УФ-м псауныгъэр къэухъумэгъэ­ным­кIэ и Министерствэ 2025-рэ илъэсым чъэпыогъум и 6 — 12-м зэхашIэр зэIэмыхьэгъэным и Тхьа­мафэу ыгъэнэфагъ. Чъэ­пыогъум и 10-р — цIыфым ипсихическэ зытет епхыгъэу ипсауныгъэ къызэтегъэнэгъэным и Дунэе мафэ — ар къыдыхэлъытагъ.

ЗэхашIэр зэIэмыхьэгъэныр — зэщыкъоныгъэ зэфэшъхьафхэр цIыфым къемыкIунхэр, ипсауныгъэкIи, ищыIэныгъэкIи зыпкъитыныгъэ хэлъэу, мырэхьатын щытыкIэхэм апэуцужьын ылъэкIыныр ыкIи шIуагъэ къытэу Iоф ышIэшъуныр. Ар сыдэущтэу цIыфым къыдэхъун ылъэкIыщта?
— ЦIыфым ифизическэ ыкIи ипсихическэ зытет зэщымыкъоу ипсауныгъэ пытэным фэшI анахь къызэрыкIо шIыкIэхэр ыгъэцэкIэнхэ фае. Сыхьати 7 — 8-м къыщымыкIэу чъыеныр. Пкъынэ-лынэр псынкIэу зыпкъ изгъэуцожьырэр, мырэхьатын щытыкIэхэм пкъыеу апэзгъэуцурэр чъыер ары. Джащ фэдэу псауныгъэм зэрар езыхырэ шIыкIэхэр щыгъэзыегъэнхэ фае. ГущыIэм пае, шъон пытэхэм нерв зэхэтыр ыкIи психикэр зэщагъакъох, акъылыр ыкIи гулъытэр агъэкIоды, гупшысакIэм хэхъоныгъэ рагъэшIырэп. Ащ пае мы тхьамафэм псауныгъэр къэзыухъумэрэ, зыгъэпытэрэ Iофтхьабзэхэр тигупчэ ригъэкIокIыщтых, — къыIуагъ общественнэ псауныгъэм и Гупчэ коммуникационнэ ыкIи общественнэ проектхэмкIэ иотдел ипащэу Керим-Заде Джульетэ.
ШIум, дэхагъэм ягупшысэмэ, спортым фэщагъэмэ, игупсэхэр игущыIэгъухэмэ, цIыфым ипсауныгъи зэкIуныгъэ хэлъыщыт.
Iэшъынэ Сусан.