Икъэралыгъо гъэпсыкIэ зыщызэте­уцощтыгъэ лъэхъаным Адыгэ Респуб­ликэм ушэтыпIэ къызэрымыкIохэр зэпичын фаеу хъугъагъэ. Мы статусым илъэсипшI пчъагъэкIэ ар къыфэкIуагъ. Адыгеир непэ Урысыем исубъектхэу фитыныгъэ икъухэр зиIэхэм зэу ащыщ, зиэкономикэ зызыушъомбгъурэ, узыщыпсэу, узыщылажьэ пшIоигъо шъолъырэу щыт.
Адрэ шъолъырхэм ахэзымыгъэкIокIэрэ шIуагъэу Адыгеим иIэхэр, лъэпкъ хабзэхэр къызэтыригъэнэжьынхэ ылъэ­кIыгъ. ЩызэгурыIохэу мыщ лъэпкъыбэ щызэдэпсэу. Адыгэхэм ячIыгужъ ахэмкIэ унэ гупсэ хъугъэ.
Тиджырэ лъэхъэнэ къызэрымыкIо Адыгэ Республикэм гъэхъагъэ хэлъэу ушэтыпIэ къинхэр зэрэзэпичырэр плъэ­гъункIэ гушIуагъо. Адыгеим ичIыопс идэхагъэ чIинагъэп. Шэн-хабзэхэр непи ащ къызэрэщаухъумэхэрэр, зэрэщагъэлъапIэхэрэр тинэрылъэгъу.
Сыгу къыздеIэу Адыгеим исхэм, ипащэхэм, и ЛIышъхьэу КъумпIыл Мурат лъэпкъ мэфэкIымкIэ – Адыгэ Респуб­ликэм и МафэкIэ сафэгушIо! Мамыр щыIакIэ шъуиIэнэу, шIум шъущымыкIэнэу, зыкIыныгъэрэ зэгурыIоныгъэрэ шъуазыфагу ренэу илъынэу шъуфэсэIо! Джэныкъо машIом ифабэ шъуиунагъохэм ащэрэмыкIуас, чIыгу гупсэм шIулъэгъоу фышъуиIэм тиреспубликэ нахь фэшIыгъэ зышIыщт текIоныгъакIэхэм шъуатырырегъэгушху!
Адыгэ Республикэм
иапэрэ Президентэу
Джарымэ Аслъан.

Лъытэныгъэ зыфэсшIырэ Мурат Къэралбый ыкъор!

Адыгеим щыпсэухэу згъэлъапIэхэрэр!
Тиреспубликэ и МафэкIэ сыгу къыздеIэу сышъуфэгушIо!

Мы мэфэкIыр хэдгъэунэфыкIыныр зэкIэми хэбзэшIу тфэхъугъ. Лъэпкъ зэгурыIоныгъэм итамыгъэу ар щыт, Адыгеим иблэкIыгъэ, инепэрэ, инеущрэ мафэ зыгъэлъапIэхэрэр ащ зэрепхых.
Тиреспубликэ непэ псынкIэу хэхъоныгъэ ешIы: предприятиякIэхэр агъэпсых, псэупIэ фондым зеушъомбгъу, гъогухэр, еджапIэхэр, IэзапIэхэр, кIэлэцIыкIу IыгъыпIэхэр ашIых. Паркхэр зыпкъ ра­гъэ­уцожьых, кIэхэри агъэпсы. Псауныгъэм икъэухъумэнкIэ, гъэсэныгъэм, культурэм, спортым алъэныкъо­кIэ инфраструктурэм зэхъокIыныгъэшхохэр фэхъух. Шъо сы­шъуи­гъусэу а пстэури сынитIукIэ зэрэслъэгъурэм дакIоу, ахэм сызэрахэлажьэрэри сэркIэ гушIогъошхоу щыт.

СичIыпIэгъу лъапIэхэр, мэфэкIымкIэ сышъуфэгушIо! ЗэкIэми ащ кIочIакIэ къытхерэлъхь, гухахъо къытерэт, унагъо пэпчъ гушIуагъо къыферэхь, Адыгеир нахь фэшIыгъэ хъуным фэрэIорышI!
Псауныгъэ пытэ, щыIэкIэ-псэукIэ дэгъу шъуиIэнэу, шъунасыпышIонэу, шъуи­гъашIэ кIыхьэ хъунэу, мамырэу шъупсэунэу, Тхьэм шъукъыухъумэнэу зэкIэми шъуфэсэIо!
Шъэумэн Хьазрэт.
Адыгэ Республикэм
и Президентыгъ, шIушIaкIу.

