НыбжьыкIэхэм апае зекIо клубэу «Фыщт» зыфиIорэр Адыгэ къэралыгъо университетым и Мыекъопэ къэралыгъо гуманитар-техническэ колледж бэмышIэу къыщызэIуахыгъ.

Владимир Потаниным ишIушIэ программэ къыды­хэлъытэгъэ грант зэнэкъокъоу «Сила спорта» зыфиIорэм текIоныгъэ къызэрэщыдахыгъэм ишIуагъэкIэ проектыр щыIэныгъэм щыпхыращыгъ. Зэнэкъокъур Урысыем щыкIуагъ, IофшIэн 1049-у къырахьылIагъэхэм ащыщэу анахь гухэлъышIухэм атегъэпсыхьагъэхэр къыхахыгъэх, ахэм ащыщ хъугъэ «Фыщтыр».
МэфэкI Iофтхьабзэм хэлэжьагъэх АР-м гъэсэны­гъэмрэ шIэныгъэмрэкIэ иминистрэу Евгений Лебедевыр, Адыгэ къэралыгъо университетым ипроректорэу Беданэкъо Мурат, зыгъэпсэфыпIэхэмкIэ ыкIи зекIонымкIэ Комитетым ипащэ игуадзэу Джарымэ Бэллэ, АР-м спорт зекIонымкIэ и Федерацие ивице-президентэу Хьаткъо Алый, Мыекъопэ къэралыгъо гуманитар-техническэ колледжым ипащэу Бгъошэ Айдэмыр, гъэсэныгъэ организациехэм яеджакIохэр.
Iофтхьабзэм хэлэжьагъэхэм мастер-классхэр афызэхащагъэх. НыбжьыкIэхэм кIэпсэ паркым якъарыу щаушэтыгъ, цIыфым апэрэ IэпыIэгъу зэребгъэкIыщтыр арагъэлъэгъугъ, зекIо Iалъмэкъыр зэрэбгъэхьазырыщтым зыфагъэсагъ, джащ фэдэу тыкъэзыуцухьэрэ дунаим фэгъэхьыгъэ шIэныгъэхэр арагъэгъотыгъэх ыкIи Адыгеим ичIыпIэ дахэхэр зыфэдэхэр къафаIо­тагъ.
Проектыр Адыгэ Республикэм зекIонымкlэ и Федерацие, АР-м гъэсэныгъэмрэ шIэныгъэмрэкIэ и Министерствэ, зыгъэпсэфыпIэхэмкIэ ыкIи зекIонымкIэ АР-м и Комитет яIэпыIэгъоу зэхащэ. Профильнэ организациехэм Iоф зэрадашIэрэм ишIуагъэкIэ егъэджэн зэфэшъхьафхэр, экскурсие программэхэр, инструкторхэр зыхэлэжьэрэ мастер-классхэр зэхащэх. Ащ ишIуагъэкIэ ныбжьыкIэхэр спортым нахь пыщагъэ мэхъух, япсауныгъэ апсыхьэ.
Клубэу «Фыщтым» социальнэ мэхьанэ иI. Ахэр къалэм ичIыпIэ зэфэшъхьафхэу спорт еджапIэ е секцие зыдэщымыIэхэм ащагъэпсыщтых. НыбжьыкIэхэр мафэ къэс спортым пылъынхэ амал яIэ хъущт.
ДЕЛЭКЪО Анет.