Зыныбжь хэкIотагъэхэм я Дунэе мафэ ыкIи «Бэщ фыжьым» имазэу къихьэрэм къадыхэлъытагъэу, хьафизэхэм я Урысые обществэ и Адыгэ республикэ организацие иапэрэ тхьамэтагъэу ыкIи ветеранэу Петр Лаврентьевым фэгушIуагъэх.

Ащ ыдэжь еблэгъагъэх хьафизэхэм я Адыгэ республикэ организацие итхьаматэу Алексей Хлоповыр ыкIи иветеранхэм я Совет итхьаматэу Татьяна Хурс. 2025-рэ илъэсым хьафизэхэм я Урысые обществэ (ВОС) илъэси 100 зэрэхъугъэм фэгъэхьыгъэ юбилейнэ тыжьын ахъщэ жъгъэеу къыдагъэкIы­гъэр шIухьафтынэу нахьыжъ лъапIэм ратыгъ, псауныгъэ пытэрэ, гъэшIэ кIыхьэрэ иIэнхэу фэлъэIуагъэх.
Ежь Петр Константин ыкъоми гущыIэ фабэхэр къапигъохыгъэх, зэрагъэлъэпIагъэр зэригуапэр къыхигъэщыгъ.
— Хьафизэхэм яшъолъыр организацие зыныбжь хэкIотагъэхэм ынаIэ къызэрэттетыр, тифэныкъуагъэхэр къызэрилъэгъухэрэр сигуапэ, ащкIэ сыфэраз. Джащ фэдэу хьафизэхэм я Урысые обществэ игугъу къэсшIымэ, илъэс зэкIэлъыкIохэм ащ гъогу тэрэз къыхихыгъэу, къиныгъо­хэр зэпичыхэзэ ыпэкIэ лъэкIуатэ, сэ­къатныгъэ зиIэхэм яфэIо-фашIэхэр гъэ­цэкIэгъэнхэмкIэ хэкIыпIэхэр къегъотых. Тиорганизацие обществэм зэпхыныгъэ ыкIи зыкIыныгъэ дыриIэу иIофшIэн зэригъэцакIэрэр къыхэсымыгъэщын слъэкIыщтэп, тапэкIи джаущтэу лъыкIотэнэу фэсэIо, — къыIуагъ Петр Лаврентьевым.