АР-м ыкIи къалэу Мыекъуапэ я Общественнэ палатэхэм зэхэсыгъо зэды­ря­Iагъ. Ащ «Къэлэ хъызмэтыр: джырэ щыIакIэм диштэу экономикэм, инфра­структурэм, гъэIорышIэным зэхъокIыныгъэу ащыхъухэрэр ыкIи транспортым, экологием, псэупIэхэм Iофыгъоу къащыуцухэрэр» цIэу иIагъэр.

Iофтхьабзэм хэлэжьагъэх Мыекъопэ къэлэ администрацием, хэбзэгъэуцу къулыкъухэм, АР-м псэолъэ­шIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ ялIыкIохэр.
Зэхэсыгъор АР-м и Общественнэ палатэ итхьаматэу Устэ Руслъан къызэIуихызэ, мы зэхэсыгъор блэкIыгъэхэм зэрафэмыдэр, Iофыгъоу къыщаIэтыщтхэмкIэ аштэщт резолюциер УФ-м и Общественнэ палатэ и Форум Москва щыриIэщт игъэкIотыгъэ зэхэсыгъом зэрэрахьылIэщтыр къыхигъэщыгъ.
— Непэ анахьэу тынаIэ зытедгъэтыщтыр гъэстыныпхъэ шхъуантIэр, электричествэр, псыр къэзытырэ ыкIи коммунальнэ хъызмэтшIапIэхэр зэрихьылIэхэрэ Iофыгъохэр къаIотэныр, къалэм изэтегъэпсыхьан, технологиехэр, Iоф­шIэнхэр зэшIохыгъэнхэм афэгъэзэгъэ Iофы­шIэхэр ыкIи къэлэ хъызмэтымкIэ цIыфхэр анахьэу зыгъэгумэкIыхэрэр ары, — къыIуагъ Устэ Руслъан.
Муниципальнэ образованиеу «Къалэу Мыекъуапэ» ипащэ игуадзэу Александр Лебедевым ипсалъэ къызэрэщиIуагъэмкIэ, республикэм икъэлэ гупчэ фэтэрыбэу зэхэт унэ 575-рэ дэт, ахэм нэбгырэ мин 97-рэ ащэпсэу. 2017-рэ илъэсым ахэм къапыщылъ щагухэм язытет зауплъэкIум зэрагъэунэфыгъэмкIэ, процент 80-м язытет уигъэрэзэнэу щытыгъэп.
— Лъэпкъ проектэу «ЩыIэныгъэм пае инфраструктурэм» къыдыхэлъытэгъэ федеральнэ проектэу «Iэрыфэгъу къэлэ щыIакIэр гъэпсыгъэныр» зыфиIорэм мы илъэсым тимуниципальнэ образование хэфагъ. А пIалъэм къыкIоцI фэтэ­рыбэу зэхэт унэхэм ящагу кIоцIхэр зэтырагъэ­псыхьанхэмкIэ лъэIу тхылъ 435-рэ къатыгъ, ар зэкIэ унэ зэхэтхэм япроцент 75-рэ мэхъу. 2017-рэ илъэсым къыщегъэжьагъэу 2024-м нэс къатыбэу зэтет унэхэм ящагу 249-рэ агъэкIэжьыгъ, — хигъэунэфыкIыгъ А. Лебедевым.
Народнэ депутатхэм якъэлэ Совет итхьаматэу Джарымэкъо Азмэт къызэриIуагъэмкIэ, къаIэтыгъэ Iофыгъом депутат корпусым ынаIэ тырегъэты.
— Къалэм псэупIэ-коммунальнэ хъызмэтымкIэ ыкIи къэлэгъэпсынымкIэ и ГъэIорышIапIэ идоклад бэрэ тедэIу. КъэлэгъэпсынымкIэ программэр 2017-рэ илъэсым къыщегъэжьагъэу чанэу Мыекъуапэ щагъэцакIэ. Партийнэ проектэу «Къэлэ щыIакIэр» зыфиIорэм ипхырыщын сэ сшъхьэкIэ сылъэплъэ. Зэтырагъэпсыхьэгъэ щагухэм язытет зэIофшIэгъухэм зэпымыоу тэуплъэкIу, — хигъэунэфыкIыгъ Азмэт.
ЧIыпIэ зыгъэIорышIэжьыным, псэупIэ политикэм, псэупIэ-коммунальнэ хъызмэтым, унагъом, ныгъом ыкIи кIэлэцIыкIугъом яIофыгъохэмкIэ Общественнэ палатэм и Комиссие итхьаматэу Татьяна Гоголевам упчIэ къыгъэуцугъ: «Мыекъуапэ ищыкIагъэха общественнэ псыунэхэр?»
— Мы Iофым епхыгъэу къэлэдэсхэм тызяуп­чIым, анкетированиер зетэгъэкIокIым къызэригъэлъэгъуагъэмкIэ, лъэш дэдэу ищыкIагъэу щыт. ИпчъагъэкIи икъунэу ыкIи якъэбзагъэкIи тэрэзэу Iоф зышIэн общественнэ псыунэхэр щыIэхэ зыхъукIэ, къалэм изэтегъэпсыхьагъэ ыкIи ащ щыпсэухэрэм ягупсэфыныгъэ яшап­хъэу ар хъущт, — къыIуагъ Т. Гоголевам.
Общественникхэм зэхэсыгъом лъэшэу къыщаIэтыгъэ Iофыгъохэм ащыщ псыр ыкIи фабэр къалэм зэрэIэкIагъэхьэрэ шIыкIэр. Джащ фэдэу хэкIым идэщын иIофыгъохэми атегущыIагъэх. Общественнэ палатэм илIыкIохэм яупчIэхэм джэуапхэр къаритыжьыгъ ООО-у «ЭкоЦентрэм» и Адыгэ къутамэ ипащэу Алыбэрд Налбый.
Iофтхьабзэм кIэух зэфэхьысыжь Устэ Руслъан къыфишIызэ, псэупIэ-коммунальнэ хъызмэтым исистемэ сыдигъокIи общественнэ организациехэм ыкIи движениехэм янэплъэгъу зэритыр хигъэунэфыкIыгъ. ЦIыфхэм ящыIэкIэ-псэукIэ мыщ занкIэу зэрепхы­гъэм къыхэкIыкIэ тапэкIи а Iофыгъохэм Общественнэ палатэм ынаIэ зэратыригъэтыщтыр къыIуагъ.
Iэшъынэ Сусан.