Мы мафэхэм къалэу Санкт-Петербург гъэстыныпхъэ шхъуантIэм и Дунэе форумэу щыкIорэм къыдыхэлъытагъэу Урысыем ишъолъыр 25-мэ газыр ащатIупщыгъ. Ахэм ащыщ Адыгеири.

Мыекъопэ районым и Тимирязевскэ псэупIэ кой хэхьэрэ поселкэ цIыкIоу Мичурино зыфаIорэр ары мызыгъэгум ар зыщызэхагъэнагъэр. Гъэстыныпхъэ шхъуантIэр цIыфхэм зэраIэкIахьэрэм зегъэушъомбгъугъэным фытегъэпсыхьэгъэ федеральнэ программэм къыдыхэлъытагъэу давление ин зиIэ газрыкIуапIэ псэупIэхэр зэрипхыхэу мыщ ­щашIыгъ. Поселкэу Тимирязевым екIышъ, Садовэм ар макIо.
МэфэкI Iофтхьабзэм хэлэжьагъэх АР-м и Премьер-министрэ игуадзэу Хъоткъо Хъызыр, Къэралыгъо Советым – Хасэм и Тхьаматэ игуадзэу Цэй Эдуард, Iа­хь­зэхэлъ обществэу «Газпром газораспределение Майкоп» ыкIи пшъэдэкIыжьэу ыхьырэмкIэ гъунэпкъэ гъэнэфагъэхэр зиIэ обществэу «Газпром межрегионгаз Майкоп» зыфиIохэрэм ягенеральнэ пащэ игуадзэу Александр Зинченкэр.
Видеозэпхыныгъэ шIыкIэм тетэу шъо­лъырхэм закъыфагъэзагъ УФ-м энергетикэмкIэ иминистрэу Сергей Цивилевым, Iахьзэхэлъ обществэу «Газпромым» и Правление итхьаматэу Алексей Миллер ыкIи «Газпром межрегионгазым» ­игенеральнэ пащэу Сергей Густовым.
Сергей Цивилевым гъэстыныпхъэ шхъуантIэр цIыфхэм зэраIэкIахьэрэм зегъэушъомбгъугъэным фытегъэпсыхьэгъэ федеральнэ программэу 2021 — 2025-рэ илъэсхэм ателъытэгъагъэр пхырыщыгъэ зэрэхъугъэр къызэфихьысыжьзэ, «Газпромымрэ» шъолъырхэм якъэралыгъо хэбзэ къулыкъухэмрэ Iофышхо зэрэзэдашIагъэм къыкIигъэт­хъыгъ, «тхьашъуегъэпсэу» къариIуагъ. А уахътэм программэм къыдыхэлъытагъэу гъэстыныпхъэ шхъуантIэм икIопIэ мин 92-рэ а шъолъырхэм ащагъэпсыгъ, псэупIэу зэращэлIагъэр мини 2 фэдиз мэхъу. Мы мафэм шъолъыр 25-у зыщызэхагъэнагъэхэм ащыпсэурэ унэгъо мини 4-м ехъумэ гъэстыныпхъэ шхъуантIэр аIэкIэхьанэу амал яIэ хъугъэ.
ЭнергетикэмкIэ министрэм къызэриIуагъэмкIэ, программэм ипIалъэ еухыми, IофшIэнхэр ащ щагъэуцущтхэп. 2026 — 2030-рэ илъэсхэм ателъыта­гъэу джыри программэ атIупщынэу мы уахътэм агъэхьазыры. УФ-м и Президентэу Владимир Путиным 2030-рэ илъэсым шIомыкIэу проценти 100-у псэупIэхэм гъэстыныпхъэ шхъуантIэр ящэлIэгъэнэу пшъэрылъ къыгъэуцугъ.
Нэужым федеральнэ министрэм, «Газпромым» ипащэхэм фитыныгъэ къати шъолъырхэм гъэстыныпхъэ шхъуан­тIэр ащатIупщыгъ. АдыгеимкIэ ар зэхагъэнагъ Хъоткъо Хъызыр, Цэй Эдуард ыкIи Александр Зинченкэм.
— Непэрэ Iофтхьабзэм ишIуагъэкIэ цIыфэу поселкэм дэсхэм, социальнэ псэуалъэхэм, мэкъумэщ хъызмэтшIапIэхэм гъэстыныпхъэ шхъуантIэр аIэкIэхьан амал яIэ хъугъэ. «Газпромым», республикэм ихэбзэ гъэцэкIэкIо къулыкъухэм, муниципальнэ образованиехэм ар яшIушIагъ. АдыгеимкIэ процент 94,6-у газыр агъэфедэ. Джыри къэкIорэ илъэсым программэр лъагъэ­кIотэщт. Ащ ишIуагъэкIэ зимыIэу респуб­ликэм къинагъэхэми зэрафыращэлIэщтым Iо хэлъэп, — къыкIигъэтхъыгъ шъолъыр Парламентым ипащэ игуа­дзэу Цэй Эдуард.
Iахьзэхэлъ обществэу «Газпром газораспределение Майкоп» гъэстыныпхъэ шхъуантIэм икIуапIэу мыщ щитIупщы­гъэр пстэумкIи километри 2,5-рэ мэхъу, ащ ишIын сомэ миллион 41,9-рэ пэIухьагъ. Щагу 49-рэ мэхъу зыгъэфедэн зылъэ­кIыщтыр. Поселкэу Мичуриным дэсэу унэгъуи 9-мэ газыр ящагухэм афыращэ­лIэнэу лъэIу тхылъхэр къатыгъэх, 6-мэ зэзэгъыныгъэхэм адыкIэтхагъэх.
Адыгеир зэрэщытэу пштэмэ, 2021 — 2025-рэ илъэсхэм программэм къыдыхэлъытагъэу поселкэхэр зэзыпхырэ газрыкIопIэ 11, псэупIэ кIоцIхэм ащызэбгырыщыгъэхэу 17, гъэстыныпхъэ шхъуантIэр зэбгырызытIупщырэ зы станцие агъэпсыгъэх. Ащ ишIуагъэкIэ псэупIэ 17 газым пышIагъэ хъугъэ.
ХЪУТ Нэфсэт.