Адыгэ Республикэм гъэсэныгъэмкIэ иIофышIэхэу, егъэджэн Iофым иветеранхэу лъытэныгъэ зыфэтшIыхэрэр!
КIэлэегъаджэм и МафэкIэ тышъуфэгушIо!
Обществэм ихэхъоныгъэкIэ кIэлэегъэджэ сэнэхьатым мэхьанэшхо зэриIэр мы мэфэкIым къеушыхьаты. ШъуишIэныгъэкIэ кIэлэцIыкIухэм шъуадэгуащэзэ, цIыфыгъэ ахэм ахэлъыным, аIэ Iофым екIуным шъуишъыпкъэу шъуадэлажьэзэ, тиреспублики, хэгъэгуми янеущырэ мафэ лъапсэ фэшъошIы. НыбжьыкIэхэм ухьазырыныгъэу, гъэсэныгъэу агъотыщтыр, щыIэныгъэм къыгъэуцурэ пшъэрылъхэр зэрагъэцэкIэщтхэр бэкIэ зэлъытыгъэр IэпэIэсэныгъэу шъо шъухэлъыр, опытэу, гуетыныгъэу шъуиIэр ары.
КъыткIэхъухьэрэ ныбжьыкIэхэм гъэсэныгъэ дэгъу ягъэгъотыгъэнымкIэ, специалист IэпэIасэхэм ягъэхьазырынкIэ Iофышхо Адыгэ Республикэм непэ щызэшIуахы. ГъэсэныгъэмкIэ учреждениехэр джырэ шапхъэхэм адиштэнхэмкIэ, кIэлэеджакIохэм яамалхэм зыкъызэIуягъэхыгъэнымкIэ, кIэлэегъаджэхэр яIэнатIэ щылъыкIотэнхэмкIэ ткIуачIэ къыхьырэр зэкIэ тэшIэ.
Лъытэныгъэ зыфэтшIырэ кIэлэегъаджэхэр, шъуиIоф хьалэлэу зэрэжъугъэцакIэрэм, шъуисэнэхьат шъузэрэфэшъыпкъэм, шъузышъхьамысыжьэу цIыфхэм шъузэрафэлажьэрэм, шъуигуфэбэныгъэ мафэ къэс кIэлэцIыкIухэм зэрапэжъугъохырэм афэшI лъэшэу тызэрэшъуфэразэр къэтэIо.
Егъэджэн Iофым иветеранхэми «тхьаегъэпсэу» ятэIо. Шъугуи, шъупси гъэсэныгъэ-пIуныгъэ Iофым зэрэхашъулъхьэрэм пае лъытэныгъэшхо къышъуфэтэшIы.
Ныбджэгъу лъапIэхэр, псауныгъэ пытэ, щыIэкIэ-псэукIэ дэгъу шъуиIэнэу, ежъугъаджэхэрэр цIыфышIу хъунхэу, шъуиIофшIэн гъэхъэгъакIэхэр щышъушIынэу, шIоу щыIэр зэкIэ къыжъудэхъунэу тышъуфэлъаIо!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм
и Къэралыгъо Совет – Хасэм
и Тхьаматэу Владимир Нарожнэр