Адыгэ Республикэм щыпсэухэу лъытэныгъэ зыфэтшIыхэрэр! ТичIыпIэгъу лъапIэхэр!
Адыгэ Республикэр зызэхащагъэр илъэс 35-рэ зэрэхъурэмкIэ тышъуфэгушIо!
Мы мэфэкIыр Адыгеим ис цIыф лъэпкъхэм азыфагу илъ зыкIыныгъэм, республикэм къырыкIощтымкIэ ахэм пшъэдэкIыжь зэрахьырэм, Адыгэ Республикэми, Урысыешхоми апае хэкурысхэм гъэхъагъэу ашIыгъэхэм ятамыгъэу щыт.
Республикэ статус иIэ зыхъугъэм къыщегъэжьагъэу илъэс 35-м къыкIоцI Адыгеим къыдэхъугъэм, хэхъоныгъэу ышIыгъэм непэ лъэшэу тарэгушхо. Тицыхьэ зытелъыжьэу ыпэкIэ тэплъэ, социальнэ лъэныкъомрэ экономикэмрэ зыкъягъэIэтыгъэнымкIэ ищыкIэгъэ амалхэр зетэхьэх, инфраструктурэм зетэгъэушъомбгъу, зекIонымрэ мэкъу-мэщымрэ хэхъоныгъэ ятэгъэшIы, джырэ шапхъэхэм атетэу унэхэр тэгъэпсых, кIэлэцIыкIу IыгъыпIэхэр, еджапIэхэр, псауныгъэм икъэухъумэнкIэ, культурэмкIэ, спортымкIэ учреждениехэр къызэIутэхых, Урысыем исуверенитетрэ ищынэгъончъагъэрэ якъэухъумэн, хэушъхьафыкIыгъэ дзэ операцием епхыгъэ пшъэрылъхэм ягъэцэкIэн тиIахьышIу ахэтэшIыхьэ.
Адыгэ Республикэр зикультурэ, лIэшIэгъу пчъагъэ хъугъэу зишэн-хабзэхэр зыгъэлъэпIэрэ, зэрэлъытэжьхэрэ, чIыпIэ къин ифэхэрэм адеIэнхэм фэхьазыр цIыф шIагъохэр зэрыс шъолъыр хьалэмэтэу щыт.
Адыгеим исхэм аIэ Iофым зэрекIурэм, теубытагъэ зэрахэлъым, гукIочIэшхо зэряIэм ишIуагъэкIэ сыд фэдэрэ ушэтыпIи зэпытчын, республикэр нахь гуIэтыпIэ, нахь фэшIыгъэ хъунымкIэ мэхьанэшхо зиIэ пшъэрылъхэр зэшIотхын тэлъэкIы.
Адыгеим хэхъоныгъэ ышIынымкIэ лъэпсэшIу зыгъэтIылъыгъэ ветеранхэм, тиреспубликэ социальнэ-экономикэ амалэу иIэхэм ягъэпытэн непэ зиIахь хэзышIыхьэрэ пстэуми мы мэфэкI мафэм лъэшэу тызэрафэразэр ыкIи лъытэныгъэ зэрафэтшIырэр къатIо тшIоигъу. Республикэми, хэгъэгуми янеущырэ мафэкIэ пшъэдэкIыжь зэрахьырэр икъоу къазэрагурыIорэм фэшI ныбжьыкIэхэми тафэраз. ТичIыпIэгъу дзэкъулыкъушIэхэу Урысыем ифедэхэр къэзыухъумэхэрэм, Украинэм инеонацизмэ ебэныжьхэрэм «тхьауегъэпсэушхо» ятэIо.
Адыгеим щыпсэурэ пстэуми тыгу къыддеIэу тафэлъаIо псауныгъэ пытэ, щыIэкIэ-псэукIэ дэгъу яIэнэу, текIоныгъакIэхэр ашIынэу, яунагъохэм зэгурыIоныгъэ ренэу арылъынэу, япшъэрылъхэм ягъэцэкIэнкIэ дзэкIолIхэм гъэхъагъэхэр ашIынэу, шIэхэу ягупсэхэм къахэхьажьынхэу!
Адыгэ Республикэм и ЛIышъхьэу,
Урысые политическэ партиеу «Единэ Россием» и Адыгэ шъолъыр къутамэ и Секретарэу
КъумпIыл Мурат
Адыгэ Республикэм и Къэралыгъо
Совет – Хасэм и Тхьаматэу
Владимир Нарожнэр