Автобуси 7-мэ яIункIыбзэхэр гъэсэныгъэмкIэ район гъэIо­ры­шIапIэхэм ыкIи еджапIэхэм ялIыкIохэм Мыекъуапэ къа­щаратыжьыгъэх. Адыгеим и ЛIышъхьэу КъумпIыл Мурат пшъэрылъ зэрафишIыгъэм тетэу Iофтхьабзэр зэращагъ АР-м иминистрэхэм я Ка­бинет и Тхьаматэ игуадзэу, финансхэмкIэ иминистрэу Виктор Орловымрэ Адыгеим гъэсэныгъэмрэ шIэныгъэмрэкIэ иминистрэу Евгений Лебедевымрэ.

ПсэупIэхэу Гавердовскэм, Дондуковскэм, Вольнэм, Красногвардейскэм, Бжъэдыгъухьаблэ, Пэнэжьыкъуае, Шевченкэм адэт гурыт еджапIэхэм атобус зырыз аIукIагъ. Нэбгырэ 1622-мэ ателъы­тэгъэ ГАЗ-хэр, нэбгырэ 3134-мэ ателъы­тэгъэ ПАЗ-хэмрэ КАВЗ-хэмрэ ахэм афагощыгъэх.
(ИкIэух).
Гурыт еджапIэхэм яавтопаркэу агъэ­кIэжьыгъэр джырэ шапхъэхэм адештэ, видеокамерэхэр арыт, ГЛОНАСС системэр ащыгъэфедагъ. КIэлэцIыкIухэр щынэгъончъэу зещэгъэнхэмкIэ ищыкIэгъэ амалхэр автобусыкIэхэм яIэх.
Виктор Орловым зэрэхигъэунэфыкIыгъэмкIэ, Урысыем и Правительствэ ышIыгъэ унашъом диштэу автотранспортыр республикэм къащэ. Федеральнэ гупчэм иIэпыIэгъу ишIуагъэкIэ Адыгеим игурыт еджапIэхэм яавтопарк икъоу агъэкIэжьыгъ. 2016-рэ илъэсым къыщегъэжьагъэу 2024-м нэс республикэм автобуси 121-рэ къыIэкIэхьагъ. Гурыт еджапIэхэм яIэхэм бэмышIэу автобуси 7 джыри къахэхъуагъ. Гъэсэныгъэ языгъэгъотырэ еджэпIэ пстэуми яIэгъо-благъохэм икIэрыкIэу гъогухэр ащагъэтхъы­жьыгъэх. МыщкIэ пшъэрылъ шъхьаIэхэр къоджэдэс кIэлэеджакIохэр щынэгъончъэу еджапIэхэм анэгъэсыгъэнхэр ыкIи ядэжь къэщэжьыгъэнхэр, джащ фэдэу цIыфхэр жъугъэу зыхэлэжьэрэ Iофтхьабзэхэр зыщыкIорэ чIыпIэхэм еджакIохэр щынэгъончъэу анэгъэсыгъэнхэр ары.
Iофтхьабзэм зэрэщыхагъэунэфыкIы­гъэмкIэ, гъэсэныгъэмкIэ инфраструктурэр нахьышIоу зэтегъэпсыхьэгъэнымкIэ Iофы­шхо республикэм щызэшIуахы. Iоны­гъом и 1-м ехъулIэу еджэпIи 3 къызэIуахыгъ. Мы аужырэ илъэси 6-м гурыт еджэпIи 10 Адыгеим щагъэпсыгъ. ЕджэпIи 9-мэ игъэкIотыгъэу гъэцэкIэжьынхэр арашIылIагъэх мы аужырэ илъэситIум еджэпIэ 20 джырэ шапхъэхэм адиштэу зэтырагъэ­псыхьагъ. Гъэсэныгъэ тедзэ язы­гъэ­гъотырэ еджапIэхэм аужырэ илъэси 4-м чIыпIакIэу мин 27-рэ яIэ хъугъэ.
Урысыем и Президентэу Владимир Путиным иунашъокIэ мыгъэ къыщегъэ­жьагъэу кIэлэцIыкIу IыгъыпIэхэм ягъэцэкIэжьын хэгъэгум щыфежьагъэх. Джыдэдэм Мыекъопэ кIэлэцIыкIу Iыгъы­пIэу N 6-мрэ Адыгэкъалэ дэт кIэлэцIыкIу IыгъыпIэу «Жъогъобынымрэ» гъэцэкIэжьын IофшIэнхэр ащэкIох. Къуа­джэхэм зэдиштэу хэхъоныгъэ зэрарагъэшIырэ программэм къызэрэдилъы­тэрэм тетэу къуаджэу Хьакурынэхьаблэ икIэлэцIыкIу IыгъыпIэу «Насыпри» зэтырагъэпсыхьащт.