Урысые экологие Iофтхьабзэу «Зеленая Россия» зыфиIорэм къыдыхэлъытагъэу 2025-рэ илъэсым иIоныгъо мазэ Адыгеим шэмбэт шIыхьафхэр щыкIуагъэх.

Ахэм язэхэщэн ыкIи республикэм ичIыпIэхэм якъэбзэныгъэ санитар шап­хъэхэм адиштэу шIыгъэным фэгъэхьыгъэ унашъом АР-м и ЛIышъхьэ кIэтхагъ. Iоныгъо мазэр екIыфэ республикэ шIыхьафхэм нэбгырэ 16130-рэ ахэлэ­жьагъ. IофшIэнышхоу зэрахьагъэм ишIуагъэ­кIэ гектар мин 341-м ехъу агъэкъэ­бзагъ.
АР-м тыкъэзыуцухьэрэ дунаим икъэ­ухъумэнрэ чIыопс къэкIуапIэхэмрэкIэ и ГъэIорышIапIэ къызэритыгъэмкIэ, шIыхьафхэм ялъэхъан хэкI кубометрэ 1888-м ехъу къаугъоигъ, хэбзэнчъэу хэкIитэкъупIэ ашIыгъэ чIыпIи 10, Мые­къуапэ къэзыухьэрэ гъогубгъоу километрэ 47-рэ хъурэр тIогъогогъо агъэкъэбзагъэх, шъолъырым къыхиубытэрэ чIыпIэхэм ягектари 100-м ехъурэм уцыжъхэр ащырачыгъэх, чъыг 2787-рэ ащагъэлагъ, республикэ щэрыуапIэм ыкIи ресторанэу «Мэздахэм» екIурэ дэкIояпIэм яIэгъо-блэгъу ит чъыгыжъхэр раупкIыгъэх.