«Адыгэ Республикэм икIэн музейхэм аугъоигъэхэмкIэ» зыфиIорэ къэгъэлъэгъоныкIэ Лъэпкъ музеим къыщызэIуахыгъ. Ащ ыныбжь илъэси 100 зэрэхъурэмрэ республикэм и Мафэрэ ар афэгъэхьыгъ.

Республикэм игупчэ музей ыкIи районхэм ащылажьэхэрэм япкъыгъохэр зэхэубытагъэхэу ащ къыщыгъэлъэгъуагъэх. Къэгъэлъэгъо­ным иIэшъхьэтетыр АР-м и Лъэпкъ музей тарихъымкIэ ыкIи тарихъыкIэмкIэ икъутамэ ипащэу Кудай Марет. Ащ къызэриIуагъэмкIэ, Адыгеим ирайонхэм ямузейхэм экспонат анахь гъэшIэгъонэу ачIэлъхэр къащагъэх.
— ГущыIэм пае, Адыгэкъалэ игугъу къэпшIын хъумэ, анахьэу тынаIэ зытетыгъэр къуаджэхэу хычIэгъ хъугъэхэр ары. Ахэм ащыпсэухэ зэхъум унагъохэм ащагъэфедэщтыгъэхэр, гущыIэм пае, 1950-рэ илъэсым щыIэгъэ телефоныр, радиоприемник зыфэпIощтхэр, Адыгэкъа­лэ апэрэу къагъэкощыгъагъэхэр зыдатхэщтыгъэхэ тхылъыр щызэхэугъоягъэх. Мыекъопэ районым, Жерноклев зэшъхьэгъусэхэм ацIэ зыхьырэ музеир ары хэлажьэрэр, Хэгъэгу зэошхом илъэхъан къизгъэлъэгъукIырэ пкъыгъохэр къыгъэ­лъэгъуагъэх: дзэкIолI паIор, Iэшэ зэфэшъхьафхэр. Инэм музеир пштэмэ, В. Короленкэм ыцIэ ехьы, ау къыгъэлъэгъуагъэхэм янахьыбэр зыфэгъэхьыгъэхэр А. Березовоир ары — исурэтхэр, ищыгъын­хэр. Ащ фэшъхьафэу, адыгэ кушъэр, паIор, я 19-рэ лIэшIэгъум ашIыгъэ ты­жьын бзылъфыгъэ бгырыпхыр. Ащ фэдэу бэ зигугъу къэп­шIын плъэкIыщтыр, — еIо Марет.

Мыщ фэдэ зэхэт къэгъэлъэгъон зэрэзэхащэрэр апэрэп. Лъэпкъ музеир илъэс 90-рэ зыхъугъагъэми зэдэлэжьэныгъэкIэ хагъэунэфыкIыгъагъ. Ащ дэжьым къагъэлъэгъуагъэхэр мыгъэрэм хэмыфэжьынхэм дегупшысагъэх. Ащ ишIуагъэкIэ республикэм имузейхэм яIофшIэн а зы чIыпIэм щалъэгъунэу цIыфхэм амал агъотыгъ. КъэгъэлъэгъоныкIэм ипчъэхэр къэблэгъэрэ мазэхэм зэIухыгъэщтых. Арышъ, ащ зыхэзымыгъэны зышIоигъохэм АР-м и Лъэпкъ музей къяжэ.
Анцокъо Ирин.