Адыгеим игъогухэм ямызакъоу, ахэм ахэхьэрэ лъэмыджхэри щынэгъончъэнхэм, Iэрыфэгъоу щытынхэм лъэшэу республикэм ихэбзэ къулыкъухэм анаIэ тет.

2022 — 2024-рэ илъэсхэм ащ фэдэ псэолъи 7, ар метрэ 435-рэ мэхъу, шапхъэхэм адиштэу республикэм щызэтырагъэпсыхьажьыгъ. Мыгъи «ЩыIэныгъэм пае инфраструктурэр» зыфиIорэ лъэпкъ проектым къыдыхэлъытагъэу IофшIэнхэр лъагъэкIуатэх.
АР-м псэолъэшIынымкIэ, транспортымкIэ, псэупIэ-коммунальнэ ыкIи ­гъогу хъызмэтымкIэ и Министерствэ иотделэу гъогухэм афэгъэзагъэм ипащэу Алексей Будановым тызэрэщигъэгъозагъэмкIэ, 2025-рэ илъэсымкIэ псэолъи 5 республикэм щагъэкIэжьынэу агъэнэфэгъагъ. Ахэр Мыекъуапэ икIэу станицэу Джаджэр, поселкэу Псыбай зэпичыхэзэ къалэу Карачаевскэ кIорэ автомобиль гъогур Кощхьэблэ районым щызэпызычырэ каналым, Тэхъутэмыкъое районымкIэ Шапсыгъэ псыIыгъыпIэм и Яблоновскэ дамбэ зэпызычырэ каналэу Чибий, Мыекъопэ районымкIэ поселкэу Краснооктябрьскэм икIэу станицэу Дагестанскэм кIорэр зэпызычырэ псыхъоу Працюхэ, Красногвардейскэ районымкIэ станицэу Некрасовскэм икIэу къуаджэу Хьатикъуае кIорэр зэпызычырэ псы­хъоу Псынэфым, Джэджэ районымкIэ станицэу Дондуковскэм екIурэ гъогур зэпызычырэ псыхъоу Фарзэ ателъ лъэмыджхэр ары.
Тэхъутэмыкъое районымкIэ каналэу Чибий телъым ишIыжьын бэдзэогъу мазэм аухыгъ, псыхъоу Псынэф илъэмыдж джырэблагъэ атIупщыжьыгъ. Алексей Будановым къызэриIуагъэмкIэ, адрэ лъэмыджищым ягъэкIэжьын лъагъэкIуатэ, 2025-рэ илъэсым ыкIэм нэс пIалъэу яI, ау нахьыжьэу IофшIэнхэр аухынхэу ары зэрэгугъэхэрэр. Лъэ­мыджитфыр зэкIэмкIи метри 196-рэ мэхъу, сомэ миллион 565-рэ ахэм ягъэ­кIэжьын пэIухьащт.
Шъолъыр мэхьанэ зиIэ гъогухэм ахэхьэрэ лъэмыджхэр шапхъэхэм адиштэу зэрашIыжьыщтхэр гъогу инфраструктурэр нахьышIу хъуным, Адыгеим ипсэупIэхэм ямызакъоу, зэгъунэгъу шъолъыритIум зэпхыныгъэ зэдыряIэным афэIорышIэщт.
ХЪУТ Нэфсэт.