Бжыхьэ дзэ дэщыгъор чъэпыогъум и 1-м Адыгеим щырагъэжьагъ ыкIи ар тыгъэгъазэм и 31-м нэс кIощт. Iофтхьабзэр республикэм зэрэщылъыкIуатэрэм, зэхъокIыныгъэу къыхэхьагъэхэм, гъэтхэ дзэ дэщыгъом изэфэхьысыжьхэм зыщатегущыIэгъэхэ пресс-зэIукIэ Адыгэ Республикэм идзэ комиссариат зэхищагъ.

Iофтхьабзэм хэлэжьагъэх АР-м идзэ комиссариат ипащэу Александр Авериныр, къулыкъу зыхьыщтхэр дэщыгъэнхэмкIэ ыкIи ухьазырыгъэнхэмкIэ отделым ипащэу Виталий Лебедевыр, дзэ врачебнэ-комиссием итхьаматэу Игорь Буренковыр, районхэм ащыIэ дзэ комиссариатхэм ятхьаматэхэр, журналистхэр.
Пресс-зэIукIэм ипэублэ комиссар шъхьаIэм гъэтхэ дэщыгъоу блэкIыгъэм зэфэхьысыжьхэр къыфишIыгъэх.
— Дзэ комиссариатхэм, гъэцэкIэкIо хабзэм ифедеральнэ ыкIи ичIыпIэ къулыкъухэм акIуачIэ зэхэлъэу дэгъоу Iоф зэрашIагъэм ишIуагъэкIэ гъэтхэ дзэ дэщыгъор зэрифэшъуашэу рекIокIыгъ, пшъэрылъэу республикэмкIэ къытфагъэ­уцугъэр игъом дгъэцэкIагъэ, нэбгырэ 600 фэдиз къулыкъум ядгъэщагъ. А Iофтхьабзэм епхыгъэ IофшIэныр нахь дэгъоу зыщызэхэщэгъагъэхэр къалэу Мыекъуапэ, Мыекъопэ ыкIи Тэхъутэмыкъое районхэм ядзэ комиссариатхэр ары, — къыIуагъ А. Авериным.
Полковникыр бжыхьэ дзэ дэщыгъом къытегущыIэзэ, дзэ комиссариатхэм яIофшIэн зэрэрагъэжьагъэр ыкIи апэрэ дэщыгъор чъэпыогъум и 15-м зэраублэщтыр къыхигъэщыгъ. НыбжьыкIэхэм дзэ къулыкъур зэрахьыщт пIалъэр зэхъокIыгъэп, мэзэ 12-м тетэу къэнагъ. Бжыхьэ дзэ дэщын Iофтхьабзэм къыдыхэлъытагъэу нэбгырэ 400 фэдиз къулыкъум ащэнэу агъэнэфагъ.
— Мы илъэс зэкIэлъыкIохэм дзэм къулыкъур щызыхьы зышIоигъо ныбжьыкIэхэм япчъагъэ къыщыкIэрэп ыкIи адрэ илъэсхэм афэдэу федеральнэ гупчэм къытфигъэуцугъэ пшъэрылъыр зэрэдгъэцэкIэщтым сицыхьэ телъ. Ахэм къулыкъур зыщахьыщт чIыпIэхэр мыгъи зэблахъугъэхэп: лъэсыдзэхэм, мэшIокудзэхэм, ошъогу десантыдзэхэм, стратегическэ мэхьанэ зиIэ ракетнэ дзэхэм, хыдзэ флотым ыкIи Урысые Федерацием и Лъэпкъ гвардие идзэхэм. Альтернативнэ къулыкъур къыхэзыхыгъэхэр мыгъэ нахьыбэ хъугъэ, мы уахътэм ехъулIэу нэбгыри 10, — хигъэунэфыкIыгъ Александр Авериным.
Адыгеим идзэ комиссар шъхьаIэ къы­зэрэхигъэщыгъэмкIэ, дзэ комиссариатыр бжыхьэ дзэ дэщыгъом сыд фэдэрэ лъэ­ныкъокIи фэхьазыр, шъуашэхэри, гъомылапхъэхэри къыIэкIэхьагъэх. Бжыхьэ дзэ дэщыгъоу рагъэжьагъэм епхыгъэу зэхъокIыныгъакIэу щыIэми ар къыщыуцугъ. Ар повесткэхэр зэраIэкIагъэхьащтхэм афэгъэхьыгъ.
— ТапэкIэ зэрэщытыгъэм фэдэу джыри повесткэхэр тхьапэхэмкIэ афагъэхьыщтых. Ау ащ дакIоу электроннэ шъуашэм илъэуи афатIупщыщт. КъагурыIоным фэшI нахь игъэкIотыгъэу къэс­Iон: къэралыгъо информационнэ сис­темэу «Дзэ учетым и ЗыкI реестрэ» повесткэр рагъахьэ ыкIи ар зэритымкIэ къэралыгъо фэIо-фашIэхэм япорталкIэ къулыкъум ащэщтым макъэ рагъэIу. Реестрэм зырагъэхьэгъэ мафэм къыщыублагъэу мэфибл зытешIэкIэ повесткэр цIыфым IукIагъэу алъытэ. Ушъхьагъу имыIэу мэфэ 20-м къыкIоцI ар дзэ комиссариатым земыкIуалIэкIэ, хэбзэгъэуцугъэу щыIэм диштэу дэзекIох. Нэужым ар комиссариатым зекIуалIэкIэ, зэкIэ тыралъхьагъэр тырахыжьы, — къыIуагъ А. Авериным.
Журналистхэм упчIабэ къатыгъ. Анахь шъхьаIэу ны-тыхэр зыгъэгумэкIыхэрэр якIалэхэр «чIыпIэ плъырхэм» ащэщтхэмэ ары.
Комиссар шъхьаIэм къызэриIуагъэмкIэ, ыпэрэ илъэсхэм афэдэу хэушъхьафыкIыгъэ дзэ операцием мыщ фэдэ ныбжьыкIэхэр ащэщтхэп. Офицерхэр ыкIи дзэ къулыкъушIэхэу зэзэгъыныгъэм кIэтхагъэхэр ары ащ агъакIохэрэр. Бжыхьэм зипIалъэ къэзыухыхэрэри игъом ядэжь зэрагъэкIожьыщтхэр ащ къыхигъэщыгъ. Арышъ, мы лъэныкъомкIэ ны-тыхэр гумэкIыгъо хэтынхэр ищыкIагъэп. Курскэ е Белгород ягугъу къэтшIымэ, ащ фэдэ къапыщылъ чIыналъэ­хэм зэращэхэрэр къыIуагъ. Сыда пIомэ хъугъэ-шIагъэ тыди къыщыхъун ылъэ­кIыщт ыкIи гъэнэфагъэу къулыкъу зыщахьырэ чIыпIэхэм мыхэр ахэтхэп.
Iэшъынэ
Сусан.