Адыгэ къэралыгъо университетым истуденткэу Екатерина Стройковар финанс щынэгъончъэнымкIэ Дунэе олимпиадэм икIэух едзыгъо ихьагъ.

Я 5-рэ Дунэе олимпиадэм икъыхэхын уцугъо студент ыкIи кIэлэеджэкIо мин 65-рэ фэдиз хэлэжьагъ. Финалыр Красноярскэ щыIэ Темыр федеральнэ университетым Iоныгъом и 29-м къыщегъэ­жьагъэу чъэпыогъум и 6-м нэс щыкIощт. Хэгъэгу 40-мэ ялIыкIо 600 фэдиз ащ хэлажьэ, ахэм ащыщ Адыгэ къэралыгъо университетым правэмкIэ и Институт ия 4-рэ курс щеджэрэ Екатерина Стройковар.
Пшъэшъэжъыер юрист хъунэу зегъэ­хьазыры, апшъэрэ еджапIэм и Студент шIэныгъэ обществэ хэт, шъолъыр ыкIи къэралыгъо мэхьанэ зиIэ шIэныгъэ конференциехэм ахэлэжьагъ. Джащ фэдэу я 8-рэ Урысые шIэныгъэ-практическэ конференцием зыщиушэтыгъ.
— Финанс щынэгъончъэным иупчIэхэр, технологиякIэхэр ыкIи ащ епхыгъэ хэбзэгъэуцугъэхэр зэрэсшIогъэшIэгъонхэм къыхэкIэу мы лъэныкъом зыфэзгъэзагъ, олимпиадэм сыхэлэжьэнэу исхъухьагъ, — еIо Екатеринэ.
УФ-м и Президент иунашъокIэ финанс щынэгъончъэнымкIэ я 5-рэ олимпиадэр зэхащагъ. Лъэпкъ проектэу «НыбжьыкIэхэр ыкIи кIэлэцIыкIухэр» зыфиIорэм ар къыдыхэлъытагъ ыкIи финанс шIэныгъэхэм ахэгъэхъогъэным фэIорышIэ.
Iофтхьабзэм кIэщакIо фэхъугъэх УФ-м шIэныгъэмкIэ ыкIи апшъэрэ гъэсэныгъэм­кIэ и Министерствэ, финанс мониторингымкIэ Федеральнэ къулыкъур, УФ-м просвещениемкIэ и Министерствэ, гъэсэныгъэ организациехэр.
— Сигуапэу къыхэзгъэщымэ сшIо­игъу мы олимпиадэм мэхьанэшхо зэриIэр ыкIи къэралыгъомрэ обществэмрэ лъэныкъо пчъагъэкIэ Iоф зэрашIэрэ сис­темэм щыщ зэрэхъугъэр. Мыщ ишIуагъэ­кIэ анахь шIэныгъэ куу зиIэ ныбжьыкIэхэу, нэужым IофшIэнымкIэ къэгъэлъэ­гъон дэгъухэр зиIэн зылъэкIыщтхэр къыхэдгъэщынхэ тлъэкIыщт. Мы проектыр щыIэныгъэм щыщ хъугъэ ыкIи ­илъэс къэс хэлажьэхэрэр къызэрыкIырэ къэралыгъохэм япчагъэ хэхъо. Финансхэм алъэныкъокIэ бзэджэшIагъэу зэрахьэхэрэр нахь макIэ шIыгъэным фэIорышIэ. Зэрифэшъуашэу зыкъэжъугъэлъэгъонэу шъуфэсэIо, — закъыфигъэ­загъ Iофтхьабзэм хэлажьэхэрэм УФ-м и Президент.

ДЕЛЭКЪО Анет.