КIэлэцIыкIухэр зыхэфэрэ тхьамыкIагъохэр гъогухэм къатемыхъухьанхэм фэшI кIэлэегъаджэхэу Мыекъуапэ щылажьэхэрэм методическэ зэхэсыгъо Мыекъопэ лицееу N 8-м щыряIагъ.

ЗэIукIэу семинар шъуашэ зиIагъэм хэлэжьагъэхэм пэублэ гущыIэкIэ закъы­фигъэзагъ ыкIи кIэлэцIыкIухэм япхыгъэ гъогу хъугъэ-шIагъэхэм, кIэлэегъаджэ­хэмрэ хэбзэ ухъумакIохэмрэ зэгъусэхэу зэшIуахыгъэ пэшIорыгъэшъ Iофтхьабзэхэм игъэкIотыгъэу къатегущыIагъэх Адыгэ Республикэм хэгъэгу кIоцI Iоф­хэмкIэ и Министерствэ и Къэралыгъо автоинспекцие илIыкIохэр.
Нахь куоу зигугъу ашIыгъэр еджа­кIохэр тхьамыкIагъо хэмыфэнхэм пае ахэр гущыIэгъу зэрэпшIынхэ ыкIи гъогум узэрэщызекIон фаер ренэу ябгъэлъэгъу­нэу зэрэщытыр ары.
Мы Iофтхьабзэр зэшIохыгъэным пае пэшIорыгъэшъ Iофтхьабзэхэр нахьыбэу зэшIуахы хъугъэ, ны-тыхэм якомитетхэм ахэтхэм зэIуагъакIэ ыкIи гъогур щынэгъончъэным ишапхъэхэм атегущыIэх.
Джащ фэдэу кIэлэцIыкIухэр агъэсэнхэм пае нахьыжъхэм тренинг шIыкIэмрэ джэгун шъуашэмрэ агъэфедэх.
Къэралыгъо автоинспекциемрэ мы Iофыгъохэм ахэщэгъэ нэмыкI организациехэмрэ зэгъусэхэу ищыкIэгъэ методическэ тхыгъэхэр зэдагъэхьазырынхэу зэзэгъыныгъэ зэдашIыгъ.
Семинарым хэлэжьагъэхэр мэгугъэх лъэныкъо пстэумкIи зэдэIэпыIэжьхэмэ, пэшIорыгъэшъ IофшIэным шIогъэ ин къытынэу ыкIи гъогухэр сабыйхэмкIэ бэкIэ нахь щынэгъончъэ хъунхэу.
АР-м и Къэралыгъо автоинспекций.