Мы мафэхэм апэрэ Урысые мэкъумэщ диктант зэхащагъ. Урысые Феде­рацием ишъолъырхэр зэкIэ зыхэлэжьэгъэхэ про­ект инэу ар щыт. Ащ зыщаушэтыгъ къэ­ралыгъо хабзэм икъу­лы­къухэм, гъэсэныгъэ организациехэм, пред­приятие инхэм ялIыкIохэм.

Проектым Адыгеир чанэу хэлэжьагъ, республикэм иэкономикэ хэхъоныгъэхэр ышIынхэмкIэ мэкъумэщыр лъэныкъо шъхьаIэхэм ащыщ. Шъолъырым къыщахьыжьырэ продукцием ипроценти 10,8-рэ, къыдагъэкIыжьырэм ипроцент 12,7-рэ ар мэхъу. 2025-рэ илъэсым фышъхьэ лэжьыгъэу къахьыжьыгъэм елъытыгъэу Урысые Федерацием ишъо­лъырхэм азыфагу Адыгеим ятIонэрэ чIыпIэр щиубытыгъ.
АР-м и Къэралыгъо Совет — Хасэм и Тхьаматэу Владимир Нарожнэр, депутатхэр, Адыгеим мэкъу-мэщымкIэ и Министерствэ илIыкIохэр ыкIи нэмыкIыхэр Урысые мэкъумэщ диктантым хэлэжьагъэх, зэкIэмкIи чIыпIэ 43-мэ ащатхыгъ.
КъэкIыхэрэм якъэухъумэн, чIышъхьашъом изэгъэшIэн, псы кIэгъэхъоным, органическэ чIыгулэжьыным, фермерствэм, мэкъумэщ зекIоным, пцэжъые хъызмэтым, гъомылэпхъэ зэфэшъхьафхэм якъыдэгъэкIын, нэмыкIхэм афэгъэхьыгъэ лъэныкъохэр диктантым хэтыгъэх. ЗэкIэмкIи упчIэ 30 аратыгъ, джэуапхэр такъикъ 45-кIэ къаратыжьынхэ фэягъ.
Диктантым хэлэжьагъэхэм зэкIэми сертификатхэр афагъэшъошэщтых, текIоныгъэр къыдэзыхыхэрэр дипломхэмкIэ къыхагъэщыщтых. Федеральнэ партийнэ проектэу «Урысые къуаджэр» зыфиIорэм къыдыхэлъытагъэу, УФ-м мэкъу-мэщымкIэ и Министерствэ яIэпыIэгъоу ар зэхащагъ ыкIи илъэс къэс рагъэкIокIынэу агъэнафэ.