Шэуджэн районым ит къуаджэу Къэбыхьаблэ щыщ Дыхтан Амир телекомпаниеу НТВ-м зэхищэгъэ зэнэкъокъоу «Ты супер!» зыфиIорэм хэлэжьагъ. Федеральнэ телеканалым ипроект Сергей Лазаревым иорэдэу «Даже если ты уйдешь» зыфиIорэр къыщиIуагъ.

Дыхтан Амир къалэу Анапэ къыщы­хъугъ. Ятэ 2017-рэ илъэсым идунай ыхъожьыгъ. Амиррэ ышэу Эдуардрэ янэ къыIахыхи, ибэхэр зыщапIурэ интернатым ратыгъэх. Джащ къыщыублагъэу ныр икIэлитIу къакIэупчIэжьыгъэп. 2020-рэ илъэсым зэшитIум янасып къыхьи къуаджэу Къэбыхьаблэ щыпсэурэ Куры­жъо Асият Тыркубый ыпхъум ыпIунхэу къаIихыгъэх. ЩыIэныгъэм ахэм къины­шхоу щызэпачыгъэр къагурыIозэ Ку­рыжъо­хэм яунагъо кIэлэцIыкIухэм дахэу апэгъокIыгъ. КIалэхэр щыкIагъи гумэкIыгъуи ямыIэу лэжьэкIо унэгъо зэкIу­жьым щэпсэух.
А кIэлэцIыкIухэмрэ ежьхэм ялъфыгъэ­хэмрэ зэгурыIоныгъэ азыфагу илъ. ЩыIэныгъэ гъогур зэрифэшъуашэу къэп­кIун зэрэплъэкIыщтым Амиррэ Эдуардрэ фагъасэх. ЦIыфыгъэ ахэлъэу, IофшIэным аIэ екIоу, ячIыгу шIу алъэгъоу ны-тыхэм апIух, унагъом уасэ фашIыным фащэх. КIэлэцIыкIухэм ягъэхъагъэхэм Курыжъо­хэр арэгушхох.
— Илъэсищ хъугъэу Амиррэ Эдуардрэ тиунагъо щэпсэух. Амир кIэлэ гъэшIэгъон, акъылышIу, епIорэр псынкIэу къыгу­рэIо. Къэбыхьаблэрэ Хьатыгъужъыкъуаерэ адэт культурэм иунэхэм ащылэжьэрэ кружокхэм макIо. Цуамыкъо Мариет орэд къэIоным, Быщтэкъо Адам Iэмэ-псымэу доулэм теоным фагъасэ. Ащ нэмыкIэу дзюдор ыкIи футболыр ыгу рехьых. Нахь игъэкIотыгъэу къыдэлэ­жьэнхэм пае Хьакурынэхьаблэ дэт музыкальнэ еджапIэм чIэдгъэхьагъ. КIэлэегъаджэу Хъымыщэкъо Эммэ орэдкъэIонымкIэ Iоф къыдешIэ, фестивалэу «Адыгеим ижъогъожъыехэм» апэрэ чIыпIэр къыщихьыгъ. Лъэшэу тигъэгу­шIуагъ «Ты супер!» зыфиIорэ зэнэкъо­къум зэрэхэлэжьагъэм. Амир лъэшэу сырэгушхо, ащ игъэхъагъэхэм ахигъэ­хъоным тыпылъыщт. Сабыим нахь тхъа­гъо зи щыIэп. ТикIэлэцIыкIухэр ары тищыIэныгъэ тфэзыгъэдахэрэр, ткIуачIэ къезыгъэблырэр, къиныгъохэр зэпытэзыгъэчыхэрэр, лъапсэ уиIэмэ, шъхьапэ зэрэуиIэщтыр зэхэтэзыгъашIэхэрэр, — къыIуагъ Курыжъо Асият.
