Художественнэ гимнастикэмкIэ Урысыем спортымкIэ имас­тер хъугъэх Мыекъопэ спорт еджапIэу В.С. Максимовым ыцIэ зыхьырэм зыщызыгъэсэхэрэ нэбгыри 8. Адыгэ Республикэр пштэмэ, мы спорт лъэпкъымкIэ апэрэу ащ фэдэ гъэхъагъэ тиI. Къыхагъэщыгъэхэм ащыщыщх: Анастасия Ким, Дарья Ларионовар, Милена Капковар, Арина Щербаневар, Милана Матевосян, Карина Сильченкэр, Василиса Гарбузовар ыкIи Анна Алексеевар.
Бгъэхалъхьэхэр ыкIи ахэр къэзыушыхьатырэ тхылъхэр зыщаратыжьыгъэхэ мэфэкI Iофтхьабзэр Адыгэ къэралыгъо университетым иордэунэу Кобл Якъубэ ыцIэ зыхьырэм щы­кIуагъ. СпортымкIэ мастер хъу­гъэ пшъашъэхэм къафэгушIуагъ Мыекъопэ къэлэ администрацием ипащэу Геннадий Митрофановыр. Ащ къызэриIуагъэмкIэ, илъэсипшIыкIэ узэкIэIэбэжьмэ художественнэ гимнастикэм икъутамэ Адыгеим икъэлэ шъхьа­Iэ къыщызэIуахыгъагъ. А уахътэм тиспортсменкэхэр ыпэкIэ лъыкIотагъэх, ятренерхэм къараIорэр зэрагъэцэкIагъэм, ­ежьхэм гуетыныгъэ къызэрахэфагъэм мы гъэхъагъэр къыкIэлъыкIуагъ.