УФ-м зыкъэухъумэжьынымкIэ и Министерствэ зэзэгъыныгъэкIэ къулыкъур щихьынэу кIатхэхэрэм зэтыгъо ахъщэ тынэу Адыгеим щаратырэм хагъэхъуагъ. 2025-рэ илъэсым чъэпыогъум и 10-м къыщегъэжьагъэу ахэм сомэ миллиони 2,1-рэ аратыщт, ащ къыхэхъожьых УФ-м зыкъэухъумэжьынымкIэ и Министерствэ, муниципальнэ образованиехэм ащагъэнэфэгъэ зэтыгъо ахъщэ тынхэр ыкIи пстэумкIи сомэ миллионищ фэдизыщт.

ДзэкъулыкъушIэхэм ыкIи ахэм яунагъохэм къэралыгъор IэпыIэгъу афэхъузэ, ахъщэ тын зэфэшъхьафхэр ыкIи нэ­мыкI IэпыIэгъухэр афигъэнэфагъ. КIэлэцIыкIухэм апае зэтыгъо ахъщэ тынхэр, гурыт ыкIи апшъэрэ сэнэхьат гъэсэныгъэ зыщызэрагъэгъотырэ еджапIэхэм ачIэхьанхэмкIэ фэгъэкIотэнхэр, ыпкIэ хэмылъэу кIэлэцIыкIу IыгъыпIэхэм, кружокхэм, секциехэм кIонхэ алъэкIыныр, нэмыкIхэри.
Адыгэ Республикэм и ЛIышъхьэу КъумпIыл Мурат зэрэхигъэунэфыкIыгъэм­кIэ, хэушъхьафыкIыгъэ дзэ операцием хэлажьэхэрэм ыкIи ахэм яунагъохэм арысхэм ящыкIэгъэ IэпыIэгъур арагъэгъотыным республикэм ихэбзэ къулыкъухэр зэпымыоу ыуж итых. Хэгъэгум иухъумакIохэм лъэныкъо зэфэшъхьа­ф­хэмкIэ къэралыгъо IэпыIэгъоу арагъэ­кIырэм дакIоу, сатыум хэщагъэхэм, партиеу «Единэ Россием», общественнэ организациехэм ыкIи гуфакIохэм къаугъоирэ IэпыIэгъу зэфэшъхьафхэр афатIупщых.
Зэзэгъыныгъэ шIыкIэм тетэу дзэ къулыкъур зыхьыщтхэм якъыхэхын АР-м идзэ комиссариат фэгъэзагъ. МыщкIэ IофшIэныр республикэм зэрэщылъыкIуа­тэрэр дзэ комиссар шъхьаIэу Александр Авериным къедгъэIотагъ.
— УФ-м зыкъэухъумэжьынымкIэ и Министерствэ илъэсыр къимыхьэзэ УIэшыгъэ КIуачIэхэм зэзэгъыныгъэ шIыкIэм тетэу къулыкъур ащызыхьыхэрэм ыкIи илъэс дзэ къулыкъур зыхьыщтхэм япчъагъэ хэгъэхъогъэн фаеу пшъэрылъ къыгъэуцугъагъ. ЗэрэхъурэмкIэ, 2025-рэ илъэсыр екIыфэ республикэмкIэ зэзэгъыныгъэ шIыкIэм тетэу къулыкъум ядгъэщэн фаер нэбгырэ 900 фэдиз. Мыщ епхыгъэ IофшIэныр зыпкъ итэу лъэкIуатэ. Пшъэрылъэу къытфагъэуцугъэр процент 80-м нэсэу дгъэцэкIагъэ, къэнэгъэ нэбгыри 120-рэ фэдизыр илъэсыр ыкIэм нэс тыугъоинэу тэгугъэ, — къыIуагъ Александр Авериным.
Джащ фэдэу республикэм идзэ комиссар шъхьаIэ къызэрэхигъэщыгъэмкIэ, 2024-рэ илъэсым изэфэхьысыжьхэм къызэрагъэлъэгъуагъэмкIэ, зэзэгъыныгъэкIэ къулыкъу зыхьыщтхэм яугъоинкIэ УФ-м исубъект 85-мэ азыфагу Адыгеим я 13-рэ чIыпIэр щиубытыгъ, ар къэгъэлъэгъонышIу.
Iэшъынэ Сусан.