ФутболымкIэ Адыгеим ичемпионат текIоныгъэр къыщыдихыгъ клубэу «Кавказ Адэмыем». Шъугу къэдгъэкIыжьын, командэ пэпчъ нэбгырий щешIагъ.

Зэнэкъокъум икIэух едзыгъо щызэIукIагъэх Красногвардейскэ районыр къэзыгъэлъэгъорэ «Кавказ Адэмыемрэ» Адыгэкъалэ икомандэу «Асбиррэ». Адыгэкъа­лэ илIыкIохэм турнирым ешIэкIэ дахэ къыщагъэлъэгъуагъ ыкIи къатефэу финалым ихьагъэх.

Апэрэ таймым икIэух красногвардейцэхэм ахэт Iащэ Анзор къэлапчъэм Iэгуаор дидзагъ, Я 33-рэ такъикъым ащ ятIонэрэу Iэгуаор дидзагъ, ау ащ ыпэкIэ «Кавказ Адэмыем» ифутболистхэм ащыщ шапхъэхэр зэриукъуа­гъэхэм къыхэкIэу ар халъытагъэп. Я 40-рэ такъикъым «Асбирым» пенальтикIэ пчъагъэр зэфэдиз ышIын амал иIагъ. Ау Красногвардейскэ районым икомандэ икъэлэпчъэIутэу Сергей Черновым Iэгуаор къызэкIидзэжьыгъ, пчъагъэр 1:0-у зэIукIэгъур аухыгъ. «Кавказ Адэмыем» чемпионатым и Урысые едзыгъо хэлэжьэнэу фитыныгъэ къыдихыгъ, ар Шъачэ щыкIощт.