Адыгэ Республикэм и Лъэпкъ музей загъэпсыгъэр илъэси 100 зэрэхъурэр мы мафэхэм игъэкIотыгъэу хагъэунэфыкIы. ТичIыналъэ итарихъ иухъумэкIо-IотакIо хэхъоныгъэ инхэр иIэхэу мы мафэм къекIолIагъ, иунэ теплъэкIи, игъэтIылъыпIэхэмкIи зэтегъэпсыхьагъэ хъугъэ. ЗэкIэмкIи мыщ щаухъумэрэ пкъыгъохэр япчъагъэкIэ мин 330-рэ фэдиз мэхъух. ШIэныгъэ отделэу 9, тхылъеджапIэ ыкIи хъарзынэщ, гъэтIылъыпIакIэ, «Адыгэ хапIэр» мыщ непэ хэхьэх.

Адыгэ Республикэм и ЛIышъхьэу КъумпIыл Мурат исоциальнэ нэкIубгъохэм ащыхигъэунэфыкIыгъ ­Лъэпкъ музеир загъэпсыгъэр илъэси 100 зэрэхъурэр республикэмкIэ мэхьа­нэшхо зиIэ хъугъэ-шIагъэу зэрэщытыр.

— НепэкIэ музеим ифондхэм ахэлъ пкъыгъо хьаламэтхэр тарихъым исаугъэтых, ­лъэпкъым иискусствэ лъагэ ишыхьатых. Ахэм апэпчъ тарихъ гъэнэфагъэ пылъ. Музеим иIофышIэхэмрэ ушэтакIохэмрэ яшIуагъэкIэ ­адыгэхэм ятарихърэ якультурэрэ афэгъэхьыгъэу нахьыбэ зэдгъэшIэн тэлъэкIы», — къытхыгъ республикэм ипащэ.

Музеим имэфэкI Iофтхьабзэхэм ащыщ­хэр Пушкиным ыцIэ зыхьырэ унэм щыкIуагъэх. Зэхэхьэшхом хэлэжьагъэх АР-м иминистрэхэм я Кабинет и Тхьаматэ игуадзэу, финансхэмкIэ министрэу Виктор Орловыр, Адыгеим и Къэралыгъо Совет – Хасэм и Тхьаматэу Владимир Нарожнэр, ащ игуадзэу Цэй Эдуард, культурэмкIэ министрэу Аулъэ Юрэ, республикэм имузейхэм яIофышIэхэр. ХьакIэхэу къеблэгъагъэх Краснодар, Ставрополь крайхэм, Ростов хэкум, Къэбэртэе-Бэлъкъар, Къэрэщэе-Черкес республикэхэм, Темыр Осетием, Абхъазым ыкIи къалэу Геническ ямузейхэм ялIыкIохэр.
УФ-м культурэмкIэ иминистрэу ­Ольга Любимовар къызэрафэгушIогъэ шIуфэс телеграммэмкIэ мэфэкI зэхахьэр къызэIуахыгъ.

АР-м и ЛIышъхьэу КъумпIыл Мурат ыцIэкIэ Лъэпкъ музеим иIофышIэхэм къафэгушIуагъ Виктор Орловыр. Непэ музеир адыгэ лъэпкъым итарихъ иухъу­макIоу, иIотакIоу, шIэныгъэ гупчэу зэрэщытыр ащ къыхигъэщыгъ. Ар зие адыгэхэм ятарихъ гъэшIэгъон, охътэ зэфэшъхьафхэм лъэпкъым ищыIакIэ зыфэдагъэр, шIэныгъэм, гъэсэныгъэм, шъхьафитыныгъэм къафэкIогъэ хэгъэгушхощтыгъэу СССР-м изы Iахьэу ­Адыгэ автоном хэкум, нэужым Адыгэ Респуб­ликэм, мы аужырэ илъэсхэм зызэриштагъэр, лъэбэкъу пытэхэр ышIызэ, шъолъы­рыр ыпэкIэ зэрэ­лъыкIуатэрэр, щыIакIэр нахьышIу зэрэхъурэр зэхахьэм къыщыраIотыкIыгъ.

АР-м культурэмкIэ иминистрэу Аулъэ Юрэ Лъэпкъ музеим имэфэкIкIэ къыфэгушIуагъ ыкIи къэзэрэугъоигъэ­хэм ­шIуфэс къарихыгъ.
УФ-м культурэмкIэ иминистрэ ирэзэныгъэ ыкIи ищытхъу тхылъхэр Лъэпкъ музеим иIофышIэхэу Абрэдж Щамсэт, Джыгунэ ФатIимэт, Довлет Зотовым, Къош Асиет, Къудаикъо Мариет, Набэкъо Асиет, Нэхэе Мариет, Псэунэ Саидэ, Пщыпый Фатимэ, Тэу Аслъан, Хьакъунэ Маринэ, Цэй Сусанэ, Елена Черных, Шэуджэн Налмэс афагъэшъошагъ. ­«Адыгэ Республикэм культурэмкIэ ­изаслуженнэ IофышI» зыфиIорэ щытхъу­цIэр къалэжьыгъ Пщыпый Фатимэрэ Набэкъо Асиетрэ. Джащ фэдэу ­Адыгеим и Къэралыгъо Совет Хасэрэ АР-м культурэмкIэ и Министерствэрэ ярэзэныгъэ ыкIи ящытхъу тхылъхэр музеим щылажьэхэрэм афагъэшъошагъэх.

АР-м и Къэралыгъо Совет – Хасэм и Тхьаматэу Владимир Нарожнэр мэфэкI зэхахьэм къыщыгущыIагъ. Лъэпкъ музеим иIофышIэхэм IэпэIэсэныгъэу ахэлъыр тарихъ-культурэ кIэным икъэухъу­мэн, лъэпкъ зэгурыIоныгъэм игъэпытэн, нахьыжъхэм къафагъэнагъэм уасэ афашIэу ныбжьыкIэхэр пIугъэнхэм зэрэфэIорышIэрэр хигъэунэфыкIыгъ.

— Лъэпкъ музеир илъэси 100 зэрэхъу­рэр хэтэгъэунэфыкIы. Ар Кавказым ит музейхэм анахь дэгъоу алъытэхэрэм ащыщ. Лъэпкъым ыкIи къыткIэхъухьэрэ лIэужыкIэм тыгъосэрэ мафэм итарихъ ашIэнымкIэ музеим мэхьанэшхо иI. БлэкIыгъэ зэманым ыкIи непэ тызыхэт дунаим япкъыгъохэр ащ къытфызэтыригъэнагъэх. ЛIэшIэгъу хъугъэу Iофышхо егъэцакIэ. МэфэкIымкIэ ащ иIоф­ы­шIэхэм сафэгушIо, — къыIуагъ АР-м культурэмкIэ иминистрэ игуадзэу Кушъу Светланэ.
МэфэкIыр хагъэунэфыкIызэ, респуб­ликэм щыпсэухэрэри, ихьакIэхэри ­адыгэхэм якультурэ, яшэн-хабзэхэм, щыIэкIэ-псэукIэу яIагъэм игъэкIотыгъэу нэIуасэ афашIых. АР-м и Лъэпкъ музей мыщ фэдиз уахътэм зэрифэшъуашэу ипшъэрылъ егъэцакIэ. Музеим ипащэу АР-м и Концерт зэхахьэ къыгъэхьазыры­гъэ къэгъэлъэгъоным къекIолIагъэхэр ягуапэу еплъыгъэх.
Лъэпшъыкъо
Фатим.