Адыгэ республикэ перинатальнэ Гупчэм инеонатологхэм тызхэт илъэсым ичъэпыогъу мазэ ехъулIэу зипIалъэ къэмысэу къэхъугъэхэу зионтэгъугъэ зы килограммым нахь мэкIэ сабыи 100-мэ ящыIэныгъэ къызэтырагъэнэн алъэкIыгъ.

— Мыщ фэдэ сабыйхэм апсэ къэбгъэнэныр зэлъытыгъэр зисэнэхьат хэшIыкI ыкIи IэпэIэсэныгъэ куу фызиIэ врач неонатолог-реаниматологэу тиIэхэр ары. Сабыйхэм яжьыкъэщэгъу пэпчъ мыхэр фэбанэх. Ащ дакIоу ахэм агъэфедэрэ джырэ лъэхъаным диштэрэ оборудование дэгъухэр икъоу тIэкIэлъых. Мыхэр лъэпкъ проектэу «Унагъом», федеральнэ ыкIи республикэ бюджетхэм къатIупщыгъэ мылъкумкIэ зэдгъэгъотыгъэх, — хигъэунэфыкIыгъ перинатальнэ Гупчэм ипащэу МатIыжъ Жаннэ.
Шъугу къэдгъэкIыжьын, Урысыем щыгъэнэфэгъэ шапхъэмкIэ ионтэгъугъэ грамм 500-м нахь мымэкIэ сабыир реанимацием къаштэ ыкIи зыпкъ рагъэуцожьы, грамм 480-рэ зионтэгъугъэхэри аштэу къыхэкIы. Мые­къопэ къэлэ клиникэ сымэджэщым реанимациемкIэ ыкIи къэхъугъакIэхэм терапие лъэш яхьылIэгъэнымкIэ иотделение ипащэу Ольга Соленых къызэриIуагъэмкIэ, икIыгъэ илъэсым сабыи 137-рэ яIагъ, ащ щыщэу мэкIэ дэдэ къэзыщэчыхэрэр 14 хъущтыгъ. Мы илъэсым иджырэ уахътэ ебгъапшэмэ, ащ фэдэ сабыйхэу отделением къычIэфагъэхэр нахьыбэ хъугъэ. Нэбгыри 100 фэдизмэ япсауныгъэ зыпкъ рагъэуцуагъ.
— Пэрыт технологиехэм ахэхъо, зипIалъэ къэмысэу къэхъугъэкIэ сабыйхэу зионтэгъугъэ макIэхэм узэряIэзэщт амалхэм зэрэ Урысыеу зыщаушъом­бгъугъ. Тэри ахэм тадештэ, тиотделение ищыкIэгъэ оборудованиекIэ зэтегъэпсыхьагъ, джырэ лъэхъаным диштэрэ «кувейз» зыфаIохэрэр, ядгъэшхыщтыр тиIэх. Ахэм яшIуагъэкIэ сабыир ным ышъо хэлъ хъумэ ыгъотырэм пэблагъэу тIыгъынхэ тэлъэкIы. ИВЛ-аппаратэу тиIэхэр шъабэх, ахэм сабыим ипсауныгъэ изытет — ыгу къызэрэтеорэр, жьы къызэрищэрэр, нэмыкIхэри къагъэлъагъо. Узэу яIэхэм ялъытыгъэу къэлэшхохэм ащыIэ гупчэхэм яврачхэри упчIэ­жьэгъу тэшIых, — къыIуагъ Ольга Соленых.

Iэшъынэ Сусан.