АР-м IофшIэнымкIэ ыкIи социальнэ хэхъоныгъэмкIэ и Министерствэ кIэщакIо зыфэхъугъэ Iофтхьабзэу социальнэ зэзэгъыныгъэмкIэ апэрэ Республикэ фестивалэу «ГугъапIэм имаф» зыфиIорэр тхьаумафэм Мыекъуапэ икъэлэ парк щыкIуагъ.

Адыгеим ирайонхэм къарыкIыгъэхэу социальнэ зэзэгъыныгъэмкIэ къэралыгъо программэм нахь чанэу зыкъыщызгъэлъэгъогъэ нэбгырэ 52-рэ ащ хэлэжьагъ. Ахэм яIэшIагъэхэр фестивалым къыщагъэлъэгъуагъэх, мы чIыпIэм цIыфыбэ къыщызэрэугъоигъагъ.
Iофтхьабзэм хэлэжьагъэх Адыгэ Рес­публикэм иминистрэхэм я Кабинет и Тхьаматэ игуадзэу Виктор Орловыр, муниципальнэ псэупIэхэм ялIыкIохэр, предпринимательхэр.

АР-м и ЛIышъхьэу КъумпIыл Мурат ыцIэкIэ Iофтхьабзэм хэлажьэхэрэм шIуфэс гущыIэхэмкIэ закъыфигъэзагъ Виктор Орловым. Ащ къызэриIуагъэмкIэ, къэралыгъо программэу социальнэ зэзэгъыныгъэр гъот макIэ зиIэхэу ыкIи унагъохэу чIыпIэ къин ифагъэхэм ахъщэ IэпыIэгъу афэхъугъэным фэIорышIэ. ЦIыфхэм IофшIапIэ къагъотынымкIэ, ашъхьэ фэлэжьэжьынхэмкIэ, унэе хъыз­мэт агъэпсынымкIэ, нэмыкIхэмкIи Iэпы­IэгъушIоу щыт. Адыгеим мы программэм Iоф зыщишIэрэм къыщыублагъэу илъэситфым къыкIоцI нэбгырэ мини 4-м ехъумэ социальнэ зэзэгъыныгъэр къыз­фагъэфедагъ. Ахъщэ IэпыIэгъоу аратырэр федеральнэ бюджетым къафетIупщы ыкIи илъэс къэс ащ хэхъо. ГущыIэм пае, 2024-рэ илъэсым а пчъагъэр сомэ миллиони 160-рэ хъущтыгъэмэ, мыгъэ сомэ миллион 70-кIэ нахьыбэ хъугъэ. ТапэкIи ащ зэрэхагъэхъощтым пылъыщтых.

— Мы IофтхьабзэмкIэ пшъэрылъэу зыфэдгъэуцужьырэр социальнэ IэпыIэгъу зэрэщыIэр зэлъядгъэшIэныр, нахьыбэу ащ цIыфхэр къыхэ­гъэ­лэжьэгъэнхэр, ягухэлъхэр къа­дэхъунхэмкIэ IэпыIэгъу тафэхъуныр ары. Иунэе Iоф езыгъажьэ ыкIи тишъолъыр иэкономикэ федэ къы­фэзыхьы зышIоигъохэмкIэ мы зэзэгъыныгъэр амалышIоу щыт. Апэрэ Респуб­ликэ фестивалым къед­гъэблэгъагъэх ахъщэ IэпыIэ­гъур шIуагъэ къытэу къыз­фэзыгъэфедагъэхэу, федэ къахьызэ чанэу Iоф зышIэхэрэр. Программэм хэлэжьэнэу гу тезымышIыхьэхэрэм нэрылъэгъу афэтшIыгъ ар IэпыIэгъоу ыкIи федэкъэкIуапIэу зэрэщытыр. Лъэныкъоу ыкIи гухэлъэу щыIэр бэ, ахэр зыфэдэхэр цIыфхэм ядгъэшIэн фае. Анахьэу гъот макIэ зиIэхэу ыкIи унагъо­хэу чIыпIэ къин ифагъэхэр унэм исхэу ашъхьэ фэлэжьэжьынхэмкIэ ахъщэ Iэ­пыIэ­гъум ишIогъэшхо къякIы. Мы программэм Iоф зишIэрэ илъэситфым социальнэ зэзэгъыныгъэм ипрограммэ къыдыхэлъытагъэу сомэ миллион 750-м ехъу ахъщэ IэпыIэгъур цIыфхэм яттыгъ. Мы илъэсыр къызихьагъэм къыщыублагъэу нэбгырэ 650-м ехъумэ IэпыIэгъу ядгъэгъотыгъ, мы илъэсым ыкIэм нэс джыри нэбгырэ 300-мэ яттынэу щыт. ЦIыфхэм ящыIэкIэ-псэукIэ на­хьышIу шIыгъэнымкIэ социальнэ зэзэгъыныгъэр амалышIоу щыт, ар щыIэныгъэм къызэрэщылъагъорэр тинэрылъэгъу, — къы­Iуагъ АР-м IофшIэнымкIэ ыкIи социальнэ хэхъоныгъэмкIэ иминистрэу Мыр­зэ Джанбэч.

