Лъэпкъ шхыныгъохэм ябаигъэ, адыгэхэр хьакIэхэм зэрапэгъокIыщтыгъэхэр, ижъырэ лъэхъанхэм къащегъэжьагъэу лъэпкъым игъомылапхъэ зэрэзэрихьэщтыгъэр лъапсэ зыфэхъугъэхэ Iофтхьабзэ Мыекъуапэ щыкIуагъ.

Апэрэ студент зэнэкъокъоу «Кухня гор» зыфиIорэр Адыгэ къэралыгъо университетым и Мыекъопэ къэралыгъо гуманитар-техническэ колледж зэхищагъ. Гурыт сэнэхьат гъэсэныгъэ ягъэ­гъотыгъэныр заублагъэр илъэс 85-рэ зэрэхъурэм ар фэгъэхьыгъагъ.
МэфэкI шIыкIэм тетэу Iофтхьабзэр къызэIуахыгъ. Ащ хэлэжьагъэх АР-м иминистрэхэм я Кабинет и Тхьаматэ игуадзэу, Адыгеим финансхэмкIэ иминистрэу Виктор Орловыр, АР-м гъэсэныгъэмрэ шIэныгъэмрэкIэ иминистрэу Евгений Лебедевыр, Адыгэ къэралыгъо университетым иректорэу Мамый Даутэ, колледжым зэзэгъыныгъэ дэзышIыгъэ бизнес организациехэм ялIыкIохэр.
Iофтхьабзэм ипэублэ Виктор Орловым къышIыгъэ псалъэм къыщыхигъэщыгъ пщэрыхьанымкIэ сэнаущыгъэу ахэлъыр къагъэлъэгъонымкIэ мы зэнэкъокъум мэхьанэ ин зэриIэр. Сэнэхьат зэфэшъхьафхэр зэрифэшъуашэу студентхэм арагъэгъотыным фытегъэпсыхьэгъэ лабораториехэр мы колледжым зэриIэхэр къыIуагъ. Пщэрыхьаным епхыгъэ тарихъ баеу Адыгеим иIэр къызфагъэфедэзэ зэрифэшъуашэу зыкъагъэлъэгъо­нэу къафэлъэIуагъ.
Нэужым хьакIэу къекIолIагъэхэм мас­тер-классхэр къафагъэлъэгъуагъэх. Адыгэхэр хьакIэм зэрэпэгъокIырэм фэгъэхьыгъэ къэгъэлъэгъоныр сервисымкIэ ыкIи индустриемкIэ отделением истудентхэм къагъэхьазырыгъ, нэужым Гъонэжьыкъо Бэллэ десертэу трайфл зэрэпшIыщтыр къафиIотагъ.
«Поворское и кондитерское дело» зыфиIорэ сэнэхьатыр зэзыгъэгъотырэ студентитфым нэужым пщэрыхьанымкIэ сэнаущыгъэу ахэлъыр къагъэлъэгъуагъ. Ахэр гурыт сэнэхьат зыщызэрагъэгъотырэ еджэпIэ зэфэшъхьафхэм ащеджэх.
НыбжьыкIэхэм лъэныкъуабэхэмкIэ зыкъагъэлъэгъуагъ. Апэрэ уцугъом видеотехыгъэмкIэ ясэнэхьат къытегущыIагъэх, анэхэр кIэпхагъэу крупэ зэфэшъхьафэу къакIэрахьэхэрэр къашIагъэх. Нэужым лым хэшIыкIыгъэ зы шхын ашIынэу щытыгъ. Адыгэмэ яшхыныгъо шъхьаIэхэм ащыщэу лылыбжьэр ахэм аупщэрыхьыгъ. ИкIэухым адыгэ къуаерэ къэбырэ зыхэлъхэ десерт ашIыгъ. КIэухым республикэм къыщыкIырэ пхъэшъхьэ-мышъхьэхэр къызфагъэфедэхэзэ смузи ашIыгъ.
Пщэрыхьаным хэшIыкI ин фызиIэхэр осэшI купым хэтыгъэх. ИIэшIугъэ имызакъоу, рецептым ыкIи технологием атетэу аупщэрыхьыгъэмэ еплъыгъэх, лагъэм зэрилъ шIыкIэр ыкIи нэмыкI лъэныкъохэр къыдалъытэхэзэ анахь дэгъухэр агъэнэфагъэх.
Апэрэ чIыпIэр фагъэшъошагъ Красногвардейскэ мэкъумэщ-промышленнэ техникумым истудентэу Карина Жиганюк. ЯтIонэрэ хъугъэ Мыекъопэ политехническэ техникумым истудентэу Филипп Чернышевыр. Ящэнэрэ чIыпIэр ыубытыгъ Мыекъопэ къэралыгъо гуманитар-техническэ колледжым истудентэу Никита Хитровым. Ахэм тIэкIу ауж къинагъэх Мыекъопэ къэралыгъо технологическэ университетым иполити­ческэ колледж щеджэрэ Виктория Ильинамрэ Дондуковскэ мэкъумэщ техникумым чIэс Анастасия Бодневамрэ.
Студентхэм пщэрыхьанымкIэ IэпэIэсэныгъэу ахэлъыр къызэрагъэлъэгъуагъэм дакIоу шIэныгъэу а лъэныкъомкIэ аIэкIэлъхэмкIэ зэхъожьыгъэх. Федеральнэ проектэу «Профессионалитетым» къыдыхэлъытэгъэ лъэпкъ проектэу «Молодежь и дети» зыфиIорэр колледжым чанэу зэрэщагъэцакIэрэр джыри зэ зэнэкъокъум къыушыхьатыгъ.
ДЕЛЭКЪО Анет.