Урысыем инароднэ сурэтышIэу Къат Теуцожь иIэшIагъэхэм якъэгъэлъэгъон Адыгэ Республикэр загъэпсыгъэр илъэс 35-рэ зэрэхъугъэм фэгъэхьыгъэ мэфэкI программэм хэтэу тыгъэкъокIыпIэ лъэпкъхэм я Къэралыгъо музей и Темыр-Кавказ къутамэу Мыекъуапэ дэтым къыщызэIуахыгъ.

СурэтышI цIэрыIом ыныбжь мыгъэ илъэс 80 зэрэхъугъэр хигъэунэфыкIыгъ. Ащ щыщэу лIэшIэгъуныкъор творчествэм фигъэшъошагъ. IэпэIасэм IэшIэгъэ миным ехъу къыIэкIэкIыгъ. Искусствэ лъагэм хэшIыкI фызиIэхэм ащ ифэшъошэ уасэ фашIы. Къэгъэлъэгъоным икъызэIухын хэлэжьагъэх Урысыем и Къыблэ исурэтышI цIэрыIохэм ащыщхэр, Москва къи­кIыгъэ хьакIэхэр.
ХудожествэхэмкIэ Урысые академием ивице-президентэу, Урысыем искусствэхэмкIэ изаслуженнэ IофышIэшхоу Андрей Бавыкиным къыIуагъ Къат Теу­цожь итворчествэ уасэ фашIэу академием и Президиум иунашъокIэ художествэхэмкIэ академием зэрэхагъэхьа­гъэр, ащ фэгъэхьыгъэ унашъом академием ипрезидентыгъэу, живописцэу, скульп­торэу Зураб Церетели псаузэ кIэтхэнэу игъо зэрифагъэр ыкIи академием имантие IэпэIасэм щилъагъ. Джащ фэдэу Урысыем исурэтышIхэм я Союз къыфигъэшъошэгъэ дышъэ бгъэхалъхьэр Адыгеим исурэтышIхэм я Союз ипащэу Елена Абакумовам Къат Теуцожь къыритыжьыгъ.
— Адыгеир тыгу илъ зэпыт, шIукIэ тыгу къэкIыжьы Зураб Церетели иIэшIагъэхэм якъэгъэлъэгъон мыщ зэрэщыкIуагъэр, Къыблэ шъолъырым ис сурэтышIхэмкIэ, Краснодар, Ставрополь, нэмыкI шъолъырхэм къарыкIыгъэхэмкIи ар тарихъ хъугъэ-шIагъэу хъугъагъэ. Мы му­зеим пэIулъ щагум Зураб Церетели чъыг щигъэтIысхьэгъагъ, илъэуж нэф Адыгеим къыринагъ. Республикэм исурэтышIхэм ащ осэшхо афишIыщтыгъ. Къат Теуцожь ахэм ащыщ. IэпэIасэм итворчествэ зэрэиныр, зэрэзэтефыгъэр иIэшIагъэмэ къагъэлъагъо. Ар Адыгеим иискусствэ изы Iахь ин, — хигъэунэфыкIыгъ РАХ-м иакадемикэу, сурэтышIэу Сергей Паршиным.
ТыгъэкъокIыпIэ лъэпкъхэм я Къэралыгъо музей и Темыр-Кавказ къутамэ ипащэу ШъэуапцIэкъо Аминэт къызэриIуагъэмкIэ, академием ишъуашэ ащ хагъэхьэгъэ IэпэIасэм Мыекъуапэ щыратыжьэу апэрэ къызэрэхэкIыгъэр. Республикэм икультурэ итарихъ чIыпIэ гъэнэфагъэ ащ щиубытыщт.
Джащ фэдэу зэхахьэм хэлэжьагъэхэм зэкIэми Къат Теуцожь итворчествэ зыми зэрэфэмыдэр, сэнаущыгъэ ин зэрэхэлъыр хагъэунэфыкIыгъ.
— Адыгэ лъэпкъым итарихъ, ишэн-хабзэхэр, икультурэ Къат Теуцожь исурэтхэмкIэ къыгъэлъэгъуагъ. IэпэIасэм иIэшIагъэ­хэу къэгъэлъэгъоным цIыфхэм щалъэгъущтхэм осэ ин зэрафашIыщтым сицыхьэ телъ. Къат Теуцожь итворчествэ лъэп­къым фэлажьэ, къэралы­гъом иискусствэ чIыпIэ хэхыгъэ щеубыты. Тинахьыжъхэм яакъыл, ягъэсэпэтхыдэ, ахэр къы­зэрэткъотхэр ыпэкIэ ты­лъызыгъэкIотэрэ IэпыIэгъух, — къащитхыгъ ихъытыу нэкIубгъохэм АР-м и ЛIышъхьэу Къум­пIыл Мурат.
— Сисурэтмэ ашъохэр сыкъызщыхъугъэ чIыгум къыхэкIых, къытэрыкIуагъэм, тишэн-хабзэхэм янэпэеплъых, сичылэ, сиреспубликэ афысиIэ шIулъэгъум ишыхьатых. А зэхашIэр куу, ащ кIуачIэ къысеты, дунаир зыIыгъ искусствэр ахэм къапкъырэкIы, — къыIуагъ IэпэIасэм.
Къат Теуцожь иIэшIагъэхэм якъэгъэлъэгъон шэкIогъум и 24-м нэс тыгъэ­къокIыпIэ лъэпкъхэм я Къэралыгъо музей и Темыр-Кавказ къутамэу Мые­къуапэ дэтым щыкIощт.
Тэу Замир.