Мы мафэр — мэфэкIэп, гукъаом итамыгъэу щыт ыкIи зипсауныгъэ амал зэщыкъуагъэхэм IэпыIэгъу афэхъугъэным фэIорышIэ. «Бэщ фыжьыр» зынэ ымылъэгъухэрэм ятамыгъэ къодыеп, мыр яIэмэ-псым, анэхэм ачIыпI. Илъэс къэс, хабзэ зэрэхъугъэу, чъэпыогъум и 15-м къыщегъэжьагъэу шэкIогъум и 15-м нэс зынэ ымылъэгъухэрэр зыхэлэжьэрэ Iофтхьабзэхэр рагъэкIокIых.

Ахэм япшъэрылъ шъхьаIэр дунэе нэфым идэхагъэ зымылъэгъухэрэ хьафизэхэм яIофыгъохэм общественностым ынаIэ атыридзэныр ыкIи ящыкIэгъэ IэпыIэгъур аригъэгъотыныр ары.
Псауныгъэр къэухъумэгъэнымкIэ Дунэе организацием къызэритырэмкIэ, хьафизэ ыкIи дэеу зылъэгъурэ нэбгырэ миллиарди 2,2-рэ фэдиз дунаим щэпсэу. Ахэм япроцент 80-м аныбжь илъэс 50-м шIокIыгъ. Хьафизэхэм я Урысые обществэ и Адыгэ республикэ организацие итхьаматэу Алексей Хлоповым къызэриIуа­гъэмкIэ, шъолъырым зымылъэгъурэ нэбгырэ 930-рэ фэдиз, къэлэ шъхьаIэм иучет 350-м ехъу ащэпсэу.
Къыхэгъэщыгъэн фае хьафизэхэм я Урысые обществэ ежь-ежьырэу зызыIыгъыжьырэ организациехэм зэращыщыр. Ащ епхыгъэу амалэу иIэмкIэ хэкIыпIэхэр къегъотых. Тишъолъыр организацие ыгъэ­хьазырыгъэ программэу «Адыгея и ВОС — гуманность, доступность, результат» зыфиIорэм текIоныгъэ къыдихыгъ ыкIи грантэу сомэ миллион 1,5-рэ фэдиз къыратыгъ. Ащ ипхырыщын аублэгъах: хьафизэхэм ячIыпIэ организациехэм япащэхэм семинар яIагъ, зэрамылъэгъу­рэмкIэ сэкъатныгъэ къызэратыгъакIэхэм апэрэу Iоф адашIагъ, народнэ хорэу «Русская песня» зыфиIорэм иконцертэу Геленджик щыкIуагъэм хэлэжьагъэх.
Джащ фэдэу тигущыIэгъу къызэрэхигъэщыгъэмкIэ, мыр яплIэнэрэ грантэу къырахыгъ ыкIи ащ рэгушхох. Программэм къыдыхэлъытагъэх зымылъэгъухэрэр, зипсауныгъэ амалхэр зэщыкъуагъэхэр социальнэу щыIэныгъэм хэгъэгъозэгъэнхэр, творческэ ыкIи спорт сэнаущыгъэу ахэлъхэм зарагъэушъомбгъуныр.
— Къыхэзгъэщымэ сшIоигъу АР-м и ЛIышъхьэу КъумпIыл Мурат хьафизэхэм ыкIи дэеу зылъэгъухэрэм яфэIо-фашIэхэр гъэцэкIэгъэнхэм, ягумэкIыгъохэр дэгъэзыжьыгъэнхэм лъэшэу ынаIэ зэрэтетыр. Джащ фэдэу республикэм ихэбзэ къулыкъухэм ялIыкIохэр къыткъотхэу ятхьылIэрэ лъэIухэр къытфагъэцакIэх. Мы мафэм ипэгъокIэу хьафизэхэм яреспубликэ ыкIи якъэлэ организациехэм ахэтхэр Мыекъопэ къэлэ администрацием ипащэу Геннадий Митрофановым IукIагъэх. Социальнэ Iофтхьабзэу «Бэщ фыжьыр» Адыгеим икъэлэ шъхьаIэ зэрэщызэхащэщтым, зымылъэгъухэрэр псэупIэ кIоцIым зэрэщызекIощтхэм, зипсауныгъэ амалхэр зэщыкъуагъэхэм атегъэпсыхьагъэу социальнэ инфраструктурэм ипсэуалъэхэр Iэрыфэгъоу щытынхэм татегущыIагъ. Хьафизэхэр нахьыбэу зыщыпсэухэрэ Мыекъуапэ щыIэ лъэсрыкIо гъогухэр дэгъоу къызэрэтфызэтырагъэ­псыхьагъэхэмкIэ, Iофтхьабзэхэр зэхэт­щэнхэмкIэ транспорт къызэрэтфыхагъэ­кIырэмкIэ администрацием тызэрэфэразэр етIуагъ. Джащ фэдэу зэIукIэгъум щыдгъэнэфагъ «Бэщ фыжьым» ыкIи ВОС-м июбилей афэгъэхьыгъэ Iофтхьабзэр культурэм и Унэу «Гигантым» шэкIогъум и 13-м сыхьатыр 2-м щызэхэтщэнэу, — хигъэунэфыкIыгъ Алексей Хлоповым.
— Зипсауныгъэ амалхэр зэщыкъогъэ цIыфхэм IэпыIэгъу афэхъугъэныр хабзэм ыкIи обществэм япшъэрылъ шъхьаIэх. Сэкъатныгъэ зиIэхэм тынаIэ зэратетыр, тызэрафэгумэкIырэр зэхядгъэшIэныр, якъэлэ гупсэ Iэрыфэгъоу щызекIонхэ амал ядгъэгъотыныр тимурад, — къы­Iуагъ Геннадий Митрофановым.
«Бэщ фыжьым» и Мафэ къыдыхэлъы­тагъэу, мэзэ реным зэIукIэгъухэр, лекциехэр, семинархэр, творческэ фестивальхэр, спорт зэнэкъокъухэр респуб­ликэм щырекIокIыщтых.
Iэшъынэ Сусан.