Загъэпсыгъэр илъэси 100 зэрэхъурэм ихэгъэунэфыкIын АР-м и ­Лъэпкъ музей ыублагъ. Мы тхьамафэм ащ къыдыхэлъытэгъэ Iоф­тхьэбзэ зэфэшъхьафхэр щыкIощтых. Ахэм егъэжьапIэ афэхъугъ музеим щызэхащэгъэ пресс-конференциер.

ЗэIукIэм хэлэжьагъэх АР-м культурэмкIэ иминистрэу Аулъэ Юрэ, республикэм имузейхэм яIофышIэхэр, шъолъырым икъэбарлъыгъэIэс амалхэм ялIыкIохэр, хьакIэхэу къеблэгъагъэхэр: Краснодар, Ставрополь крайхэм, Ростов хэкум, Къэбэртэе-Бэлъкъар, Къэрэщэе-Черкес республикэхэм, Темыр Осетием, Абхъа­зым ыкIи къалэу Геническ ямузейхэм ялIыкIохэр, къэралыгъо музееу «Эрмитажым», Урысыем ухъумэнымкIэ имузей иIофышIэхэр. Къэзэрэугъоигъэхэм ­шIуфэс къарихыгъ ыкIи республикэм имэфэкI зэрэхэлажьэхэрэмкIэ «тхьашъуегъэпсэу» къариIуагъ АР-м культурэмкIэ иминистрэу Аулъэ Юрэ.
— Республикэм культурэм илэжьапIэхэмкIэ Лъэпкъ музеим чIыпIэшхо щеубыты. Ащ гъогу къызэрыкIоп къыкIугъэр. БэмышIэу дгъэцэкIэжьыгъ, псэолъа­кIи дгъэуцугъэ, анахь шъхьаIэр— хъарзынэщ ухъумэпIэ шIагъо музеим иIэ хъугъэ, иамалхэм заушъомбгъугъ. Джы пшъэрылъэу тиIэр гъэкIэжьыгъэ пстэур ылъапсэу хэхъоныгъэхэр ышIынхэр ары. Музеир нахь гъэшIэ­гъон, цIыфэу къакIорэр нахьыбэ тшIыныр тимурад. ГущыIэм пае, «Музеим зы мафэм» зыфиIорэ проектым ныбжьыкIабэ къызэлъеубыты. Джащ фэдэу, тиIофшIэн дгъэлъэшыным тыпылъыщт, — къыIуагъ ащ.
Лъэпкъ музеим итарихъ 1925-рэ илъэ­сым къыщежьэ. Ащ дэжьым ар Краснодар дэтыгъ, нахь кIасэу Мыекъуапэ къахьыжьыгъ. ИлъэсипшI пчъагъэхэм къакIоцI краеведческэ музеищтыгъэр 1993-рэ илъэсым АР-м и Лъэпкъ музей ашIыжьы ыкIи иамалхэм заушъомбгъу. Непэ ар адыгэ лъэпкъым итарихъ иухъу­мэкIо, иIотэкIо къодыеп, шIэныгъэ гупчэ шъыпкъ. Проект зэфэшъхьафыбэмэ ащыдэлажьэх. Лъэпкъ музеим ипащэу Джыгунэ Фатимэ къызэриIуагъэмкIэ, аужырэ илъэсым Iофышхоу зыдэлажьэхэрэм ащыщ якъэгъэлъэгъонхэр нэмыкI шъолъырхэм зэращэхэрэр. Къэ­ралыгъо программэу «Культурэм хэ­хъоныгъэ егъэшIыгъэныр» зыфиIорэм ар ихьатыр. Непэ ащ фэдэ къэгъэлъэгъон Къэбэртэе-Бэлъкъар Республикэм къыщызэIухыгъ.
— Ары, къэгъэлъэгъон гъэшIэ­гъон тимузей щэкIо. Ащ ишIуагъэкIэ тадэжь къакIорэ къодыехэр арэп Лъэпкъ музеим ыугъоигъэхэм нэIуасэ зафэзышIырэр, тэри ащ фэдэ амал тэгъоты. Зыфэдэ къэмыхъугъэ пкъыгъо гъэшIэгъон дэдэхэр къытфащагъэх. Гуфэбэныгъэ ин хэлъэу ахэр къызэраухъумэхэрэр къахэщы, — къыIуагъ КъБР-м и ­Лъэпкъ музей ипащэу Накъэ Феликс.
Къалэу Геническ икраеведческэ музей республикэм икъэгъэлъэгъон щыгъэпсыгъ. Фэдэ IофшIэныр тапэкIэ зэрэлъагъэкIотэн фаер, музейхэр, ахэм яIофышIэхэр зэрэшIэнхэмкIэ ащ мэхьанэшхо зэриIэр зэIукIэм хэлэжьагъэ­хэм къыхагъэщыгъ. Пресс-конференцие ужым ащ хэлэжьагъэхэр музеим икъэгъэлъэгъонхэм нэIуасэ зафашIыгъ. Шъо­лъырхэм къарыкIыгъэ хьакIэхэр мы мафэхэм республикэм щыIэщтых. Музеим иилъэси 100 мэфэкI Iофтхьабзэхэм ахэлэжьэщтых.
Анцокъо Ирин.