым щыIэ промышленнэ паркым гугъэпIэшIу­хэр къетых. Джырэ экономикэ амалхэу щыIэхэм уакъыпкъырыкIын хъумэ, индустриальнэ шъолъырхэм зягъэушъомбгъу­гъэныр Урысыем и Президентэу Владимир Путиным къыгъэуцугъэ пшъэрылъхэу хэгъэгум ипромышленность хэхъоныгъэ егъэшIыгъэным фытегъэпсыхьа­гъэу щытхэм ащыщ.
АР-м и ЛIышъхьэ ипресс-къулыкъу къытырэ
къэбархэмкIэ Тхьаркъохъо Сафыет