Москва щызэхащэрэ зэнэкъокъоу «Ты супер!» зыфиIорэм Хъымыщэкъо Эммэ Амир орэд къызэриIорэр ригъэхьыгъ, ар Игорь Крутоим ыгу рихьи, Iофтхьаб­зэм рагъэблэгъагъ. ШышъхьэIум кIэлэ­егъа­джэмрэ орэдыIо ныбжьыкIэмрэ проектым хэлэжьагъэх. Амир ныбджэгъубэ нэIуасэ къышIыгъ, орэдкъэIоным фэгъэхьыгъэ шIэныгъакIэхэр зэригъэгъотыгъ.
— Дыхтан Амир сэнаущыгъэшхо зы­хэлъ орэдыIо ныбжьыкI, ащ зыкъызэIуи­хыным сиIахьышIу хэлъэу сэлъы­тэ. Илъэси 10 ыныбжьэу садэжь къэкIонэу ыублагъ. ИлъэсиплIым дунэе, шъолъыр зэнэкъокъубэмэ тахэлэжьагъ, апэрэ чIыпIэхэр къэтхьыгъэх. Проектэу «Ты, супер!» зыфиIорэм пылъ шапхъэхэм къадыхэлъытагъэу орэд 14 Амир зэригъэшIэн фаеу къытфырагъэ­хьыгъ. МэфитфыкIэ джащ фэдизыр зэдгъэшIагъ, онлайн шIыкIэм тетэу ахэм ащыщ орэдищ къырагъэ­Iуагъ. Зызэрыдгъэхьазырыгъэр лъэшэу агу рихьыгъ. НТВ-м къикIыхи, видеосюжет Къэбыхьаблэ щытырахыгъ. Ащ ыужкIэ Амиррэ сэррэ Москва тызэдакIуи, мазэрэ тыкъэтыгъ. ОрэдыIо цIэрыIохэр, вокалымкIэ кIэлэегъэджэ IэпэIасэхэр къыддэлэжьагъэх. Амир сце­нэм зыкъызэрыщигъэлъэгъуагъэр лъэшэу сыгу рихьыгъ. Сергей Лазаревым къыIорэ «Даже если ты уйдешь» зыфиIорэр мэкъэ лъэшкIэ ыгъэжъынчыгъ. ОсэшI купым хэсыгъэхэ Игорь Крутоим, Алсу, Диана Арбенинам ыкIи Стас Ярушиным орэдыр къымыухызэ зыкъызэрагъэзэкIыгъ ыкIи пхырагъэкIыгъ. Ау нэужым финалныкъом ихьашъугъэп. Арэу щытми, Къэбыхьаблэ икIыгъэ кIэлэцIыкIум федеральнэ каналым зыкъызэрэщигъэлъэгъуа­гъэр текIоныгъэу сэлъытэ. Зы лъэгапIэм адрэр къыкIэлъэкIо, арышъ, Амир ыцIэ джыри мымакIэу Iунэу сыщэгугъы, — къыIуагъ Хъымыщэкъо Эммэ.
— КъызщысшIэжьрэм орэд мэкъамэр сыгу еIукIы. Орэдым фэбагъэу хэлъым къарыу къысеты, щыIэныгъэм щысигъус. ЧIыпIэ къинэу сызэрыфагъэхэм орэдым сыгу ыгъэIэсагъ ыкIи къыздеIагъ. СикIэ­лэегъаджэу Эмма Аслъан ыпхъум лъэшэу сыфэраз. Мы зэнэкъокъур сэркIэ насыпыгъ. Федеральнэ сценэм сытетэу орэд къызэрэсIуагъэм гушхоныгъэ къыситыгъ, сыфэраз сызыпIурэ сянэу Асе, ащ къарыу къысеты. АцIэ къесIомэ сшIоигъу IэпыIэгъу къысфэхъухэрэ ЦуукI Заремэ, ЛъэпцIэрыкъо Фатимэ, Жарэкъо Аидэ. ОрэдыIо цIэрыIо сыхъуным сыщэгугъы, — еIо Амир.
Амир лъэшэу ыгу рехьых Ани Лорак, Сергей Безруковыр ыкIи Олег Газмановыр, аужырэм иорэдэу «Мама» зыфиIорэр къыдиIомэ шIоигъу.

Лъэпшъыкъо Фатим.