Къэралыгъо программэу «Гастроль инхэр» зыфиIорэм къыдыхэлъытагъэу Къэбэртэе-Бэлъкъар Республикэм имузыкальнэ театрэ идэкIыгъо къэгъэлъэгъонхэр Мыекъуапэ щыкIуагъэх. Ткъош шъолъырым иартистхэм кIэлэцIыкIухэм ыкIи нахьыжъхэм апае спектаклэхэр мэфищрэ къагъэлъэгъуагъэх.

УФ-м культурэмкIэ и Министерствэ «Гастроль инхэр» зыфиIорэ программэу зэхигъэуцуагъэм культурэм хэхъоныгъэ ышIынымкIэ цIыфхэр, лъэпкъхэр нахь зэрэшIэнхэмкIэ мэхьанэшхо иI. Ащ хэщагъэхэу ежьхэм творческэ кIуачIэу яIэр амыгъэхьаулыеу зыкъагъэлъэгъон, зарагъэшIэн амалхэр къазэрэритырэм ишIогъэшхэ къэкIо.
Федеральнэ программэм диштэу тхьамэфитIукIэ узэкIэIэбэжьмэ мыщ фэдэ дэкIыгъо къэгъэлъэгъонхэр Адыгеим и Камернэ музыкальнэ театрэ Налщык щызэхищэгъагъ.
— Адыгеир театральнэ шъолъырэу, Мыекъуапэ театральнэ къалэу зэрэщытыр тигуапэу хэдгъэунэфыкIыгъ. КъБР-м тыкъикIи ткъош Адыгеим тыкъызэрыкIуа­гъэр лъэшэу тигуапэ. Адыгеим и Камернэ музыкальнэ театрэ бэмышIэу тадэжь щыIагъ. Андрей Семеновыр зыдэлэжьэгъэ спектаклэу «Ослепленные» зыфиIорэр ащ еплъыгъэхэм агу хэп­кIагъ. Джы ащ дакIоу тэ тикъэгъэлъэгъонхэр къышъуфэтщагъэх, — къыIуагъ КъБР-м и Къэралыгъо музыкальнэ театрэ ирежиссер шъхьаIэу Дэбэгъо Роман.
ГастрольхэмкIэ зэхъожьхэзэ, шъолъыр­хэм ятеатрэхэм ятворчествэ зырагъэу­шъомбгъу.
ДэкIыгъо IофшIэным изэфэхьысыжьхэм афэгъэхьыгъэу гущыIэгъу тыфэ­хъугъ театрэм ихудожественнэ пащэу, Уры­сыем, Адыгеим искусствэхэмкIэ язаслуженнэ IофышIэшхоу Юныс Сулеймановым.
— Шъолъырхэм тызэхъожьзэ къащыдгъэлъэгъорэ къэгъэлъэгъонхэм мэхьанэшхо яI. Тиартистхэр нэIуасэ зэфэхъух, зэрэшIэх, шIэныгъакIэхэмкIэ зэхъожьых, — къыIуагъ ащ.
ДэкIыгъо къэгъэлъэгъонхэр мюзиклэу «Снежная королева» зыфиIорэмкIэ къызэIуахыгъэх. Андерсен ипшысэ ар техыгъэу режиссерэу Джанбулат Габибовым ыгъэуцугъ. КIэлэцIыкIухэм ар нахь ашIогъэшIэгъон зэрэхъущтым артист пэпчъ лъэкIэу иIэр рихьылIагъ.
КъБР-м изаслуженнэ артисткэу Ирина Калабековам ныжъым ироль къешIы. Ащ зэрилъытэрэмкIэ, лъэпкъэу зыщыщ­хэм емылъытыгъэу ныжъхэр зэкIэ гушъабэхэу, яшэнкIэ зэфэдэхэу щытых. Ащ къыхэкIэу ежь ролыр пэблагъэ зэрэхъугъэр къыIуагъ.
— Театрэм цIыфыр епIу, а гупшысэр зыпхырыщыгъэ къэгъэлъэгъонхэр тирепертуар мымакIэу хэтых. Илъэсыбэм титеатрэ Iофэу ышIагъэм ар къаушыхьаты. КIэм жъыр зэригъэшIон фаер тиIоф­шIагъэхэм апхырэтэщы. Ныжъхэр кIэлэцIыкIухэм шIу зэралъэгъухэрэр пшысэм къегъэлъагъо, — къыIуагъ актрисэм.
Театрэхэм яартистхэр нэIуасэ зэрэзэфэхъухэрэм дакIоу творческэ зэпхыныгъэхэри агъэпытэх. Ащ ищыс Адыгеимрэ Къэбэртэе-Бэлъкъарымрэ ятеатрэхэм спектаклэ зэдагъэуцунэу зэрагъэнафэрэр.
КъБР-м имузыкальнэ театрэ игастрольхэр Адыгеим щыпсэурэ цIыфхэм шIукIэ агу къинэжьыщт.

Лъэпшъыкъо Фатим.