Роспатентым Адыгэ Республикэм экономикэ хэхъоныгъэмкIэ ыкIи сатыумкIэ и Министерствэ игъусэу, джащ фэдэу предпринимательхэм IэпыIэгъу ягъэгъотыгъэнымкIэ Гупчэу «Мой бизнес» зыфиIорэр яIэпыIэгъоу «Урысыем ишъолъыр брендхэр — лъэгэпIакIэхэр» зыцIэ егъэджэн семинар Мыекъуапэ щызэхащагъ.

Iофтхьабзэм хэлэжьагъэх Роспатентым ыкIи унэе промышленнэ Федеральнэ институтым ипащэ игуадзэу Д. Сав­ченкэр, экспертизэмкIэ отделым ипащэу А. Сычевыр, АР-м иминистрэхэм я Кабинет и Тхьаматэ игуадзэу ЛIыхэсэ Махьмуд, хэбзэ гъэцэкIэкIо къулыкъу­хэм, шъолъыр бизнес-сообществэм, мэ­къу-мэщым, къыдэгъэкIыным, культурэм ыкIи искусствэм ялIыкIохэр.
Пэублэм ЛIыхэсэ Махьмуд къэзэрэугъоигъэхэм шIуфэс гущыIэхэмкIэ закъы­фигъэзагъ, хьакIэу тиреспубликэ къеблэгъагъэхэм гущыIэ фабэхэр къапигъо­хыгъ. Мы Iофтхьабзэм мэхьанэшхо зэриIэр къыхигъэщызэ, Урысыем ибренд­хэм афэдэу, гъомылапхъэхэм якъыдэгъэкIынкIэ Адыгэ Республикэр зэрыгу­шхон ылъэкIыщт адыгэ къуаер, адыгэ щаир, Мыекъопэ минеральнэ псыр, адыгэ щыгъур ыкIи нэмыкIхэри зэриIэхэр къыIуагъ. Ахэм ядэгъугъэ нахьыбэу ти­хэгъэгу щызэлъашIэным пае мыщ фэдэ Iофтхьабзэхэм яшIогъэшхо къызэрэкIорэр хигъэунэфыкIыгъ. Шъолъырыр зэрыгу­шхорэ адыгэ къуаем къыкIэупчIэх ыкIи агу рехьы. Арэущтэу щытыным пае Iофтхьэбзэ гъэнэфагъэхэр зэшIуахых. ГущыIэм пае, 2010-рэ илъэсым къыщегъэжьагъэу адыгэ къуаем и Фестиваль зэхащэ. Ащ пшъэрылъэу иIэр адыгэ къуаем къызэпичыгъэ гъогум, ащ ишIын цIыфхэр нэIуасэ афэшIыгъэнхэр ары. Мы илъэсым мэфитIо кIогъэ фестивалым, фэдэ зыпарэкIи къыхэмыкIыгъэу, хьэкIэ мин 69-рэ фэдиз къекIолIэгъагъ. Мы аужырэ илъэси 8-м къуаеу къыдагъэкIырэр фэди 2,5-кIэ Адыгеим нахьыбэ щашIын алъэкIыгъ, а IофшIэныр лъэкIуа­тэ. 2024-рэ илъэсыр пштэмэ, къое тонн мин 32,1-рэ къыдагъэкIыгъ, мы илъэсым пыкIыгъэ мэзи 8-м — тонн мин 22,3-рэ. Къуаеу къыдагъэкIырэр нахьыбэ шIыгъэ­ным пае амалыбэ къызфагъэфедэ, федеральнэ гупчэм къытырэ IэпыIэгъури зыкIэ ахэм ащыщ.
Егъэджэн Iофтхьабзэм хахьэу Роспатентым ыкIи унэе промышленнэ Федеральнэ институтым илIыкIохэм шъолъыр бизнес-сообществэм, гъомылапхъэ къы­дэзыгъэкIыхэрэм, шъолъыр хэбзэ къулыкъум ялIыкIохэм ыкIи нэмыкIхэм продукцием икъыдэгъэкIын пылъ шапхъэ­хэр къафаIотагъэх.
А. Сычевым къызэриIуагъэмкIэ, феде­ральнэ ыкIи шъолъыр мэхьанэ яIэу мыщ фэдэ брендхэм хэхъоныгъэ ягъэшIыгъэ­ныр япшъэрылъ шъхьаIэхэм ащыщ. УФ-м и Президент иунашъокIэ аштэгъэ программэр чIыпIэхэм къащадагъэкIырэ брендхэр IуагъэкIынхэмкIэ IэпыIэгъу афэхъунхэм ыкIи предпринимательхэм япродукцие нэмыкIхэм янэкъокъун ылъэ­кIыным фытегъэпсыхьагъ.
— Пшъэрылъэу тиIэр Адыгэ Рес­публикэм ибрендхэр зэлъягъэшIэгъэнхэмкIэ екIолIэкIакIэхэр къэгъотыгъэнхэр, бэдзэр кIоцIым ыкIи IэкIыбым ахэр ащызэлъягъэшIэгъэнхэр, предпринимательствэм исубъектхэм амалэу аIэкIэлъхэм ахэгъэхъогъэныр ары. Мы Iофтхьабзэм къедгъэ­блэгъагъэх къыдэгъэкIыным пылъхэу шапхъэу щыIэхэм адиштэхэрэр. ГущыIэм пае, ахэм ахахьэх товарыр къызщыдагъэкIырэ чIыпIэр ыкIи ащ ыцIэ тетхэгъэныр, «Адыгеим къыщашIыгъ» зыфиIорэ тамыгъэр тетыныр, федеральнэ зэнэ­къокъоу «Знай наших» зыфиIорэм текIоныгъэ къыщыдэхыгъэныр. Шъолъыр программэм хэлэжьэнхэ зэралъэкIыщт шIыкIэхэр къагурыдгъэIоным мы Iофтхьабзэр фэIорышIэ. Сэгугъэ ФедерациемкIэ Советым и Тхьаматэу В. И. Матвиенкэм иIэпыIэгъукIэ зэхэтщэгъэ Iофтхьабзэр бизнесым пылъхэм тапэкIи хэхъоныгъэхэр ашIынхэм, проект­хэр лъагъэкIотэнхэм, гу­къэкIхэр ыкIи егъэжьэпIэшIу­хэр ашIынхэм фэIорышIэнэу, — къыIуагъ А. Сычевым.
КIАРЭ Фатим.