Чъэпыогъум и 8-м академическэ мэкъамэм ишъолъыр фестиваль Адыгэ Республикэм и Къэралыгъо филармоние къыщызэIуахыгъ. Адыгэ Республикэм культурэмкIэ и Министерствэ, республикэм и Концерт зэхахьэ, общественнэ организациеу «Урысыем икомпозиторхэм я Союз» зыфиIорэм и Адыгэ шъолъыр къутамэ Iофтхьабзэм кIэщакIо фэхъугъэх.

Программэу «Культурэм ихэхъоныгъ» зыфиIоу 2025 — 2027-рэ илъэсхэм ателъытагъэм къыдыхэлъытагъэу академическэ мэкъамэм ишъолъыр фестиваль зэхащагъ. Москва, Санкт-Петербург, Узбекистан, Казахстан, Къыблэ федеральнэ шъолъырым, Къалмыкъым, Татарстан, КъБР-м, Краснодар краим, Астраханскэ, Волгоградскэ ыкIи Ростовскэ хэкум якомпозитор цIэрыIохэм атхыгъэ мэкъамэхэр Iофтхьабзэм щыIугъ.
КъыткIэхъухьэрэ лIэужхэм яхэгъэгу шIу алъэгъоу пIугъэнхэм, лъэпкъ академическэ музыкальнэ искусствэм хэхъоныгъэ ышIыным ар афытегъэпсыхьагъ. Академическэ музыкэм ныбжьыкIэхэр хэщэгъэнхэм, шъолъырхэм ыкIи лъэпкъ зэфэшъхьафхэм азыфагу илъ культурнэ зэпхыныгъэр гъэпытэгъэным фэIорышIэ. Илъэс къэс ащ мэкъэмакIэхэр хагъахьэ ыкIи Iофтхьабзэр нахь гъэшIэгъон зэрашIыщтым зэхэщакIохэр пылъых.

Адыгеим исимфоническэ оркестрэ зэлъашIэрэ оперэ зэфэшъхьафхэм япычыгъохэр къыригъэIуагъэх. ПстэумкIи произведении 7 программэм хэхьагъ.
Къэгъэлъэгъоным идирижерыгъэх: АР-м инароднэ артистэу, Адыгеим исимфоническэ оркестрэ идирижер шъхьаIэу Аркадий Хуснияровыр, Урысыем изаслуженнэ артистэу, дирижерэу Алексей Ходорченковыр, дирижерэу Николай Кустовыр.
АР-м культурэмкIэ иминистрэу Аулъэ Юрэ, Урысые Федерацием икомпозиторхэм я Союз иправление итхьаматэу, Урысыем инароднэ артистэу Рашид Калимуллиныр, Адыгеим икомпозиторхэм я Союз ипащэу, Урысыем инароднэ артистэу Нэхэе Аслъан фестивалым къыщыгущыIагъэх. ШъолъыритIум язэ­-къо­ш­­­ныгъэ итамыгъэу Рашид Калимуллиным АР-м культурэмкIэ иминистрэу Аулъэ Юрэ лъэпкъ музыкальнэ Iэмэ-псымэ къыритыгъ.
— АР-м и ЛIышъхьэрэ министрэхэм я Кабинетрэ тиIэпыIэгъухэу академическэ мэкъамэм икъызэтегъэнэнрэ ихэгъэхъонрэ тадэлажьэ. Академическэ мэ­къамэхэм яфестиваль гухахъо хэжъугъотэнэу сышъуфэлъаIо, — къыхигъэщыгъ министрэм.
— Хэгъэгу ыкIи лъэпкъ искусствэр къызэтегъэнэгъэнхэм, тапэкIэ хэхъоныгъэ ягъэшIыгъэным, зэлъашIэгъэ композиторхэм аусы­гъэ произведениехэм цIыф­хэр нэIуасэ афэшIыгъэнхэм фестивалыр фэлажьэ. Джащ фэдэу академическэ музыкэм ныбжьыкIэхэр хэщэгъэнхэм, шъолъырхэм ыкIи лъэпкъ зэфэшъхьафхэм азыфагу илъ культурнэ зэпхыныгъэр гъэпытэгъэным фэIорышIэ. Илъэс къэс ащ мэкъэмакIэхэр хэтэгъахьэ ыкIи Iофтхьабзэр нахь гъэшIэгъон зэрэтшIыщтым тыпылъ,— къыIуагъ Нэхэе Аслъан.
— Непэ тизыкIыныгъэ зыгъэпытэхэрэм ащыщ лъэпкъ культурэ зэфэшъхьафхэм ябаиныгъэ, яхэу­шъхьафыкIыгъэ. Лъэпкъ шэн-хабзэхэм якъэухъумэн мыщ фэдэ фестивальхэр фэIорышIэх, — къы­Iуагъ Къэбэртэе Бэлъкъарым къи­кIыгъэ Мурат Кабардоковым.
Чъэпыогъум и 9-м академическэ мэкъамэм ишъолъыр фестиваль хэлэжьагъэхэм апае Iэнэ хъурае зэхащагъ. Культурэм ыкIи искусствэм алъэныкъокIэ гумэкIыгъоу щыIэхэм ахэр алъыIэсыгъэх. Шъолъырхэм язэпхыныгъэ гъэпытэгъэным, тапэкIэ зэрэзэдэлэжьэщтхэм, академическэ музыкэм фэгъэхьыгъэ Iофтхьабзэхэр нахьыбэу зэхэщэгъэнхэм, нэмыкIхэм атегущыIагъэх.
Лъэпшъыкъо Фатим.