Адыгэ къэралыгъо университетыр къызызэIуахыгъэр илъэс 85-рэ зэрэхъу­гъэм фэгъэхьыгъэ мэфэкI Iофтхьабзэ тыгъуасэ апшъэрэ еджапIэм ­щызэхащагъ. Ащ хэлэжьагъэх АР-м иминистрэхэм я Кабинет и Тхьаматэу КIэрэщэ ­Анзаур, Адыгеим и Къэралыгъо Совет – Хасэм и Тхьаматэу Владимир ­Нарожнэр, гъэсэныгъэмрэ шIэныгъэм­рэкIэ министрэу Евгений Лебедевыр, IэкIыб къэралхэм ыкIи Урысыем арыт апшъэрэ еджапIэхэм ялIыкIохэр, кIэлэегъаджэхэр, ветеранхэр.
Адыгэ Республикэм и ЛIышъхьэу КъумпIыл Мурат ыцIэкIэ КIэрэщэ ­Анзаур мэфэкIымкIэ къэзэрэугъоигъэхэм къа­фэгушIуагъ. Гъэхъагъэу апшъэрэ еджапIэм иIэхэр къыхигъэщыгъэх.
— Адыгэ къэралыгъо университетым тарихъ гъогу гъэшIэгъон къыкIугъ. Апэрэ илъэсым къыщегъэжьагъэу шъо­лъырым хэхъоныгъэ езыгъэшIыгъэ, шIэныгъэ куухэр зыIэкIэлъ специалистхэр мыщ къычIэкIыгъэх. Апшъэрэ еджапIэм икъызэIухынкIэ зиIахьышIу хэзылъхьэгъэхэ нахьыжъхэр тщыгъупшэхэрэп. Хэгъэгу зэошхом хэлэжьэгъэ кIэлэегъа­джэхэм яшIэжь тэгъэлъапIэ. Непэ Iоф щызышIэхэрэм нахьыжъхэм къафагъэ­нэгъэ гъогум тетхэу япшъэрылъхэр щытхъу хэлъэу агъэцакIэх. Непэрэ мафэм студент 43-мэ хэушъхьафыкIыгъэ дзэ операцием лIыхъужъныгъэ щызэрахьэ. Непэ Адыгэ къэралыгъо университетым икIэлэегъаджэхэми, истудентхэми тарэгушхо, — къыIуагъ КIэрэщэ Анзаур.
Джырэ уахътэм апшъэрэ еджапIэм нэбгырэ 800 фэдизмэ Iоф щашIэ, студент мини 10-м ехъу щеджэ. Урысыем имызакъоу, нэмыкI хэгъэгухэм ялIыкIохэри бэу щеджэх.
— Апшъэрэ гъэсэныгъэм ылъэныкъо­кIэ УФ-м и Президент къыгъэуцурэ пшъэрылъхэр шъолъырым щыгъэцэкIэгъэнхэм Адыгэ къэралыгъо университетым иIахьышIу хэлъ. Федеральнэ программэу «Приоритет 2030» зыфиIорэм чанэу хэлажьэ, ащ джыри зэ къегъэлъагъо джырэ лъэхъаным диштэрэ апшъэрэ еджапIэр зэрифэшъуашэу зэрэзэтегъэпсыхьагъэр, гъэхъэгъэшIухэр зэришIыхэрэр, — къыIуагъ КIэрэщэ Анзаур.
Нэужым зиIофшIэнкIэ къахэщыгъэ кIэлэегъаджэхэм щытхъу тхылъхэр аратыжьыгъэх.
Адыгэ къэралыгъо университетым имэфэкI фэгъэхьыгъэ игъэкIотыгъэ къэ­бар тигъэзет къыхиутыщт.

ДЕЛЭКЪО
Анет.