ХэхъоныгъэшIухэр ешIых
Мыекъуапэ и Мафэ республикэм имэфэкI дыхегъэунэфыкIы. Аужырэ илъэсым тикъэлэ гупсэ хэхъоныгъэшIухэр ышIыгъэх, лъэшэу зиштагъ.
— АР-м и ЛIышъхьэу КъумпIыл Мурат, республикэм иминистрэхэм я Кабинет, Къэралыгъо Советым — Хасэм ыкIи народнэ депутатхэм я Совет хэтхэм яIофшIэн ишIуагъэкIэ Мыекъуапэ илъэс къэс хэхъоныгъэхэр ышIызэ ыпэкIэ лъэкIуатэ, къалэм епхыгъэ Iофыгъуабэ зэшIохыгъэ мэхъу, — хегъэунэфыкIы Мыекъуапэ иадминистрацие ипащэу Геннадий Митрофановым.
2024-рэ илъэсым икIэух ехъулIэу муниципалитетым щыпсэухэрэм япчъагъэ нэбгырэ мини 162-рэ хъущтыгъ.
Къалэм дэт хъызмэтшIапIэхэм блэкIыгъэ илъэсым товарэу къыдагъэкIыгъэхэм ауасэ сомэ миллиард 36-рэм нэсыгъ.
Гурыт ыкIи предприятие инхэм къыдагъэкIыгъэм сомэ миллиард 29,2-рэ къыкIэкIуагъ.
Шэмбэтым ыкIи тхьаумафэм Мыекъуапэ щызэхащэгъэ ермэлыкъхэм япчъагъэ гъэрекIо 195-рэм нэсыгъ.
Муниципалитетым епхыгъэ чIыгу гектар минипшIым ехъум гъэрекIо лэжьыгъэ тонн мин 21-рэ къырахыгъ, бжыхьэсэ лэжьыгъэхэм гектарым гурытымкIэ центнер 45-рэ къарахыжьыгъ, аужырэ илъэси 10-м ащ фэдэ къыхэкIыгъэп.
Чъыгхатэхэм мыIэрысэ тонн 716-рэ къащаугъоигъ.
Квадрат метрэ мини 179,5-рэ зэрылъ фэтэрыбэ хъурэ унэхэр Мыекъуапэ щатыгъ.
Федеральнэ ыкIи республикэ бюджетхэм къахэхыгъэ ахъщэ IэпыIэгъоу муниципалитетым къыIукIагъэр сомэ миллиарди 5-рэ миллион 395-рэ. Ар 2023-рэ илъэсым егъэпшагъэмэ сомэ миллион 318-кIэ нахьыб.
2024-рэ илъэсым микрорайонэу «Михайлово» зыфиIорэм кIэлэеджэкIо 1100-рэ зычIэфэщт еджапIэ щашIыгъ. Iоныгъом и 1-м 2025-рэ илъэсым ащ ипчъэхэр къызэIуихыгъэх.
Аужырэ илъэсищым гъэсэныгъэм иучреждение 11-мэ гъэцэкIэжьынхэр ащыкIуагъэх. «НыбжьыкIэхэмрэ кIэлэцIыкIухэмрэ» зыфиIорэ лъэпкъ проектымкIэ 2025-рэ илъэсым гурыт еджапIэхэу N 10-м, N 11-м ыкIи N 2-м гъэцэкIэжьынхэр ащыкIуагъэх, гурыт еджапIэу N 17-р ыкIи кIэлэцIыкIу IыгъыпIэу N 6-р агъэкIэжьых.
Мыекъуапэ иныбжьыкIэхэм лъэшэу арэгушхо. ЗыкI къэралыгъо ушэтыным нэбгырихмэ балли 100 къырахыгъ. . ЕджапIэр къэзыухыгъэ ныбжьыкIэ 80-мэ «Еджэным гъэхъэгъэшIухэр зэрэщашIыгъэхэм пае» зыфиIорэ бгъэхалъхьэу апэрэ шъуашэ зиIэр къафагъэшъошагъ.
Унагъохэм къэралыгъо IэпыIэгъу ягъэгъотыгъэным ипрограммэкIэ унэгъо ныбжьыкIэ 1137-мэ, ахэм япчъагъэ хэтэу унэгъо 20-мэ ахъщэкIэ яшIуагъэ арагъэкIыгъ. Зянэ-зятэ зимыIэжьхэ нэбгыри 103-мэ къэралыгъо программэм диштэу псэупIэхэр арагъэгъотыгъэх.
Лъэпкъ проектэу «Культурэм» ишIуагъэкIэ культурнэ хэхъоныгъэм и Гупчэу «Ошъад» зыфиIорэр зычIэт унэу къутырэу Гавердовскэм дэтыр къызэIуахыгъ, псэупIэу Родниковым дэт клубыр агъэцэкIэжьыгъ.
2024-рэ илъэсым Мыекъуапэ зекIо мини 100-м ехъу къыдэхьагъ.
Къалэм итеплъэ аужырэ илъэсхэм зехъожьы: фэтэрыбэ хъурэ унэхэм ящагу 21-рэ зэтырагъэпсыхьагъ, «ТекIоныгъэм ибульвар» зыфиIорэр агъэкIэжьыгъ, 2025-рэ илъэсым Лениным ыцIэ зыхьырэ гупчэр, псэупIэу Родниковым культурэм и Унэу дэтым къыпэIулъ пчэгур, Мыекъуапэ иурамэу Ворошиловым ыцIэ зыхьырэм тет кIэлэцIыкIу джэгупIэр зэтырагъэпсыхьагъэх.
2024-рэ илъэсым Мыекъуапэ иурамхэм ягъэкIэжьын епхыгъэ Iофтхьабзэхэри лъагъэкIотагъэх, гъогу IахьипшIымэ гъэцэкIэжьынхэр ащашIыгъэх.
Республикэм игупчэу къалэу Мыекъуапэ нахь гуIэтыпIэ, нахь дахэ зэрэхъущтым, цIыфхэм ящыIэкIэ-псэукIэ нахьышIу шIыгъэным республикэм иIэшъхьэтетхэр, къалэм икъулыкъу зэфэшъхьафхэр дэлажьэх.
А. Балабась.