ХэушъхьафыкIыгъэ дзэ операцием иветеранхэм ыкIи ахэм яунагъохэм арысхэм апае АР-м иIофшIэпIэ анахь инхэм ащыщэу пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Картонтарэм» зэIукIэгъу гъэшIэгъон щызэхащагъ. Къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ иIофышIэхэр Iофтхьабзэм икIэщэкIуагъэх. Ветеранхэр мамыр щыIакIэм хэгъэгъозэжьыгъэнхэмкIэ ыкIи IофшIапIэ ягъэгъотыгъэнымкIэ Iофтхьабзэр амалышIоу щыт.

Мыщ фэдэ зэIукIэгъухэм хэушъхьафыкIыгъэ дзэ операцием хэлэжьагъэхэм IофшIэн языгъэгъотыхэрэм занкIэу упчIэхэр щафагъэзэн алъэкIы, ащкIэ амалэу щыIэхэр зэрагъэлъэгъух. ЫпэкIэ мыщ фэдэ Iофтхьабзэу рагъэкIокIыгъэхэм къагъэнэфагъ ветеранхэм ясэнэхьат епхыгъэу щыIэныгъэм чIыпIэ щаубытынымкIэ яшIуагъэ къызэрэкIорэр.
ЗэIукIэгъум къекIолIагъэхэм ащыщэу Александр Таловласовым иеплъыкIэ къедгъэIотагъ.
— ЗэкIэ IофшIэныр зэрэщызэхэщагъэр къытагъэлъэгъугъ, амалышIухэр зэрэчIэлъыр къыхэбгъэщынэу щыт. ЛэжьэпкIэ дэгъу пылъ. ТапэкIэ мы предприятием Iоф щысшIэнэу къыхэсхыным сегупшысэщт, — ­хигъэунэфыкIыгъ А. Таловласовым.
«Картонтарэр» гофрокартоныр ыкIи пкъыгъо зэфэшъхьафхэр зыкIоцIащыхьэхэрэр къыдэзыгъэкIырэ предприятиеу щыт, шэпхъэшIухэм адиштэрэ Iэмэ-псымэхэмкIэ зэтегъэпсыхьагъ, Iоф­шIэнымкIэ амалышIухэр IэкIэлъых ыкIи хэти исэнэхьат епхыгъэу лъыкIотэн ылъэкIыщт.
Ветеранхэм IофшIэн ягъэгъотыгъэныр фондым ынаIэ зытыригъэтырэ лъэныкъохэм ащыщ. ХэушъхьафыкIыгъэ дзэ операцием хэлэжьагъэхэм янахьыбэр мамыр щыIакIэм зыфагъэзэжьыныр социальнэу щыIэныгъэм хэгъозэжьынхэм имызакъоу, зыпкъ итэу Iоф зыщашIэн чIыпIэ агъотыным епхыгъ.
Социальнэ координаторхэм нэбгырэ пэпчъ екIолIэкIэ гъэнэфагъэ къыфагъоты, IофшIэпIэ чIыпIэхэм, социальнэ зэзэгъыныгъэхэм грант IэпыIэгъум алъэныкъокIэ амалэу щыIэхэмкIэ макъэ арагъэIу. Джащ фэдэу шъолъыр фондэу «Хэгъэгум иухъумакIохэм» IофшIэн языгъэгъотыхэрэм зэпхыныгъэ адыриI, IофшIэпIэ чIыпIэхэр ягъэгъотыгъэнхэмкIэ ермэлыкъхэр, зэIукIэгъухэр афызэхащэх, рагъэджэжьых. ТапэкIэ джыри мы IофшIэныр лъагъэкIотэщт.
Iэшъынэ
Сусан.