2025-рэ илъэсым фышъхьэ лэжьыгъэу къахьыжьыгъэм елъытыгъэу Урысые Федерацием ишъолъырхэм азыфагу Адыгеим ятIонэрэ чIыпIэр щиубытыгъ. Мэкъумэщ-къыдэгъэкIыжьын къэгъэлъэгъонэу «Бжыхьэ дышъэр» зыфиIоу Москва щыкIуагъэм икIэуххэмкIэ ащ фэгъэхьыгъэу къыIуагъ Адыгеим и ЛIышъхьэу КъумпIыл Мурат.

КъумпIыл Мурат къызэрэхигъэщыгъэм­кIэ, гурытымкIэ зы гектарым центнер 57,5-рэ республикэм къыщырахыжьыгъ чIыопсым изытет гумэкIыгъохэр къыздихьыгъагъэхэ нахь мышIэми. Джырэ уахътэм диштэрэ амалхэр зэрагъэфедагъэхэм, а лъэныкъом ренэу IэпыIэгъу зэрэфэхъугъэхэм, чIыгулэжьхэм Iоф­шIэнэу агъэцэкIагъэм ар къакIэкIуагъ.
Мы илъэсым бжыхьасэхэр гектар мини 108-рэ фэдизым щарапхъыгъэх. ПэшIорыгъэшъэу къызэрэрадзагъэмкIэ, зэхэубытагъэу Iуахыжьыгъэ бжыхьасэхэр тонн мин 543-рэ фэдиз мэхъух, илъэсэу икIыгъэм елъытыгъэмэ, процент 20-кIэ ар нахьыб. Бжыхьэсэ рапсэу къахьыжьыгъэр тонн мин 29,5-рэ, илъэсэу икIы­гъэм елъытыгъэмэ, ар процент 72,5-кIэ нахьыб, бжыхьэсэ хьэу тонн мин 42,6-рэ аIожьыгъ, гъэрекIорэм ар шIокIы.

Губгъо IофшIэнхэр лъэкIуатэх. ХэтэрыкIхэм яIухыжьын республикэм ыкIэм щыфэкIо. Ащ дакIоу къихьащт илъэсым Iуахыжьыщт бжыхьасэхэр апхъых. ЗэкIэмкIи чIыгу гектар 110751-м чы­лапхъэхэр рапхъыщтых, ащ щыщэу фышъхьэ лэжьыгъэхэр — гектар 97305-м, зыдэлэжьагъэхэр гектар 19650-рэ мэхъу, агъэнэфагъэм ар ипроцент 20-м нэсы. Бжыхьэсэ рапсым ипхъын аухыгъ. Ащ гектар 13361-рэ ыубытыгъ.

Республикэм и ЛIышъхьэ къызэрэхигъэщыгъэмкIэ, гъомылапхъэм ищынэгъон­чъагъэ гъэпытэгъэнымкIэ ыкIи мэкъу-мэщым шIуагъэу къытырэм зыкъегъэIэтыгъэнымкIэ шъолъырым Iофтхьабзэхэр лъигъэкIотэщтых, ащкIэ Урысые Федерацием и Правительствэ ишIуагъэ къаригъэкIыщт. Лъэпкъ проектыкIэу «Гъомылапхъэр щынэгъончъэным ишIыкIэхэр анэгъэсыгъэнхэр» зыфиIорэм къыдыхэлъытагъэу ар щыт.
Пшъэрылъыр республикэмрэ хэгъэгум­рэ ащыпсэухэрэм гъомылэпхъэ дэгъур зыпкъ итэу аIэкIэгъэхьэгъэныр ары.