ЗэкIэ республикэм ирайонхэм къарыкIыгъэхэр Iофтхьабзэм чанэу хэлэжьагъэх, предпринимательскэ IофшIэным илъэныкъо зэфэшъхьафхэмкIэ яIофшIагъэхэр мыщ къыщагъэлъэгъуагъэх. Фестивалым хьакIэу къекIолIагъэхэм тхьацум хэшIыкIыгъэ IэшIу-IушIухэр, лъэпкъ нэшанэ зиIэ хьап-щыпхэр, пхъэм хэшIыкIыгъэ пкъыгъо зэфэшъхьафхэр, лъэкъо­пылъхьэхэр зышIыхэрэм, нэмыкIыбэхэм яIэшIагъэхэм защагъэгъозагъ, шIоигъоныгъэ зиIэхэм ахэр къызIэкIагъэхьанхэ амал яIагъ.

Социальнэ зэзэгъыныгъэр шIуагъэ къытэу къызфэзыгъэфедагъэхэм ащыщ Тэхъутэмыкъуае щыщ Наукъо Руслъан. Ащ пхъэм хэшIыкIыгъэ пкъыгъо гъэшIэгъон ямышIыкIэхэр фестивалым къыщигъэлъэгъуагъ. Ащ къызэрэтфиIотагъэмкIэ, иныбжьыкIэгъум къыщегъэжьагъэу пхъэм Iоф дешIэ, ежь къыугупшысызэ унагъом щагъэфедэн алъэкIынэу пкъыгъо зэфэшъхьафхэр ешIых. Iоф зэришIэрэ Iэмэ- псымэхэр нахьыбэу къызIэкIигъэхьанхэм фэшI социальнэ зэзэгъыныгъэм хэлэ­жьэнэу мурад ышIыгъ ыкIи игухэлъ къы­дэхъугъ. АщкIэ социальнэ гупчэм иIофышIэхэм афэраз, ахъщэ IэпыIэгъур къыратыным фэшI тхылъхэм ягъэпсынкIэ IэпыIэгъушхо къыфэхъугъэх. Ахъщэу къыратыгъэмкIэ Iоф зэришIэщт Iэмэ-псымакIэхэр ыщэфыгъэх, ахэм яшIуагъэкIэ пхъэм хишIыкIыщтхэр нахь гъэшIэгъонэу къеугупшысых. Руслъан иIэпэIэсэныгъэ цIыфхэм зэлъашIагъэу ядэжь къакIохэзэ пхъэм хишIыкIыгъэ пкъыгъо гъэшIэгъонхэр ящагу дагъэуцонхэу е шIухьафтынэу аратынэу ащэфых. Ащ къызэриIуагъэмкIэ, чъыг лъэпкъхэу кIаир, чъыгаер, акацэр егъэфедэх, мэзым макIошъ, ахэр къещэх. Ахъщэ IэпыIэгъум ишIуагъэ къызэрекIыгъэр къыхегъэщы.

