КаратэмкIэ дунаим ичемпионатрэ ипервенствэрэ къалэу Новочебоксарскэ (Чуваш Республикэм) щыкIуагъэх. УФ-м спортымкIэ и Министерствэрэ каратэмкIэ Дунэе Федерациемрэ Iофтхьабзэм кIэщакIо фэхъугъэх.

Къэралыгъо 29-мэ яспортсмен 3700-м ехъу зэнэкъокъугъэх. Урысыем ихэшыпыкIыгъэ командэ хэтыгъэх Адыгеим щыщ нэбгырэ 13. Тренерхэу Владимир Васильченкэм, Лъэустэнджэл Амир ыкIи Никита Попругиным агъэсэрэ кIалэхэм гъэхъэгъэшIу­хэр ашIыгъэх. Ахэм дышъэ медали 2, тыжьынэу — 4 ыкIи зы джэрз къахьыгъэх. ТекIоныгъэр къы­дахыгъ Егор Христофоровым­рэ Дмитрий Петренкэмрэ. ЯтIо­нэрэ чIыпIэр къафагъэшъошагъ Пакохэу Самиррэ Астемиррэ, джащ фэдэу Ярослав Грищен­кэмрэ Богдан Пастернакрэ. Никита Макаровыр ящэнэрэ хъугъэ.
Мы зэнэкъокъухэм ахэлэжьэнхэмкIэ IэпыIэгъу къафэхъугъэхэ АР-м и Правительствэрэ Ады­геим физическэ культурэмкIэ ыкIи спортымкIэ и Комитетрэ тикIалэ­хэмрэ ахэр зыгъасэхэрэмрэ афэразэх.