Гъэсэныгъэм илъэныкъо зэфэшъхьафхэм Iоф ащызышIэхэрэм зыщафэгушIогъэхэ мэфэкI зэхахьэ мы мафэхэм щыIагъ.

Iофтхьабзэм хэлэжьагъэх АР-м иминистрэхэм я Кабинет и Тхьаматэ игуа­дзэу, Адыгеим финансхэмкIэ иминистрэу Виктор Орловыр, ­Адыгеим и ­Къэралыгъо Совет – Хасэм и Тхьаматэу Владимир Нарожнэр, ­Адыгеим гъэсэны­гъэ­мрэ шIэныгъэмрэкIэ иминистрэу Евгений Лебедевыр, АР-м иминистрэхэм я Кабинет хэтхэр, депутатхэр, муниципалитетхэм япащэхэр, общественнэ организациехэм ялIыкIохэр, кIэлэегъэджэ сообществэр, нэмыкIхэри.
АР-м и ЛIышъхьэу КъумпIыл Мурат ыцIэкIэ шъолъырым Iоф щызышIэрэ кIэлэегъаджэхэм, кIэлэпIухэм, ветеранхэм ямэфэкIэу текIыгъэхэмкIэ Виктор Орловыр къафэгушIуагъ. ТищыIэныгъэ гъогу тытезыщэрэ ыкIи тызыпIурэ кIэлэегъаджэхэм тазэрафэразэр ятIонымкIэ мы мафэр амалышIоу зэрэщытыр ащ хигъэунэфыкIыгъ. КъыткIэхъухьэрэ лIэужхэм яхэгъэгу шIу алъэгъоу пIугъэ­н­хэм кIэлэегъаджэхэм, кIэлэпIухэм яIахьышхо зэрэхэлъыр къыIуагъ. Непэ хэушъхьафыкIыгъэ дзэ операцием щыIэхэу тихэгъэгу къэзыухъумэхэрэр ахэм рагъэджагъэх, апIугъэх.