Адыгеим щыпсэухэу лъытэныгъэ зыфэсшIыхэрэр!
ТимэфэкI шъхьаIэхэм ащыщымкIэ — Адыгэ Республикэм и МафэкIэ сыгу къыздеIэу сышъуфэгушIо!
Чъэпыогъум и 5-р тащыщ пэпчъкIэ мэхьанэшхо зиIэ мафэу щыт. Адыгеим щыпсэухэрэм тарихъ гъогоу къыхахыгъэр, къэралыгъо гъэпсыкIэр ащ егъэпытэ, лъэпкъ шэн-зэхэтыкIэхэр, культурнэ хэбзэ байхэр къызэтыригъэнэжьхэ, республикэм псын­кIэу хэ­хъоныгъэ езыгъэшIыщт амалхэр зэрихьэхэ зэрэшIо­игъуагъэр ащ къыхэщы. Рес­публикэм итарихъ инэкIубгъуакIэ мы мафэм къыщежьэ.
БлэкIыгъэ илъэсипшI заулэмэ къакIоцI Адыгеир Урысые Федерацием ишъолъыр кIэракIэ, джырэ шапхъэхэм адиштэрэ ишъолъыр хъугъэ. ЭкономикэмкIи, социальнэ лъэныкъомкIи, гъэсэныгъэмкIи, культурэмкIи гъэхъэгъэшIухэр зэрэщыIэхэр тинэрылъэгъу. ЛIэужхэм язэп­хыныгъэ лъыдгъэкIуатэзэ, тятэжъ пIашъэхэм якIэн хэд­гъэхъон, лъэныкъуакIэхэр къэ­кIощт уахътэм къыфызэIутхын тлъэкIыгъ.
Республикэр анахьэу зэрыгушхорэр ицIыфхэу Iофым зыIэ екIухэрэр, зэчыишIоу щытхэр, ячIыгу гупсэ фэшъыпкъэхэр ары. Ахэм ахэхьэх лъытэныгъэ зыфэтшIырэ нахьыжъхэу зиопытрэ зишIэныгъэрэкIэ хьалэлэу нахьыкIэхэм адэгуащэхэрэр, ныбжьыкIэ чанхэу, пытагъэ зыхэлъхэу Адыгеир нахь фэшIыгъэ хъунымкIэ амалыкIэхэр къэзыгъотыхэ­рэр.
Мы мэфэкI мафэм Адыгэ Республикэм ис пстэуми псауныгъэ пытэ, насып, щыIэкIэ-псэукIэ дэгъу яIэнэу сафэлъаIо! ЧIыгу гупсэм шIулъэ­гъоу фытиIэм тызэрерэпх, текIоны­гъакIэхэм татырерэгъэгушху, нахь фэшIыгъэ хъущт Адыгеим игъэпсын фэрэIорышI!

Лъытэныгъэ къышъуфэзышIэу, Адыгэ Республикэм
и ЛIышъхьэу щытыгъэ,
АР-м и Къэралыгъо упчIэжьэгъоу ТхьакIущынэ Аслъан.

1989-рэ илъэсым бэдзэогъум СССР-м инароднэ депутатхэм язэфэс щыIагъ. Ащ сыкъыщыгущыIагъ. ШъхьаIэу къыхэз­гъэщыгъэр ащ дэжьым автоном хэкуихэу СССР-м иIагъэхэр зыхэтыгъэхэ крайхэм къахэкIыжьынхэм игъо къызэрэсыгъэр ары. Ащ фэдэ упчIэ къыщызгъэуцугъагъ. Ащ дэжьым гущыIэу къэсшIыгъагъэр бэдзэогъум и 9-м гъэзетэу «Советская Россия» зыфиIорэм къыщыхаутыгъагъ. ЦIэу иIагъэр «Не стесняйтесь доброты». «Тхьауегъэпсэу а упчIэр къызэрэпIэтыгъэр» аIоу ащ еджагъэхэу бэхэр къысфытеуагъэх. Джары лъапсэу фэхъугъэр. Адыгэ хэкум инароднэ депутатхэм я Совет изимычэзыу зэхэсыгъоу, Адыгеир республикэ шъхьаф хъуным фэгъэ­хьыгъагъэр зыкIогъэ мафэм (чъэпыо­гъум и 5-м 1990-м) Лениным ыцIэ зыхьырэ гупчэм нэбгырэ миныр итыгъ. Зэфэхьысыжьыр зыфэдэщтым къежэщтыгъэх. Шъолъырым зыхаушъхьафыкIыным зэкIэри фэягъэп. Пчэдыжьым сыхьатыр 10-м къыщегъэжьагъэу пчыхьэм 8-м нэс хэбзэихъухьэхэм Iоф тшIагъэ ыкIи кIэухым РСФСР— м хэт Адыгэ автоном Советскэ Социалистическэ Республикэ тыхъунымкIэ нахьыбэмэ амакъэ фа­тыгъ. «Тхьауегъэпсэу» етIон фае краим. Ащ тыкъыхэкIыжь зэхъум пчъэр етыутэкIыгъэп. ИIэшъхьэтетхэми къыддырагъэ­штагъ. А лъэхъанымрэ джырырэ зызэ­бгъапшэкIэ, пшIагъэм уфызэплъэкIызэ пшIын фае, непэ республикэр ыпэкIэ лъыкIотагъ, зызэблихъупагъ. Лъэхъэнэ зэфэшъхьафхэм лэжьэгъэ шъолъыр пащэхэм тафэраз. Ау непэрэ респуб­ликэр лъэшэу зэхъокIыгъ. КъэсэшIэжьы ыпэрэ илъэсхэм тичылэхэр, тикъутырхэр зыфэдагъэхэр. Непэ ахэр зэтегъэпсыхьагъэх: гъогухэр, культурэм иунэхэр, IэзапIэхэр, мэкъу-мэщыр… УлъыкIуатэ зыхъукIэ хахъор нахьыбэщт. Республикэ тызэрэхъугъэм шIогъабэ къытфихьыгъ. Арышъ, ащ игъэпсын хэлэжьагъэхэм зэкIэм «тхьашъуегъэпсэу» ясэIо ыкIи Адыгеим щыпсэухэрэм мэфэкIымкIэ сафэгушIо.
Урысыем IофшIэнымкIэ и ­
ЛIыхъу­жъэу, Адыгэ, ­Къэрэщэе-Черкес, Къэбэртэе-Бэлъ­къар, Абхъаз республикэхэм ялъэпкъ тхакIоу ­МэщбэшIэ Исхьакъ.