ЫкIэм фэкIуагъ
Лъэс зекIонымкIэ Iофтхьабзэу «Жъогъо 12» зыфиIорэр ыкIэм фэкIуагъ. Адыгеим икъэлэ шъхьаIэ, республикэм имуниципалитетхэм ямызакъоу, Урысыем инэмыкI шъолъырхэм ялIыкIохэри мыщ хэлэжьагъэх, зэкIэмкIи нэбгыри 194-рэ.
ЗэхэщакIохэм зэрагъэнэфагъэу, зэнэкъокъум зыщызыушэтыхэрэм тхьамафэм лъэбэкъу мини 100 къакIун фэягъ. А пшъэрылъыр нэбгыри 101-мэ агъэцэкIагъ.
Мыекъуапэ физическэ культурэмкIэ ыкIи спортымкIэ и Комитет итхьаматэу Дмитрий Щербеневыр текIоныгъэр къыдэзыхыгъэхэм афэгушIуагъ, ахэм къалэжьыгъэ дипломхэр, шIухьафтынхэр аритыжьыгъэх. ХэушъхьафыкIыгъэ шIухьафтынхэмкIэ хагъэунэфыкIыгъэх марафоным ивикторинихым ащытекIогъэ кIэлэеджакIоу Арина Петровскаямрэ квест зэнэкъокъухэм анахь ащылъэшыгъэ Татьяна Селиверстовамрэ.