— Ныбджэгъу лъапIэхэр, кIэлэегъэджэ IофшIэным иветеранхэр, шъуимэфэкI мафэмкIэ сышъуфэгушIо, — къыIуагъ Виктор Орловым. — Мы сэнэхьатым зищыIэныгъэ езыпхыгъэхэм яIофшIэн хэшIыкIышхоу фыряIэм ишIуагъэкIэ къы­т­кIэхъухьэрэ лIэужхэм шIэныгъэ куухэр зэрагъэгъотынхэ, щыIэныгъэмкIэ ящыкIэгъэщт сэнэхьатым феджэнхэ амал яI. Гъэсэныгъэм хэхъоныгъэхэр ышIынхэм, кIэлэегъаджэм имэхьанэ зыкъегъэ­Iэтыгъэным афэшI къэралыгъом, респуб­ликэм непэ щашIэрэр бэ. Къэралыгъо программэхэр ыкIи лъэпкъ проектхэм яшIуагъэкIэ гъэсэныгъэм хэхъоныгъэхэр ешIых. Мы илъэсым еджэпIищ кIэу къы­зэIутхыгъ. Ахэм нэбгырэ 2450-рэ ачIэфэ. Аужырэ илъэси 10-м еджэпIипшI кIэу шъолъырхэм щашIыгъ. Джащ фэдэу игъэкIотыгъэ гъэцэкIэжьынхэр зищыкIагъэхэм ащэкIох, мы аужырэ илъэсиплIым еджэпIэ 28-рэ агъэкIэжьыгъ. КIэлэцIыкIу IыгъыпIэхэми хэхъоныгъэхэр ашIых, мы илъэсым Кощхьэблэ районым нэбгыри 100 зычIэфэщт мыщ фэдэ псэуалъэ къыщызэIуахыщт. Ащ нэмыкIэу кIэлэцIыкIу IыгъыпIитIу республикэм щашIынэу агъэнафэ, аужырэ илъэси 7-м 22-рэ щагъэпсыгъ.
Джащ фэдэу гъэсэныгъэ тедзэми республикэм мэхьанэшхо щыраты. Кванториумхэр кIэу къызэIуахых, джырэкIэ технопарки 6 Адыгеим иI. Непэрэ мафэм ехъулIэу кIэлэеджакIохэм япроцент ­55-мэ гъэсэныгъэ тедзэ арагъэгъоты. Психолого-педагогическэ классхэр гурыт еджа­пIэхэм яIэхэ хъугъэ. КIэлэеджакIохэми, кIэлэегъаджэхэми гъэхъагъэ ашIынымкIэ пшъэрылъхэр зэрагъэцакIэхэрэр Виктор Орловым къыIуагъ. КIэлэегъэджэ ныбжьыкIэхэм ягъэхьазырын анахьэу анаIэ зытырагъэтыхэрэм ащыщ. Ахэр еджапIэхэм къящэлIэгъэнхэм фэшI «Земскэ кIэлэегъадж» зыфиIорэр щыIэныгъэм зэрэщыпхыращырэр, ащ ишIуагъэкIэ республикэм ирайон зэфэшъхьафхэм яеджапIэхэм кIэлэегъэджэ ныбжьыкIэ 55-рэ зэраIухьагъэр къы­Iуагъ.
Джэджэ районымкIэ гурыт еджапIэу N 3-м информатикэмкIэ икIэлэегъаджэу Сергей Коцур «2025-рэ илъэсым Урысыем икIэлэегъэджэ анахь дэгъу» зыфиIорэм илауреат хъугъэ, Мыекъопэ кIэлэцIыкIу IыгъыпIэу N 12-м икIэлэпIоу Антонина Титовар «УрысыемкIэ илъэсым икIэлэпIу анахь дэгъу» зыцIэм ­илауреат хъугъэ.
— Республикэм гъэсэныгъэмкIэ исис­темэ, шъолъырым ыкIи къэралыгъом зэрэпсаоу хэхъоныгъэхэр ашIынхэмкIэ шъуиIофшIэн шъукъызэрекIуалIэрэм мэхьанэшхо зэриIэм щэч хэлъэп. Ащ къыхэкIыкIэ кIэлэегъаджэм щыIэныгъэм чIыпIэу щиубытырэм, ежь пшъэдэкIыжьэу ыхьырэм ахэхъо. Лъытэныгъэ зыфэтшIырэ тикIэлэегъаджэхэр! ШъуимэфэкIкIэ джыри зэ сыгу къыздеIэу сышъуфэгушIо. Творческэ гъэхъагъэхэр шъушIыхэзэ джыри нахь лъэгэпIэ инхэм шъуанэсынэу, ежъугъаджэхэрэм шъуарыгушхон амал, псауныгъэ пытэ ыкIи щыIэкIэшIу шъуиIэнэу сышъуфэлъаIо, — къыIуагъ Виктор Орловым.
Нэужым «Адыгэ Республикэм гъэсэныгъэмкIэ изаслуженнэ IофышI» зыфиIорэ щытхъуцIэр кIэлэегъэджэ ыкIи кIэлэпIу пэрытхэм, гурыт еджапIэхэм, кIэлэцIыкIу IыгъыпIэхэм япащэхэм— зэкIэмкIи нэбгырэ 14-мэ афагъэшъошагъ.
Нэужым Владимир Нарожнэм гущыIэ ратыгъ, АР-м и Парламент идепутатхэм ацIэкIэ зисэнэхьат мэфэкI хэзыгъэунэфыкIыхэрэм ар къафэгушIуагъ. АР-м и Къэралыгъо Совет – Хасэм ирэзэныгъэ тхылъ нэбгырэ заулэмэ аритыжьыгъ.
Евгений Лебедевыр гъэсэныгъэм исистемэ республикэм хэхъоныгъэу щишIыхэрэм къатегущыIагъ. УФ-м просвещениемкIэ и Министерствэ ибгъэхалъхьэу « Отличник просвещения» зыфиIорэр Мыекъопэ районым ит гъэсэныгъэ гупчэу N 8-м тарихъымкIэ ыкIи обществознаниемкIэ икIэлэегъаджэу Александр Лагошиным, Красногвардейскэ мэкъумэщ аграрнэ-промышленнэ техникумым гъэсэныгъэмкIэ имастерэу ЛIышэ Руслъан афигъэшъошагъ. Джащ фэдэу «Урысые Федерацием гъэсэныгъэмкIэ иIофышIэ гъэшIуагъ» зыфиIорэ щытхъуцIэр фагъэшъошагъ Тэхъутэмыкъое районымкIэ кIэлэцIыкIу IыгъыпIэу N 11-м икIэлэпIоу Хьатит Разиет. Ащ нэмыкIхэри къыхагъэщыгъэх.
КъыткIэхъухьэрэ лIэужхэм гъэсэныгъэ языгъэгъотырэ кIэлэпIухэм, кIэлэегъа­джэхэм мы мафэр мэфэкI шъыпкъэ афэхъугъ. Зэхэтхэу орэдхэр къаIуагъэх, къэшъуагъэх. Концерт къафатыгъ. БлэкIыгъэ уахътэмрэ непэрэмрэ къизыIотыкIырэ къэгъэлъэгъонэу респуб­ликэм ирайонхэм ыкIи икъалэхэм къагъэхьазырыгъэхэр ашIогъэшIэгъоныгъ.

ДЕЛЭКЪО
Анет.