Адыгэ Республикэм культурэмкIэ и Министерствэ икIэщакIоу Iоныгъом и 2-м къыщегъэжьагъэу и 5-м нэс я VII-рэ шъолъыр кIэлэцIыкIу театральнэ фестивалэу «Театральное Зазеркалье» зыфиIорэр Адыгеим щыкIуагъ. Къыблэм ыкIи Темыр Кавказым яшъолъырхэм ащызэлъашIэрэ кIэлэцIыкIу театральнэ купхэр зэхахьэм хэлэжьагъэх.

Фестивалым ипшъэрылъ шъхьаIэр искусствэм хэхъоныгъэ егъэшIыгъэным, сэнаущыгъэ зыхэлъ режиссерхэр къыхагъэщынхэм Iоф дэшIэгъэныр ары. КIэлэцIыкIумэ афытегъэпсыхьэгъэ къэгъэлъэгъонхэр нахьыбэу зэхащэнхэр театральнэ фестивалым къыдыхэлъытагъ.
Театрэ зэфэшъхьафхэм ярежиссер цIэрыIохэм яIофшIагъэхэр фестивалым къыщагъэлъэгъуагъэх. КIэлэцIыкIухэр театральнэ IофышIэ цIэрыIохэм аIукIагъэх, пшысэ хьалэмэтхэм яплъынхэ алъэкIыгъ. Мэфищым кIогъэ фестивалым къыдыхэлъытагъэу мафэ къэс спектаклитIу къагъэлъэгъуагъ.
Къэбэртэе-Бэлъкъарым, Къалмыкъым, Новгород ыкIи Новошахтинскэ къарыкIыгъэ театрэхэм япащэхэр зыхэлэжьэгъэ пресс-конференцие фестивалым икIэухым зэхащагъ.
АР-м и Театральнэ зэхахьэ ипащэу Ацумыжъ Рустам Iофтхьабзэр къызэIуихызэ, ирэзэныгъэ гущыIэхэр театрэхэм зэкIэми афигъэзагъ. Фестивалым изэхэщэнкIэ АР-м и ЛIышъхьэу КъумпIыл Мурат къызэрадыригъэштагъэр хигъэунэфыкIыгъ.
— Мыщ фэдэ фестивалым Урысыем ишъолъырхэм ащыпсэурэ лъэпкъхэм якультурэ хэхъоныгъэ ышIынымкIэ, цIыфхэр нахь зэрэшIэнхэмкIэ мэхьанэшхо яI. ТапэкIэ фестивалым нахь зедгъэушъомбгъун гухэлъ тиI. Егъэджэн лъэныкъуакIэр Iофтхьабзэм хэдгъэхьащт. Актерхэр, режиссерхэр IэпэIэсэныгъэу аIэкIэлъымкIэ зэдгъэхъожьыщтых. КIэлэцIыкIухэр театрэм нахь фэщагъэ ашIынхэм фэшI кIэлэегъаджэхэм тадэлэжьэщт, — къыIуагъ Ацумыжъ Рустам.
Театральнэ фестивалыр нахь гъэшIэгъон зэрашIыщтымкIэ театрэхэм япащэхэм ягухэлъхэр къыраIотыкIыгъэх.
— Лъэшэу гукъау нахь мышIэми, кIэлэцIыкIу къэгъэлъэгъонхэм ащ фэдизэу ямыгугъухэу зэхагъэуцох. Сэ сишIошIыкIэ, нахь тэрэзэу ахэм пшысэхэр афызэхэбгъэуцон фае. Ахэм яцIыкIугъом алъэгъурэ къэгъэлъэгъоныр егъашIэми ащыгъупшэщтэп, — къы­Iуагъ Къэбэртэе-Бэлъкъарым и Къэралыгъо драматическэ театрэ ипащэу Шыбзыхъу Басир.
— Непэрэ шэпхъэшIухэм адиштэу кIэлэцIыкIу театрэхэр зэрэлажьэхэрэр цIыфхэм ядгъэлъэгъуныр типшъэрылъ шъхьаI. НыбжьыкIэхэр ппIунхэмкIэ, ­лъэпкъ тарихъыр ябгъэшIэнымкIэ искусствэр IэпыIэгъушху. Лъэпкъ театрэхэр яIэпэIэсэныгъэкIэ зэхъожьынхэм мы фестивалыр фэлэжьагъ, — къыIуагъ Юныс Сулеймановым.
Адыгеим щыпсэурэ кIэлэцIыкIухэр ыкIи ихьакIэхэр къэгъэлъэгъони 8-мэ яплъынхэ алъэкIыгъ: «Морозко», «Аленький цветочек», «Дюймовочка», «Кай и Герда», «Сар-Герел», «Дорога к солнцу», «Алиса в Стране чудес» ыкIи «Умка». Пшысэ цIэрыIохэр яIэубытыпIэу лъэхъа­ным диштэрэ гупшысэхэр IофшIагъэхэм гъэшIэгъонэу ахалъхьагъэх. Къэгъэлъэгъонхэр кIэлэцIыкIухэм лъэшэу ашIогъэ­шIэгъоныгъ.
Театрэ пэпчъ иактерхэм яспектаклэхэм ежьхэм яекIолIакIэ къахэщыгъ. Къэгъэлъэгъонхэм къащыгущыIэрэ нысхъапэхэр сценэм тет артистхэмрэ кIэлэцIыкIоу еплъыхэрэмрэ зэрапхыгъэх, нахь зэпэблагъэ ашIыгъэх, яшIэныгъэхэм ахагъэхъуагъ, лъэпкъым игушъхьэлэжьыгъэ анаIэ нахь тырарагъэдзагъ, пшысэмэ ядунай иIэшIугъэ алъагъэIэсыгъ.
ТапэкIэ фестивалэу «100 друзей имени Евгения Шварца» зыфиIорэр Адыгэ Республикэм итеатральнэ зэхахьэ зэхищэн гухэлъ иI.
Лъэпшъыкъо
Фатим.