ГандболымкIэ Урысыем и Суперлигэ хэт «АГУ-Адыифыр» зэнэкъокъум пэрытныгъэ щызыIыгъ «Ростов-Доным» мы мафэхэм IукIагъ. Адыгэ къэралыгъо университетым иордэунэу Кобл Якъубэ ыцIэ зыхьырэм щыкIогъэ ешIэгъур мы спорт лъэпкъыр зыгу рихьыхэрэм ашIогъэшIэгъоныгъ.

«АГУ-Адыиф» — «Рос­тов-Дон» — 24:35 (13:19)
«АГУ-Адыифым» хэтыгъэх: къэлэпчъэIутхэр — Черницовар, Гобадзе, Черновар. Хавронинар — 7, Краснокутскаяр — 6, Локян — 4, Кожубековар — 3, Алексеевар — 2, Миловар – 1, Коблыр — 1.
«Ростов-Доным» щешIагъэх: къэлэпчъэIутхэр — Ясницкаяр, Казьменкэр. Стаценкэр — 5, Зеленковар — 5, Алексеевар — 5, Кожокарь — 4, Сень — 3, Фроловар — 3, Шапошниковар — 2, Левша — 2, Ковшиковар – 2, Таженовар – 2, Шавман – 1, Бабенкэр – 1.
ЗэIукIэгъум ипэублэ ­«АГУ-Адыифыр» дэгъоу джэгугъэ. ХьакIэхэм апэу къэлапчъэм Iэгуаор къыдадзагъ нахь мышIэми, типшъашъэхэр къызэкIакIощтыгъэ­хэп, ыпэкIэ илъыщтыгъэх. Мы уахътэм тикъэлэпчъэIут цыхьэшIэгъоу ешIагъ. Ау «Ростов-­Доныр» къэралыгъом икомандэ анахь лъэшхэм ащыщ ыкIи апэрэ таймым икIэух ар къыгъэшъыпкъэжьыгъ, пчъагъэр 13:19-у ар аухыгъ.
ЯтIонэрэ таймым ипэублэ «АГУ-Адыифым» зэкIэлъыкIоу Iэгоо заулэ къэлапчъэм дидзагъ, ау «Ростов-Доным» иешIакIэ ригъэхъугъ ыкIи Iэгоо 11-кIэ ыпэ ишъыгъ. Мы уахътэм дэгъоу джэгугъэ блэкIыгъэ илъэсым Мые­къуапэ икомандэ хэтыгъэ Анас­тасия Алексеевар, ащ тикъэлапчъэ Iэгоуи 5 къыдидзагъ. Пчъагъэр 24:35-у ешIэгъур ­аухыгъ.
«АГУ-Адыифым» хэт Елизавета Краснокутскаямрэ «Ростов-­Доныр» къэзыгъэлъэгъорэ Анна Сеньрэ зэIукIэгъум иешIэкIо анахь дэгъухэу къыхагъэщыгъэх.
— ЗэгурыIоныгъэ азыфагу илъэу тигандболисткэхэр зэрэджэгугъэхэм сегъэгушIо. Непэ рэхьатэу тешIагъ, Iэгуаор тIы­гъыгъ. Ау хьакIэхэм тикъэлапчъэ Iэгоо псынкIэхэр къыдадзэн алъэ­кIыгъ, арышъ, а лъэныкъом тынаIэ нахь тедгъэтын фае, — къыIуагъ «АГУ-Адыифым» итренер шъхьа­Iэу Никита Голуб.
Мыекъуапэ икомандэ я 8-рэ чIыпIэм щыт, пэрытныгъэр «Рос­тов-Доным» еубыты. КъыкIэлъыкIощт ешIэгъур тигандболисткэхэм Москва щыряIэщт, «ЦСКА-м» IукIэщтых.
Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Ростов-Дон» — 10.
2. «Черноморочка» — 8.
3. «Астраханочка» — 8.
4. «ЦСКА» — 8.
5. «Лада» — 6.
6. «Звезда» — 4.
7. «Динамо-Синара» — 2.
8. «АГУ-Адыиф» — 2.
9. «Кубань» — 2.
10. «Луч» — 2.
11. «Уфа-Алиса» — 0.
12. «Университет» — 0.