Джащ фэдэу Адыгэкъалэ къикIыгъэ Тхьагъэпсэу Мурат иIэшIагъэу адыгэ Iанэм ыкIи кушъэм бэхэр къыкIэупчIэщтыгъэх. Ащ къызэрэтфиIотагъэмкIэ, мы Iофым зыпылъыр тIэкIу шIагъэ. Социальнэ IэпыIэгъум ишIогъэшхо къекIыгъэу ыкIи иIоф лъыкIотагъэу къытиIуагъ, ахъщэу къыратыгъэмкIэ Iоф зэришIэщт Iэмэ-псымэхэр, пхъэр ыщэфыгъэх. Ищагу чIыпIэ хэхыгъэ щыриIэу ащ Iоф щешIэ, зыкъыфэзыгъазэхэрэм адыгэ Iанэр, кушъэр афешIы. ЗэкIэ ишIуагъэ къязыгъэкIыгъэхэм афэраз.
Кощхьаблэ щыщ Хьаткъо Щамсэт илъэсищ хъугъэу дэн-бзэным пылъ, ащ ыдыгъэ щыгъынхэр фестивалым къыщигъэлъэгъуагъэх. Унэм дапIэ къыщызэIуи­хыгъэу ащ Iоф щешIэ. Социальнэ IэпыIэгъур зэрэщыIэр зешIэм, лъэшэу гушIуагъэ ыкIи ищыкIэгъэ тхылъхэр зэкIэ ыгъэпсыхи, ахъщэ къыратыгъ. Ащ ишIуа­гъэкIэ зэрыдэхэрэ машинкакIэр ыщэфыгъэу, цIыфхэр ыдэжь къакIохэрэм афадэ, хьазырэу ыдыгъэхэри Интернетыр къыз­фигъэфедэзэ ещэх. ИIэпыIэгъу къезыгъэ­кIыгъэу, социальнэ IофышIэу ХъокIон Тамарэ зэрэфэразэр къыхигъэщыгъ.
Фестивалым хэлэжьагъэхэм яIэшIагъэ­хэр хьакIэу къекIолIагъэхэм ямызакъоу жюрим хэтхэми аушэтыгъэх. Ахэм къыды­халъытагъ IэшIагъэм идэгъу­гъэ, бизнесым зызэриушъомбгъурэр ыкIи ежь фэдэхэу социальнэ IэпыIэгъур къы­заратыгъэхэм зэдэлэжьэныгъэ амалэу яIэхэр.
Анахь IэшIэгъэ дэгъум икъыхэхын къинэу щытыгъ нахь мышIэми, жюрим зэфэхьысыжьхэр ышIыгъэх. Нэмазщыгъым ишIынкIэ апэрэ чIыпIэр къыди­хыгъ Мыекъуапэ щыпсэурэ Уджыхъу Сусанэ. ЯтIонэрэ чIыпIэр фагъэшъошагъ Красногвардейскэ районым къикIыгъэу, гъу­чIым идэлэжьэнкIэ IэпэIасэу Алексей Митько. Адыгэкъалэ щыщэу, пхъэм дэлэжьэрэ мастерэу Тхьагъэпсэу Мурат ящэнэрэ чIыпIэр фагъэшъошагъ. ЦIыфхэм зэдырагъаштэу амакъэ фатыгъ IэшIу- IушIухэр зышIырэ Блэгъожъ Фатимэ.
Фестивалым къекIолIагъэхэр езыгъэ­жьэгъэкIэ предпринимательхэм ыкIи ахэм къыдагъэкIыхэрэм нэIуасэ зафа­шIыгъ, яIэшIагъэхэр къызIэкIагъэхьагъэх.
КIАРЭ Фатим.