Адыгэ Республикэр зызэхащагъэр илъэс 35-рэ зэрэхъугъэм фэгъэхьыгъэ шыгъачъэ Мыекъуапэ щыкIуагъ. Адыгеим и ЛIышъхьэу КъумпIыл Мурат ащ еплъыгъ.

Адыгеим и ЛIышъхьэ, АР-м и Къэралыгъо Совет — Хасэм, министрэхэм я Кабинет, шыхэр зыхъухэрэм я Ассоциациеу «Краса Адыгеи», республикэм физическэ культурэмкIэ ыкIи спортымкIэ и Комитет, Урысыем IофшIэнымкIэ и ЛIыхъужъэу МэщбэшIэ Исхьакъ яшIухьафтынхэр зэрылъ зэнэкъокъухэр зэхащагъэх.
ШIухьафтын фондыр сомэ миллиони 3 хъущтыгъ. Шы спорт Iофтхьабзэм ихъугъэ-шIэгъэ анахь шъхьаIэу хъугъэр АР-м и ЛIышъхьэ ишIухьафтын икъыдэхын зыщыфэбэнэгъэхэ шыгъачъэр ары. Мыщ текIоныгъэр къыщыдэзыхыгъэр ыкIи сомэ миллион зыфагъэшъошагъэр Пщыжъ СултIан ыгъэIорышIэщтыгъэ Славер ары (шыр зиер Кубэщыч Анзор).
Адыгеим итворческэ купхэм Iофтхьабзэм къекIолIагъэхэм концерт къафатыгъ. Джащ фэдэу Темыр Осетием изаслуженнэ артистэу Сергей Муратовыр зипэщэ коллективэу «Муратэ иджыгытхэр» зыфиIорэм икъэгъэлъэгъон цIыфхэм ашIогъэшIэгъоныгъ.