Урысыем ошIэ-дэмышIэ IофхэмкIэ и Министерствэ ипресс-къулыкъу къызэритыгъэмкIэ, Адыгеим икъушъ­хьэу Фыщт дэкIоегъэ зекIохэм ащыщэу хэкIодагъэр ыкIи шъобж зытещагъэ хъугъэхэр Урысыем ошIэ-дэмышIэ IофхэмкIэ и Министерствэ ивертолеткIэ къы­ращэхыжьхи, Шъачэ нагъэсыгъэх, мыщ дэжьым IэпыIэгъу псынкIэм имашинэ къыщяжэщтыгъ. ЗекIоу хэкIодагъэр Адыгэ Республикэм иследственнэ къулыкъу IэкIагъэхьагъ. Ащ нэмыкIэу купым хэтыгъэ зекIо нэбгыриплIэу IэпыIэгъу псынкIэр зимыщыкIэгъа­гъэхэр ятранспорт зыдэщытыгъэ чIыпIэм щырагъэ­кIыжьыгъэх.
Шъугу къэдгъэкIыжьын, къушъхьэу Фыщт итемыр лъэныкъо дэкIуаехэзэ, альпинист нэбгыритIу бгым къефэхыгъэх. Зыр хэкIодагъ, ятIонэрэм шъобжхэр тещагъэхэ хъугъэ. Купым ипащэ Урысыем ошIэ-дэмышIэ IофхэмкIэ и Министерствэ мы хъугъэ-шIа­гъэмкIэ макъэ ригъэIугъ. ЗэкIэмкIи зекIо купым нэбгыри 6 хэтыгъ. КъэгъэнэжьакIохэр ыкIи медицинэм иIофышIэхэр Урысыем ошIэ-дэмышIэ IофхэмкIэ и Министерствэ ивертолеткIэ Фыщт итемыр лъэныкъо псынкIэу нагъэсыгъэх, зекIохэм ящыкIэгъэ IэпыIэгъур арагъэгъотыгъ.
Урысыем и Следственнэ комитет иследственнэ гъэIорышIапIэу АР-м щыIэм Мыекъопэ районымкIэ иследственнэ комитет мы IофымкIэ зэхэфынхэр регъэкIокIых.